وتباسى – ادام ءۇشىن ەڭ جاقىن الەۋمەتتىك ورتا، ەڭ ىستىق ۇيا.
وتباسى بەلگىلى داستۇرلەردىڭ، جاعىمدى ونەگەلەردىڭ مۇرالار مەن سالت-داستۇرلەردىڭ ساقتاۋشىسى. اتا-انانىڭ، باسقا دا وتباسى مۇشەلەرىنىڭ ءومىر ءسۇرۋ تاجىريبەسى ءارقايسىسىمىزعا ۇلكەن مەكتەپ.
قازاق حالقىنىڭ وتباسى تاربيەسىندەگى وزىنە ءتان جاراسىمدىلىقتىڭ بۇگىندە قۇلدىراۋعا ۇشىراۋىنا بايلانىستى قوعامدا ءبىرقاتار كەرىتارتپا ارەكەتتىڭ پايدا بولا باستاعانىن بايقاۋعا بولادى. ۇلتتىق قۇندىلىقتارىمىزدى ساقتاپ قالۋدىڭ ءبىر شەشىمى – بۇگىنگى ۇرپاققا وتباسىنىڭ ماڭىزدىلىعىن جەتكىزۋ. وتباسى تاقىرىبى قازاقستان سۋرەتشىلەرى – ق.تەلجانوۆ، گ.ىسمايىلوۆا، ك.شاياحمەتوۆ، ا.ستەپانوۆ، ءا.ءجۇسىپوۆ، س.ايتبايەۆ، و.نۇرجۇمايەۆ، د.الييەۆ جانە ت.ب. تۇلعالاردىڭ تۋىندىلارىندا كوركەم كورىنىس تاپقان. ولاردىڭ شىعارمالارىندا وتباسىنداعى ماحاببات پەن تاتۋلىق، سىيلاستىق پەن قۇرمەت-ىزەت سىندى قازاق داستۇرىندە اتادان-بالاعا سىڭگەن تاربيەلىك ۇعىمدار سىر شەرتەدى.
"ءيا، وتباسى – ادام ومىرىندەگى ەڭ باستى قۇندىلىق. ول ءوزارا تۋىستىق بايلانىستان بولەك، مادەنيەتىمىزگە، داستۇرىمىزگە، ەلىمىزگە، جەرىمىزگە دە پايداسىن تيگىزەتىن كەڭ اۋقىمداعى ۇعىم. وتباسى – اركىمنىڭ تىنىشتىق مەكەنى. ول – مەملەكەت ۋىعى. ءار شاڭىراقتا بەرەكە-بىرلىك، تاتۋلىق بولسا، تۇتاس ەل ءۇشىن دە جايلى ومىرگە كەپىلدىك بار دەگەن ءسوز"، – دەيدى ءابىلحان قاستەيەۆ اتىنداعى ق ر مەملەكەتتىك ونەر مۋزەيىنىڭ «قازاقستان بەينەلەۋ ونەرى» ءبولىمىنىڭ جەتەكشىسى گۇلنۇر جۇبانوۆا.