الماتىدا العاشقى ورتالىق ازيا فۋتبول فورۋمى – CAFF-2025 ءوتتى. حالىقارالىق ءىس-شاراعا قازاقستان، قىرعىزستان، وزبەكستان، تاجىكستان جانە بەلارۋس مەملەكەتتەرىنىڭ فۋتبول مەن فۋتزال وكىلدەرى قاتىستى.
فورۋمنىڭ باس ۇيىمداستىرۋشىسى جىبەك يسايەۆا فۋتبول الەمنىڭ تۇكپىر-تۇكپىرىندەگى ادامداردى بىرىكتىرەتىن سپورت ءتۇرى ەكەنىن اتاپ ءوتتى.
"ءبىزدىڭ فورۋم حالىقارالىق فۋتبول كۇنىنە وراي ۇيىمداستىرىلدى جانە فۋتبولدى دامىتۋ مەن كەڭىنەن ناسيحاتتاۋ ءۇشىن كورشىلەرىمىزبەن كۇش-جىگەردى بىرىكتىرۋگە باعىتتالعان. فورۋمعا قاتىسۋشىلاردىڭ بارلىعى مۇندا تاجىريبە الماسىپ، وزدەرىنە پايدالى اقپارات الا الادى"، – دەدى ول.
ال تاجىكستان فۋتبول فەدەراسياسىنى وكىلى رامازون ميرزويەۆ مۇنداي ءىس-شارانىڭ وڭىردەگى فۋتبول دەڭەگەيىن ارتتىرۋعا كومەكسەتەتىنىن ايتتى.
"فۋتزالدان «قايراتتىڭ» جەتىستىكتەرى، فۋتبولدان ۋەفا چەمپيوندار ليگاسىنا «قايراتتىڭ» ونەر كورسەتۋى، وزبەكستان قۇراماسىنىڭ 2026 جىلعى الەم چەمپيوناتىنا جولداما الۋ – وسى جەتىستىكتەرگە كورشىلەرىمىزدىڭ قالاي جەتكەن ءبىز ءۇشىن ءاردايىم قىزىقتى ءارى پايدالى. ءبىز فۋتبولعا قاتىستى ورتاق قىزىعۋشىلىقتاردى انىقتادىق جانە ەندى باۋىرلاس حالىقتاردىڭ وكىلدەرىن ءوز جەرىمىزدە كورگىمىز كەلەدى. الماتىدا قولداۋ تاپقان جوسپارلاردىڭ قاتارىندا كەلەسى جىلى مەديا-جۇلدىزدارى قاتىساتىن تۋرنير وتكىزۋ بار"، – دەدى ول.
جالپى فورۋم بارىسىندا كاسىبي فۋتبول كلۋبتارى مەن حالىقارالىق فەدەراسيالاردىڭ دامۋ ستراتەگيالارى، بالالار-جاسوسپىرىمدەر جانە الەۋمەتتىك فۋتبول اكادەميالارى، جاس ويىنشىلاردى دايىنداۋ، يننوۆاسيالار جانە تەحنولوگيالار، Digital شەشىمدەر تالقىلاندى.