كىتاپ اۆتورى مۇحتار اۋەزوۆتىڭ ۇستازدىق ەڭبەگىن بىرنەشە قىرىنان كورسەتكەن
نۇر-سۇلتان قالاسىنداعى ق ر ۇلتتىق اكادەميالىق كىتاپحاناسىندا زاڭعار جازۋشى مۇحتار اۋەزوۆتىڭ 125 جىلدىعىنا وراي تۇرىك تىلىنە اۋدارىلعان اكادەميك زەينوللا قابدولوۆتىڭ «Benim Auezov'um» رومان-ەسسەسىنىڭ تۇساۋكەسەر ءراسىمى ءوتتى، دەپ حابارلايدى Almaty-akshamy.kz.
القالى جيىندى تۇركسوي ۇيىمى مەن قازاقستان رەسپۋبليكاسىنىڭ مادەنيەت جانە سپورت مينيسترلىگى بىرلەسىپ ۇيىمداستىردى. كەلەلى باسقوسۋعا ق ر مادەنيەت جانە سپورت ءمينيسترى داۋرەن ابايەۆ، حالىقارالىق تۇركسوي ۇيىمىنىڭ باس حاتشىسى سۇلتان رايەۆ، قوعام قايراتكەرى، مادەنيەتتانۋشى مۇرات اۋەزوۆ، زەينوللا قابدوللوۆتىڭ ۇرپاقتارى جانە زيالى قاۋىم وكىلدەرى مەن بەلگىلى عالىمدار قاتىستى.
ونەگەلى ءومىرىن قازاق عىلىم-بىلىمىنە ارناعان زاڭعار جازۋشى مۇحتار اۋەزوۆ جايلى جازىلعان رومان-ەسسە ۇستاز بەن شاكىرت اراسىنداعى رۋحاني بايلانىستى باياندايدى. كىتاپ اۆتورى مۇحتار اۋەزوۆتىڭ ۇستازدىق ەڭبەگىن بىرنەشە قىرىنان كورسەتكەن.
بۇل تۋىندىنى باسقالاردان وقشاۋلاپ تۇرعان ەرەكشەلىگى دە – دارا تۇلعانىڭ ۇستازدىعى مەن جازۋشىلىق قاسيەتى توعىستىرىلا سۋرەتتەلگەن. «مەنىڭ اۋەزوۆىمدى» تۇرىك تىلىنە قازاقتىڭ ايتىسكەر اقىن قىزى اسەم ەرەجە قىزى اۋدارعان. ول بۇدان بۇرىن رەسەيلىك عالىم ۆيكتور كوزودويدىڭ «ءاليحان بوكەيحان» اتتى شىعارماسىن دا تۇرىكشەگە اۋدارعان.
سونداي-اق، زەينوللا سانىكتىڭ اڭگىمەلەرىن دە تۇرىك وقىرماندارىنا ۇسىندى. انكارادا شىققان كىتاپتىڭ قۇراستىرۋشىسى – امانتاي ءشارىپ، ادەبي رەداكتورى – فازىل بيسەنبايەۆ، عىلىمي رەداكتورى – ساۋلە ەرجانوۆا. شاراعا جينالعان زيالى قاۋىم تۇرىك تىلىندەگى تۋىندىعا ءوز باعاسىن بەردى.