مەگاپوليستە رەسپۋبليكا كۇنىنە وراي بىردەن ءتورت زاماناۋي جالپى ءبىلىم بەرەتىن مەكتەپ سالتاناتتى تۇردە اشىلدى. سولاردىڭ ءبىرى – مەدەۋ اۋدانىندا ورنالاسقان، جوبالىق قۋاتى 2 مىڭ وقۋشى ورنى بولاتىن №220 جالپى ءبىلىم بەرەتىن مەكتەپ.
"بۇل جالپى ءبىلىم بەرەتىن مەكتەپ ءوز شاعىنايماقتاعى ورىن تاپشىلىعىن تولىق جابادى. جالپى، 1 قىركۇيەكتەن بەرى قالادا 12 جاڭا مەكتەپ اشىلدى. رەسپۋبليكا كۇنىنە وراي وسى اپتادا تاعى ءتورت ءبىلىم بەرۋ مەكەمەسى پايدالانۋعا بەرىلەدى. بەسىنشى مەكتەپ – قاراشا ايىندا، ال تاعى سەگىزى – جىل سوڭىنا دەيىن "ساتىپ الۋ" تەتىگى ارقىلى ىسكە قوسىلادى"، – دەدى الماتى قالاسى اكىمىنىڭ ورىنباسارى ازامات قالدىبەكوۆ.
ونىڭ ايتۋىنشا، مەگاپوليستە بيىلعى وقۋ جىلىندا بارلىعى 24 مەكتەپ اشىلادى، سونىڭ ىشىندە 21 مەكتەپ "كەلەشەك مەكتەپتەرى" ۇلتتىق جوباسى اياسىندا سالىنىپ جاتىر.
"بۇل تاريحي ماكسيمۋم. بۇعان دەيىن ءبىر وقۋ جىلىندا مۇنشاما جاڭا مەكتەپ پايدالانۋعا بەرىلمەگەن. مۇنىڭ بارلىعى قازاقستان پرەزيدەنتى قاسىم-جومارت توقايەۆ باستاماشى بولعان "كەلەشەك مەكتەپتەرى" ۇلتتىق جوباسىنىڭ ارقاسىندا جۇزەگە استى"، – دەدى ازامات قالدىبەكوۆ.
№220 مەكتەپ زاماناۋي ۇلگىدە سالىنعان، ونىڭ قۇرامىندا 83 وقۋ كابينەتى، 4 سپورت زالى، سونداي-اق اسحانا، كىتاپحانا، مەديسينالىق پۋنكت، كونفەرەنس-زال، سپورت الاڭى، تەننيس كورتى، ۆولەيبول جانە باسكەتبول الاڭدارى بار.
"عيمارات قوزعالىسى شەكتەۋلى ادامدار ءۇشىن تولىق بەيىمدەلگەن. بارلىق كابينەت ينتەراكتيۆتى تاقتالارمەن جانە وقۋ ماتەريالدارىمەن جابدىقتالعان. وقۋشىلاردىڭ قاۋىپسىزدىگىن قامتاماسىز ەتۋ ءۇشىن بەينەباقىلاۋ جۇيەلەرى مەن دابىل باتىرمالارى ورناتىلعان"، – دەدى مەكتەپ ديرەكتورى مانات اشىربەكوۆا.
ايتا كەتۋ كەرەك، رەسپۋبليكا كۇنىنە وراي الماتىدا ناۋرىزباي اۋدانىنداعى قۇرامىس شاعىناۋدانىندا ورنالاسقان №219 جالپى ءبىلىم بەرەتىن مەكتەپ تە ەسىگىن ايقارا اشادى. ءبىلىم ورداسىندا 1 500 وقۋشىعا ارنالعان 79 وقۋ كابينەتى بار. بيىل 1-سىنىپقا 80 وقۋشى قابىلداندى. وقۋ-تاربيە ۇدەرىسىن 26 پەداگوگ جۇرگىزەدى.
سونداي-اق ناۋرىزباي اۋدانىنىڭ شۇعىلا شاعىناۋدانىندا ورنالاسقان №221 جالپى ءبىلىم بەرەتىن مەكتەپ جۇمىسىن باستايدى. ءبىلىم ورداسىندا 2 500 وقۋشى ورنىن قامتيتىن 125 وقۋ كابينەتى بار. بۇگىندە 1 722 وقۋشى قابىلدانعان. وقۋ-تاربيە ۇدەرىسىن جوعارى كاسىبي دەڭگەيگە يە 74 پەداگوگ قامتاماسىز ەتەدى.
بۇدان بولەك، الاتاۋ اۋدانىندا ورنالاسقان №222 جالپى ءبىلىم بەرەتىن مەكتەپ تە اشىلادى. ءبىلىم ورداسىندا 2 مىڭ وقۋشى ورنىن قامتيتىن 96 وقۋ كابينەتى بار. بۇگىندە 700 وقۋشى قابىلداندى. 1-سىنىپقا 41 بالا قابىلدانعان. ءبىلىم بەرۋ ۇدەرىسىن 44 پەداگوگ جۇرگىزەدى.
بارلىق جاڭا مەكتەپ زاماناۋي جابدىقتارمەن، كەڭ سىنىپتارمەن، سپورت جانە شىعارماشىلىق زالدارمەن، سونداي-اق ەڭبەك كابينەتتەرىمەن قامتاماسىز ەتىلگەن. ءبىلىم بەرۋ ۇيىمدارى وسى وقۋ جىلىنىڭ ەكىنشى توقسانىنان باستاپ وقۋشىلاردى قابىلداۋعا تولىق دايىن.
الماتى قالاسىنىڭ دامۋى اياسىندا جەرگىلىكتى بيۋدجەت ەسەبىنەن 550 ورىندىق تاعى ءبىر مەكتەپتىڭ قۇرىلىسى جۇرگىزىلۋدە، سونداي-اق الاتاۋ اۋدانىندا 900 ورىندىق "ابىرو́ي" جەكە مەكتەبىن جانە ناۋرىزباي اۋدانىندا 1 200 ورىندىق جاڭا جەكە مەكتەپتى ساتىپ الۋ جوسپارلانىپ وتىر.