ۇكىمەت 2025 جىلعا قاراي 41 ملرد اقش دوللارى كولەمىندەگى تاۋارلار مەن قىزمەتتەردىڭ شيكىزاتتىق ەمەس ەكسپورتىنا قول جەتكىزۋدى كوزدەيدى
وتاندىق ءوندىرىستىڭ قازىرگى دەڭگەيى ىشكى سۇرانىستى قامتۋعا قاۋقارسىز. وسىنىڭ ءوزى يمپورتقا تاۋەلدى ەتەدى. تاۋاردى سىرتتان يمپورتتاي وتىرىپ، ءبىز قازاقستانعا الەمدىك ينفلياسيانىڭ ەنۋىنە ەسىك اشامىز. ونىڭ ۇستىنە، شەتەلدىك تاۋارلارعا اقى تولەۋ كەزىندە شەتەلدىك ۆاليۋتاعا سۇرانىس تۋىندايدى، وسىلايشا ايىرباس باعامى قىسىم كورەدى، دەيدى قازاقستان ۇلتتىق بانكىنىڭ ءتوراعاسى عالىمجان ءپىرماتوۆ.
قازاقستاندىق ەكسپورتتىڭ 60%-ى مۇنايعا تيەسىلى ەكەنىن ەسكەرسەك، اعىمداعى شوتتىڭ تراەكتورياسى قارا التىننىڭ الەمدىك باعاسىنىڭ تراەكتورياسىمەن بەلگىلەنەدى. ەنەرگيا جەتكىزۋشلەرىنىڭ باعاسى تومەن بولعان كەزدە تولەم بالانسىنىڭ اعىمداعى شوتى تاپشىلىق ايماعىندا قالدى، ال باعا كوتەرىلگەن ۋاقىتتا پروفيسيت بايقالدى.
مۇنداي زاڭدىلىق وسى جىلدىڭ ءبىرىنشى جارتىجىلدىعىندا دا بايقالىپ وتىر: مۇنايدىڭ جوعارى باعاسى اعىمداعى شوتتىڭ 6،6 ملرد اقش دوللارىنا ءپروفيسيتىن قامتاماسىز ەتتى. الايدا، بۇل تۇراقتى ءۇردىس ەمەس، ويتكەنى ول تەك شيكىزات باعاسىنىڭ وسۋىمەن عانا قامتاماسىز ەتىلەدى.
«ەكونوميكانى ءارتاراپتاندىرۋ – ءبىر كۇندىك جۇمىس ەمەس. ول ۇنەمى جۇرگىزىلىپ وتىرادى. ۇكىمەت 2025 جىلعا قاراي 41 ملرد اقش دوللارى كولەمىندەگى تاۋارلار مەن قىزمەتتەردىڭ شيكىزاتتىق ەمەس ەكسپورتىنا قول جەتكىزۋدى كوزدەيدى. وسى ماقساتتىڭ ءوزى قازىردەن باستاپ بۇل باعىتتاعى جۇمىستاردى كۇشەيتۋدى تالاپ ەتەدى. قازاقستان ەكونوميكاسى سىرتقى كۇيزەلىستەرگە ۇشىرىپ وتىر. 2020 جىلى مۇناي نارىعىنداعى باعا كەرەعارلىعىمەن، ودان كەيىن ىلە-شالا ورىن العان جاھاندىق كوروناۆيرۋس پاندەمياسىمەن بايلانىستى سىرتقى تاۋەكەلدەردىڭ ءىس جۇزىندە بوي كورسەتۋى ينفلياسيانىڭ نىسانالى ءدالىز شەگىنەن شىعىپ كەتۋىنە جول بەردى»، - دەيدى عالىمجان ءپىرماتوۆ.
2021 جىلدىڭ ورتا شەنىنەن باستاپ الەمدە، سول سياقتى قازاقستاندا دا جەتكىزۋ تىزبەگىنىڭ بۇزىلۋىنان تاۋار-شيكىزات نارىعىندا سۇرانىستىڭ جەدەل قالپىنا كەلۋى مەن تۋىنداعان جاھاندىق تەڭگەرىمسىزدىكتىڭ سالدارىنان ينفلياسيا قارقىن الا باستادى. بيىل ينفلياسيا گەوساياسي احۋالدىڭ شيەلەنىسكەن تۇستا جاڭا اينالىمعا ەندى.
دەگەنمەن، ۇلتتىق بانكتىڭ جەدەل قابىلداعان شارالارى ماكروەكونوميكالىق تۇراقتىلىق پەن تەڭگە اكتيۆتەرىن ساقتاپ قالۋعا مۇمكىندىك بەردى. وسى جىلدىڭ اقپان-ناۋرىز ايلارىندا قابىلدانعان شەشىمدەر ۇلتتىق ۆاليۋتانى قولداۋعا جانە قازاقستاندىقتاردىڭ جيناق قورىن قورعاۋعا سەبەپشى بولدى.