وسكەمەندە اۋا ساپاسى كۇرت ناشارلاۋىنىڭ سەبەبى وسكەمەن قالاسىندا قالىپتاسقان قولايسىز مەتەورولوگيالىق جاعدايلارعا قاتىستى وتكەن بريفينگ بارىسىندا ايتىلدى، - دەپ حابارلايدى aqshamnews.kz ءتىلشىسى.
قالا اكىمى المات اقىشوۆتىڭ ايتۋىنشا، جەلسىز كۇندەردە كاسىپورىندارمەن ءوزارا ءىس-قيمىل جولعا قويىلعان.
"قولايسىز مەتەوجاعدايلار كەزىندە ءوندىرىس ورىندارى شىعارىندىلاردى ازايتۋ شارالارىن قابىلدايدى. بۇگىندە وسكەمەندە اۆتوكولىك سانى دا كوبەيىپ كەتتى. جىلىتۋ ماۋسىمى باستالعان كەزدە جەر ۇيلەر كومىر جاعا باستايدى. اۋا ساپاسىنىڭ ناشارلاۋىنا بۇل فاكتورلار دا اسەر ەتىپ وتىر"، - دەدى ول.
ەكولوگيالىق مونيتورينگ دەرەكتەرى بويىنشا، اۋاداعى زياندى شىعارىندىلاردىڭ نەگىزگى كورسەتكىشتەرىنىڭ كوپشىلىگى بويىنشا بەلگىلەنگەن نورماتيۆتەن اسىپ كەتۋ فاكتىسى انىقتالعان جوق.
شقو ءبىلىم باسقارماسىنىڭ باسشىسى قۋات وقاسوۆتىڭ ايتۋىنشا، قولايسىز مەتەورولوگيالىق جاعداي قالىپتاسقان كەزدە مەكتەپتەردىڭ قاشىقتان وقىتۋ فورماتىنا كوشۋ الگوريتمى ازىرلەنەدى.
"اۋا ساپاسىنىڭ ناشارلاۋى، كوكتايعاق نەمەسە كۇننىڭ كۇرت سۋىتۋى سىندى سەبەپتەرگە قاتىستى ساباقتى ونلاين فورماتقا كوشىرۋ شەشىمىن ۇنەمى ءبىلىم بولىمدەرى قابىلدايدى. مىسالى، التاي قالاسىندا اۋا تەمپەراتۋراسى -45 گرادۋس بولىپ، ساباقتار توقتاتىلسا، بۇل شەشىم زايسان اۋدانىنا ەش قاتىسى جوق. ءبىلىم بولىمدەرى بىزگە اقپارات ۇسىنادى، سونىڭ نەگىزىندە ولارمەن بىرگە ءتيىستى شەشىم قابىلدايمىز. كەشە «قازگيدرومەت» رمك-نان وسكەمەندە 23 قازان ساعات 20:00-دەن 24 قازان ساعات 20:00-گە دەيىن ەكىنشى دارەجەلى قولايسىز مەتەوجاعدايلار كۇتىلەتىنى تۋرالى اقپارات الدىق. وسىلايشا، قالالىق ءبىلىم ءبولىمى ساباقتى قاشىقتان وتكىزۋ فورماتىنا اۋىستىرۋ جايلى شەشىم قابىلدادى. بىزدە بەلگىلى ءبىر الگوريتم بار، ءبىراق ونىڭ ءبىر كەمشىلىگى - اكىمدىك پەن ءبىلىم ءبولىمى اراسىنداعى ءوزارا ارەكەتتەستىكتىڭ بولماۋى. قالا اكىمى شەشىم قابىلداۋعا قۇقىلى، الايدا ءبىلىم ءبولىمى وعان ەمەس، وبلىستىق ءبىلىم باسقارماسىنا باعىنادى. الداعى ۋاقىتتا بۇل الگوريتمدى جەتىلدىرەمىز"، - دەدى ول.
ەسكە سالساق، وسىعان دەيىن وسكەمەندە اۋا ساپاسىنىڭ ناشارلاۋىنا بايلانىستى وقۋشىلار مەكتەپكە بارماعانى حابارلانعان.