شەتەلدىك جانە وڭ جاق ءرولدى كولىكتەردى inDrive قىزمەتىنەن 2025 جىلعا دەيىن تولىق شىعارادى
قازاقستانداعى inDrive قىزمەتىنەن شەتەلدىك جانە وڭ جاق ءرولدى كولىكتەر 2025 جىلدىڭ باسىنا دەيىن تولىقتاي شىعارىلادى. بۇل تۋرالى كولىك ءمينيسترى مارات قارابايەۆ پەن سەرۆيستىڭ نەگىزىن قالاۋشى ارسەن تومسكيي اراسىنداعى كەزدەسۋدىڭ ناتيجەسىندە بەلگىلى بولدى. تاراپتار سونداي-اق اگرەگاتور، كولىك مينيسترلىگى جانە ىشكى ىستەر مينيسترلىگى اراسىنداعى جىلدامدىق رەجيمىنە قاتىستى مالىمەتتەر الماسۋ ماسەلەسىن تالقىلادى، دەپ حابارلايدى aqshamnews.kz
كەزدەسۋ بارىسىندا inDrive وكىلدەرى 1 ساۋىردەن باستاپ پلاتفورماسىندا وڭ جاق ءرولدى كولىكتەردى تىركەۋگە رۇقسات بەرىلمەيتىنىن مالىمدەدى. سونىمەن قاتار، كولىك مينيسترلىگى مەن ىشكى ىستەر مينيسترلىگىمەن جاسالعان مەموراندۋمعا سايكەس، 2025 جىلدىڭ 1 قاڭتارىنان باستاپ بۇرىن تىركەلگەن «وڭ جاق ءرولدى» كولىك جۇرگىزۋشىلەرى سەرۆيسىنەن شىعارىلادى. مۇنداي شەكتەۋلەر شەتەلدىك كولىكتەردىڭ يەلەرىنە دە قاتىستى بولادى.
ءوز كەزەگىندە قارابايەۆ جولاۋشىلار تاسىمالىنىڭ ءقاۋىپسىز، باسەكەگە قابىلەتتى جانە وركەنيەتتى نارىعىن قۇرۋدىڭ ماڭىزدىلىعىن اتاپ ءوتتى. وسى تۇرعىدا ۆەدومستۆو باسشىسى تاكسي قىزمەتىنە قويىلاتىن نەگىزگى تالاپتاردى ەسكە سالدى:
- جۇرگىزۋشىلەر رەيس الدىنداعى مەديسينالىق تەكسەرۋدەن ءوتۋى، ەڭبەك جانە دەمالىس رەجيمىن، سونداي-اق جىلدامدىق رەجيمىن ساقتاۋى ءتيىس؛
- تاكسي قىزمەتىنە پايدالانىلاتىن كولىك قازاقستاندا تىركەلۋى جانە جىلىنا ەكى رەت تەحنيكالىق تەكسەرۋدەن ءوتۋى كەرەك.
سونىمەن قاتار، كولىك مينيسترلىگى قالاارالىق تاسىمالداۋ ءۇشىن شەكتەۋلەر ەنگىزۋ ماسەلەسى تالقىلاۋ ساتىسىندا ەكەنىن اتاپ ءوتتى. ۆەدومستۆو اقپارات جيناۋدى جالعاستىرىپ، تاكسي كومپانيالارىمەن كەلىسسوزدەر جۇرگىزۋدە.
30 شىلدەدە ۇكىمەتتەگى بريفينگتە مارات قارابايەۆ ۆەدومستۆونىڭ تاكسي اگرەگاتورلارىنا ۇزاق قاشىقتىققا جۇرۋگە تىيىم سالعىسى كەلەتىنىن مالىمدەدى. كەيىننەن inDrive كومپانياسى قالاارالىق تاسىمالداۋلاردىڭ ىڭعايلى ەكەنىن ايتىپ، كولىك مينيسترلىگىنەن بۇل ماسەلەنى بارلىق تاراپپەن تالقىلاۋدى سۇرادى.
كەيىننەن، سىن-پىكىرلەر تولقىنىنان كەيىن، كولىك مينيسترلىگى تاكسيلەرگە قالاارالىق تاسىمالداۋلارعا تىيىم سالۋ تۋرالى قوعامدىق تىڭداۋلار وتەتىنىن مالىمدەدى. سونداي-اق، مينيسترلىكتىڭ جوسپارى بويىنشا، «ياندەكس.تاكسي» جانە InDrive جۇرگىزۋشىلەرىن كۇندەلىكتى Face ID جانە مەديسينالىق تەكسەرۋدەن وتۋگە مىندەتتەمەك.