ونكولوگيالىق اۋرۋ كۇدىگىنە ىلىككەن پاسيەنتتەر ءۇشىن «جاسىل ءدالىز» ەنگىزىلگەن

 بيىل 6 ايدا 19 مىڭنان استام ادامنان قاتەرلى ىسىك انىقتالدى.

بۇل تۋرالى ق ر دەنساۋلىق ساقتاۋ ءبىرىنشى ۆيسە-مينيسترى جاندوس بۇركىتبايەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«بيىل دەنساۋلىق ساقتاۋ ۇيىمدارى جەلىسىنىڭ جاڭا مەملەكەتتىك ءنورماتيۆى بەكىتىلدى. تۇرعىندار سانى 50-دەن 500 ادامعا دەيىنگى اۋىلداردا مەديسينالىق پۋنكت اشۋ، حالقى 500-دەن 1500 ادامعا دەيىنگى اۋىلداردا فەلدشەرلىك-اكۋشەرلىك پۋنكت قۇرۋ كوزدەلەدى.

5000-نان استام تۇرعىن تۇراتىن اۋىلداردا مەديسينالىق-سانيتاريالىق العاشقى ورتالىقتار قۇرىلاتىن بولادى. جاڭا نورماتيۆتەر جەرگىلىكتى اتقارۋشى ورگانداردىڭ قالاۋى بويىنشا دارىگەرلىك امبۋلاتوريالاردىڭ ۋچاسكەلەرىن كەڭەيتۋدى كوزدەيدى. «التىن ساعات» قاعيداتى بويىنشا اۋىل حالقىنا ۋاقتىلى شۇعىل مەديسينالىق كومەك كورسەتۋ ءۇشىن 32 كوپبەيىندى اۋدانارالىق اۋرۋحانالار كوپبەيىندى ورتالىق اۋداندىق اۋرۋحانالار بولىپ قايتا قۇرىلادى»، - دەدى ءبىرىنشى ۆيسە-مينيستر ورتالىق كوممۋنيكاسيالار قىزمەتىندەگى باسپا ءسوز ءماسليحاتىندا.

ونىڭ اتاپ وتۋىنشە، ونكولوگيالىق اۋرۋ كۇدىگىنە ىلىككەن پاسيەنتتەر ءۇشىن «جاسىل ءدالىز» ەنگىزىلدى. ياعني، مۇنداي كۇدىككە ىلىككەن پاسيەنتتەر كەزەكتەن تىس ءارى شەكتەۋسىز دارىگەردىڭ قابىلداۋىنا كىرەدى.

«2022 جىلدىڭ 6 ايىندا «جاسىل ءدالىز» ارقىلى 25 مىڭنان استام ادام ءوتتى. ونىڭ ىشىندە 19 مىڭنان استام پاسيەنتتە قاتەرلى ىسىكتىڭ جاڭادان قالىپتاسۋ دياگنوزى انىقتالدى»، - دەدى جاندوس بۇركىتبايەۆ.