ۇكىمەتتە ۆيسە-پرەمەر سەرىك ءجۇمانعاريننىڭ توراعالىعىمەن وتكەن كەڭەستە جەم-شوپ دايىنداۋ ناۋقانىنىڭ قورىتىندىسى ايتىلدى.
وڭىرلەردە بارلىعى 24،7 ملن توننا جەم-شوپ دايىندالدى. بۇل مالدى قىستان شىعارۋعا قاجەتتى مال ازىعى كولەمىنىڭ 98،9%-ىن قۇرايدى. جەم-شوپ قورىنىڭ قۇرامىنا 1،5 ملن توننا ءشوپ، 1،9 ملن توننا سۇرلەم، 4،5 ملن توننا سابان، 4،9 ملن توننا قۇنارلى جەم كىرەدى. بيىلعى اۋا رايىنىڭ قولايسىزدىعىنا قاراماستان مۇنداي ناتيجەلەرگە جەدەل شتابتىڭ ۋاقتىلى ارەكەت ەتۋىنىڭ جانە مەملەكەتتىك قولداۋ شارالارىنىڭ ارقاسىندا قول جەتكىزىلدى، دەپ حابارلايدى Almaty-akshamy.kz.
«ازىق-تۇلىك كورپوراسياسى” اق جەلىسى بويىنشا فەرمەرلەرگە ارزانداتىلعان باعامەن استىق ساتۋعا ارنالعان 235 مىڭ توننا كولەمىندە جەم-شوپ قورى قالىپتاستىرىلدى. جەمشوپ دايىنداۋ ءۇشىن قوسىمشا 58 مىڭ توننا جەڭىلدەتىلگەن ديزەل وتىنى ءبولىندى. "قازاگروقارجى" اق جەم-شوپ دايىنداۋ تەحنيكاسىنىڭ جەڭىلدىكتى ليزينگىن قارجىلاندىرۋ ءۇشىن 10 جىلعا 6%-بەن 20 ملرد تەڭگە ءبولدى. بۇل باعدارلاما بويىنشا 6،9 ملرد تەڭگە يگەرىلدى، بۇل 35%-دى قۇرايدى»، — دەدى اۋىل شارۋاشىلىعى ۆيسە-مينيسترى امانگاليي بەردالين.
«بايتەرەك» ۇبح» اق جەلىسى ارقىلى اۋىل شارۋاشىلىعى تاۋارىن وندىرۋشىلەر نەسيەلەرىنىڭ مەرزىمىن ۇزارتۋ جانە قايتا قۇرىلىمداۋ جۇمىستارى جۇرگىزىلىپ كەلەدى. ءقازىردىڭ وزىندە 23،5 ملرد تەڭگەگە 574 ءوتىنىم ماقۇلداندى، 16 ملرد تەڭگەنىڭ 224 ءوتىنىمى قارالۋدا. سونىمەن قاتار ماڭعىستاۋ وبلىسىنىڭ مالشىلارى ءۇشىن تەمىرجول كولىگىمەن مال ازىعىن تاسىمالداۋ تاريفتەرى 80%-عا تومەندەتىلدى.
«13 وڭىردە مال ازىعىن سۋبسيديالاۋ ءۇشىن تاۋار وندىرۋشىلەرگە بارلىعى 27،6 ملرد تەڭگە باعىتتالدى، ونىڭ ىشىندە جەدەل شتابتىڭ ۇسىنىسى بويىنشا 12،9 ملرد تەڭگە قوسىمشا ءبولىندى»، — دەپ اتاپ ءوتتى ا.بەردالين.
وسىلايشا، قابىلدانعان شارالار قىسقا قاجەتتى مال ازىعى قورلارىن قالىپتاستىرۋعا مۇمكىندىك بەردى. سقو، قاراعاندى، ماڭعىستاۋ، پاۆلودار وبلىستارىندا پىشەن مەن قۇنارلى جەمنىڭ جەتىسپەۋشىلىگى بايقالادى. جيىن قورىتىندىسى بويىنشا سەرىك جۇمانعارين بارلىق وڭىرلەردە قاجەتتى مال ازىعى كولەمىن دايىنداۋدى قامتاماسىز ەتۋدى جانە ولاردى مال قىستايتىن ورىندارعا جەتكىزۋدى ەرەكشە باقىلاۋعا الۋدى تاپسىردى.