الماتىدا ونەر، ءبىلىم جانە عىلىم سالاسىندا ەڭبەك ەتىپ جۇرگەن تانىمال تۇلعالار بارشا قازاقستاندىقتاردى ۇلتتىق مەرەكە — رەسپۋبليكا كۇنىمەن شىن جۇرەكتەن قۇتتىقتادى.
قازاقستاننىڭ ەڭبەك ەرى، كينو سالاسىنىڭ مايتالمانى ءاسانالى ءاشىموۆ قازاقستان حالقىن رەسپۋبليكا كۇنىمەن قۇتتىقتاپ، ونەر جولىندا جۇرگەن ازاماتتاردىڭ قوعامداعى ءرولى تۋرالى ايتتى.
«ءار ۋاقىتتا ۇلكەن مەيرام حالىق ءۇشىن قۋانىش. حالىققا جاساعان ەڭبەك، ونەر ادامدارىنىڭ حالىق ءۇشىن قىزمەتى ءار ۋاقىتتا قۇندى.
قۇت-بەرەكە كەلسىن. جاقسىلىق كەلسىن جانۇيالارىڭىزعا، تويلارىڭىز تويعا ۇلاسسىن. ۇلكەن تويدا، ۇلكەن جەتىستىككە جەتىڭىزدەر دەپ بۇكىل قازاقستان حالقىن قۇتتىقتايمىن!»
م.و.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى كەنجەحان ماتىجانوۆ بۇل كۇننىڭ ەل تاريحىنداعى ماڭىزىنا ەرەكشە توقتالدى:
«بۇل كۇن – ەلىمىزدىڭ مەملەكەتتىك ەگەمەندىگىن جاريالاعان اسا ماڭىزدى تاريحي ءسات. رەسپۋبليكا كۇنى وتكەنىمىز بەن بۇگىنىمىزدى، بولاشاعىمىزدى بايلانىستىراتىن ارداقتى مەرەكە. ەگەمەن ەلىمىزدىڭ تۇعىرى بيىك، كەلەشەك ۇرپاعىمىز باقىتتى بولسىن!»
قازاقستان جازۋشىلار وداعىنىڭ ءتوراعاسى مەرەكە قۇلكەنوۆ مەرەكەنىڭ تاريحي باستاۋى مەن الماتى قالاسىنىڭ رولىنە نازار اۋداردى:
«1990 جىلى 25 قازاندا قابىلدانعان دەكلاراسيا وسى الماتىدا جاريالانعان ەدى. بۇل تاۋەلسىزدىككە باستار العاشقى قادام بولدى. سوندىقتان الماتىلىقتار بۇل مەرەكەنى ەرەكشە ىقىلاسپەن قارسى الادى دەپ سەنەمىن. بارشا قازاقستاندىققا جارقىن بولاشاق پەن اماندىق تىلەيمىن».
قازاقستاننىڭ حالىق ءارتيسى رامازان ستامعازى قۇتتىقتاۋىندا بىرلىك پەن بەيبىتشىلىك تىلەدى:
«بۇگىنگى رەسپۋبليكا كۇنى قۇتتى بولسىن! تاۋەلسىز ەلىمىزدىڭ تۋى ءاردايىم بيىككە جەلبىرەپ، حالقىمىزدىڭ ەڭسەسى بيىكتەي بەرسىن. ەلىمىز امان، جۇرتىمىز تىنىش بولسىن، بىرلىگىمىز بەكەم بولسىن! بارشاڭىزعا زور دەنساۋلىق، وتباسىلارىڭىزعا شاتتىق پەن قۋانىش تىلەيمىن، بەيبىتشىلىك ومىردە ءارقاشان جاساي بەرەيىك».
ال ق ر ەڭبەك سىڭىرگەن قايراتكەرى جۇبانىش جەكسەن ۇلى مەرەكەنىڭ رۋحاني ءمانىن اتاپ ءوتتى:
«مارتەبەلى مەرەكە - رەسپۋبليكا كۇنى قۇتتى بولسىن! ەلىمىز امان، جۇرتىمىز تىنىش بولسىن! ەلدىڭ بەيبىت ءومىرى، جۇرتتىڭ ەركىن تىنىس-تىرشىلىگى جالعاسىن تابا بەرسىن. اۋىزبىرشىلىگىمىز نىعايا بەرسىن».
قازاقستاننىڭ حالىق ارتيستەرى التىنبەك قورازبايەۆ، دوسحان جولجاقسىنوۆ، اباي اتىنداعى وپەرا جانە بالەت تەاترىنىڭ ءسوليسى ولەگ تاتاميروۆ، سونىمەن قاتار ونەر جولىنا جاڭا قادام باسقان جاس ارتيستەر مەن زيالى قاۋىم وكىلدەرى رەسپۋبليكا كۇنىنىڭ ەل بىرلىگى مەن تاۋەلسىزدىك يدەياسىن ۇلىقتايتىن، حالىقتى ورتاق مۇددە مەن يگى تىلەككە ۇندەيتىن مەرەكە ەكەنىن اتاپ، وتانداستارىمىزدى مەرەكەمەن قۇتتىقتادى.