الماتىدا جول قوزعالىسى ەرەجەلەرىنىڭ ساقتالۋىن قامتاماسىز ەتۋ جانە بالالار مەن جاياۋ جۇرگىنشىلەردىڭ قاۋىپسىزدىگىن ۇيىمداستىرۋ ماقساتىندا پروفيلاكتيكالىق ءىس-شارالار جۇرگىزىلۋدە، دەپ حابارلايدى aqshamnews.kz
وڭىرلىك كوممۋنيكاسيالار قىزمەتىنىڭ بريفينگىندە الماتى قالاسى پوليسيا دەپارتامەنتىنىڭ رەسمي وكىلى سالتانات ازىربەك جىل باسىنان بەرى قالادا بالالاردىڭ قاتىسۋىمەن 623 جول-كولىك وقيعاسى تىركەلگەنىن حابارلادى.
سالتانات ازىربەك اتا-انالاردى بالالارىنا جولدى دۇرىس كەسىپ ءوتۋدى ۇيرەتۋگە جانە ساموكاتتار مەن موپەدتەردى جۇرگىزۋگە جول بەرمەۋگە شاقىردى. سونىمەن قاتار، ەرەسەكتەردىڭ وزدەرى دە بالالارعا دۇرىس ءجۇرىپ-تۇرۋدىڭ ۇلگىسىن كورسەتۋ كەرەكتىگىن اتاپ ءوتتى.
“ءاربىر اتا-انا كامەلەتكە تولماعان بالالارعا ەلەكترلىك ساموكاتتاردى، موپەدتەردى جانە سكۋتەرلەردى مىنۋگە رۇقسات بەرەر الدىندا بالانىڭ قاۋىپسىزدىگى، دەنساۋلىعى مەن ءومىرى تۋرالى ويلانعانى ءجون. ءجاسوسپىرىم كولىك جۇرگىزۋ داعدىلارىنسىز، قاۋىپسىزدىك نورمالارى مەن جول قوزعالىسى ەرەجەلەرىن ساقتاماي، وزىنە دە، باسقالارعا دا ءقاۋىپ ءتوندىرۋى مۇمكىن. مۇنداي ابايسىزدىقتىڭ باعاسى ءسىزدىڭ بالاڭىزدىڭ دەنساۋلىعى نەمەسە ءومىرى بولۋى مۇمكىن ەكەنىن ەستەن شىعارماڭىزدار،” - دەدى ول.
سونىمەن قاتار، ول زاڭعا سايكەس 16 مەن 18 جاس ارالىعىنداعى كامەلەتكە تولماعاندارعا جول بويىندا ەلەكتر ساموكاتتاردى جۇرگىزۋگە تىيىم سالىناتىنىن ەسكە سالدى. بۇل ءۇشىن اقبتك-نىڭ 620-بابى بويىنشا اكىمشىلىك جاۋاپكەرشىلىك كوزدەلگەن. زاڭدى وكىلدەر ق ر اقبتك-نىڭ 127-بابى بويىنشا اكىمشىلىك جاۋاپكەرشىلىككە تارتىلادى.
الماتى پوليسياسى كولىكتىڭ بالامالى تۇرلەرىن باسقاراتىن ادامدار، ونىڭ ىشىندە كامەلەتكە تولماعاندار اراسىندا ءتۇسىندىرۋ جۇمىستارىن جالعاستىرۋدا. الماتىدا جىل باسىنان بەرى موپەدتەردىڭ قاتىسۋىمەن 359 جول-كولىك وقيعاسى ورىن الىپ، 364 ادام جاراقاتتانىپ، 6 ادام قايتىس بولعان. ەلەكتر ساموكاتتارىنىڭ قاتىسۋىمەن 47 اپات ورىن الىپ، 51 ادام جاراقات العان.
جىل باسىنان بەرى جول قوزعالىسى ەرەجەلەرىن بۇزعانى ءۇشىن 15 مىڭنان استام موپەد جۇرگىزۋشىلەرى جانە ساموكات تىزگىندەگەن 12 مىڭنان استام ادام اكىمشىلىك جاۋاپكەرشىلىككە تارتىلعان.