پاۆلودار وبلىسىنىڭ باياناۋىل اۋدانىندا اۋىل تۇرعىندارى مۇز قۇرساۋىندا قالعان اققۋلار جۇبىن اجالدان اراشالاپ قالدى. وقيعا تۇلۋسور اتتى شاعىن كولدە بولعان، دەپ حابارلايدى AqshamNews.kz ءتىلشىسى.
Instagram جەلىسىندە تاراعان ۆيدەونى بىرلىك اۋىلىنىڭ تۇرعىنى باۋىرجان جاقىپوۆ جاريالاعان. ونىڭ ايتۋىنشا، ول اكەسىمەن بىرگە قاتىپ قالعان كول بەتىندە السىرەپ وتىرعان ءبىر اققۋدى بايقاپ، دەرەۋ كومەككە كىرىسكەن. قۇتقارۋ ءساتى كوپتىڭ جۇرەگىن ەلجىرەتىپ، جەلىدە جىلدام تاراپ كەتتى.
ۆيدەودا مۇزدان بوساتىلعان اققۋدىڭ وزىنە كومەكتەسكەن ەر ادامدى موينىمەن قۇشاقتاپ العانى كورىنەدى. وسىدان كەيىن اكەلى-بالالى ەكەۋى كولدە تاعى ءبىر اققۋدىڭ بارىن اڭعارىپ، وعان دا اسىققان. ەكىنشى قۇستىڭ دا قاۋىرسىنى مۇزعا قاتىپ قالىپتى. جىگىت قۇستى ابايلاپ بوساتىپ، كەيىن ەكى اققۋدى دا كولىككە وتىرعىزىپ الىپ كەتكەن.
پاۆلودار وبلىستىق ورمان جانە جانۋارلار دۇنيەسىن قورعاۋ مەكەمەسىنىڭ باسشىسى اجدار ءجۇسىپوۆتىڭ ايتۋىنشا، اققۋلار اۋا رايىنىڭ كۇرت سۋىتۋىنا بايلانىستى جىلى جاققا ۇشىپ ۇلگەرمەي قالۋى مۇمكىن. كۇندىزگى جىلىمىقتان كەيىن تۇندە كولدىڭ مۇزى قاتا ءتۇسىپ، السىرەگەن انالىق اققۋ مۇز تۇزاعىنا تۇسكەن. ال اتالىق اققۋ ونى تاستاماي، جانىندا قالىپ قويعان.
بەلگىلى بولعانداي، باۋىرجان جاقىپوۆ قۇستاردى ۋاقىتشا قوراعا ورنالاستىرىپ، كۇتىم جاساپ وتىر. انالىق اققۋدىڭ تاباندارى ءسال ۇسىگەن، ال اتالىعى قاتتى السىرەپ قالعان. دەگەنمەن ءقازىر ەكەۋىنىڭ دە جاعدايى جاقسارىپ كەلەدى: جەمدى جاقسى جەپ جاتىر. العاشىندا بالالار تاعامىن بەرسە، ءقازىر ۋاتىلعان س ۇلى مەن بيداي قوسىپ قورەكتەندىرىپ ءجۇر.
قۇستار تولىق ساۋىعىپ كەتسە، تۇرعىندار ولاردى كوكتەمدە تابيعاتقا قايتا جىبەرۋدى جوسپارلاپ وتىر. قۇتقارۋ ءساتى تۇسىرىلگەن بەينە 200 مىڭعا جۋىق قارالىم جيناپ، مىڭداعان پىكىر قالدىرىلعان. جەلىدەگىلەر اۋىل ازاماتتارىنىڭ جاناشىرلىعىنا ريزاشىلىق ءبىلدىرىپ، اق تىلەكتەرىن جاۋدىرعان.