2025 جىلعى 12 جەلتوقساندا الماتى قالاسى ءبىلىم باسقارماسىنىڭ «№187 جالپى ءبىلىم بەرەتىن مەكتەپ» كمم-دە كورنەكتى اقىن، جازۋشى، ق ر مادەنيەت سالاسىنىڭ مايتالمانى ساۋلە دوسجاننىڭ «بالا شاقتان – بولاشاققا» اتتى جاڭا عۇمىرنامالىق-تانىمدىق پوۆەسىنىڭ سالتاناتتى تانىستىرىلىمى ءوتتى.
شىعارما – ەلىمىزدىڭ پرەزيدەنتى قاسىم-جومارت كەمەل ۇلى توقايەۆتىڭ بالالىق كەزەڭى مەن تۇلعا بولىپ قالىپتاسۋ جولىنا ارنالعان.
ءىس-شارادا مەملەكەت باسشىسىنىڭ ۇلت كوشباسشىسى دەڭگەيىنە دەيىنگى دارا جولىنا اسەر ەتكەن وتباسى تاربيەسى، رۋحاني قۇندىلىقتارى مەن ادامدىق ۇستانىمدارى تۋرالى تاعىلىمدى ويلار تالقىلاندى.
سونداي-اق قازاق دەتەكتيۆ جانرىنىڭ نەگىزىن قالاعان كەمەل توقايەۆتىڭ ۇلاعاتتى تاربيەسى مەن ونەگەسى تۋرالى ەرەكشە پىكىرلەر ايتىلدى. ءىس-شاراعا تانىمال قالامگەرلەر، مەكتەپ پارلامەنتىنىڭ وكىلدەرى مەن اعا تالىمگەرلەر جانە اتا-انالار قاۋىمى قاتىستى.
وقۋشىلار اۆتور ساۋلە دوسجانمەن ەركىن فورماتتا سۇحبات قۇرىپ، پرەزيدەنتتىڭ بالالىق شاعىنان الىنعان ومىرلىك ساباقتار مەن شىعارمانىڭ تاربيەلىك مازمۇنىن تالقىلادى. سونىمەن قاتار جاس بۋىننىڭ ادەبيەتكە قىزىعۋشىلىعىن ارتتىرۋعا ارنالعان ارنايى ديالوگ الاڭى ۇيىمداستىرىلدى.
شارا جاس ۇرپاقتى وتانسۇيگىشتىككە، تاباندىلىققا، بىلىمگە قۇشتارلىققا جانە ازاماتتىق جاۋاپكەرشىلىككە باۋلۋدى ماقسات ەتتى. پوۆەست ارقىلى وقۋشىلار ءاربىر ۇلكەن جەتىستىكتىڭ ءتۇپ تامىرى بالا كۇننەن باستالاتىن ەڭبەك، ىنتا جانە ادالدىق ەكەنىن سەزىندى.