ولجاس بەكتەنوۆ CITIC Group باسشىسى سي گوحۋامەن بىرلەسكەن ينفراقۇرىلىم جوبالارىن ىسكە اسىرۋ قارقىنىن تالقىلادى، دەپ حابارلايدى اlmaty-akshamy.kz.
قازاقستان پرەمەر-مينيسترى ولجاس بەكتەنوۆ CITIC Group ديرەكتورلار كەڭەسىنىڭ ءتوراعاسى سي گوحۋامەن كەزدەسۋدە قازاق-قىتاي بىرلەسكەن جوبالارىن ىسكە اسىرۋ جانە ەنەرگەتيكا مەن ونەركاسىپ سالالارىنداعى ىنتىماقتاستىقتى نىعايتۋ ماسەلەلەرىن تالقىلادى.
قازىرگى ساتتە قىتايلىق كومپانيانىڭ قاتىسۋىمەن رەسپۋبليكالىق ماڭىزى بار اۆتوجولداردى رەكونسترۋكسيالاۋ بويىنشا ءىرى ينفراقۇرىلىم جوبالارى ىسكە اسىرىلۋدا. اتاپ ايتقاندا، جالپى ۇزىندىعى 1 131 كم بولاتىن «تالدىقورعان – وسكەمەن» جانە «قاراعاندى – بالقاش» تراسسالارىنىڭ 24 ۋچاسكەسىندە قۇرىلىس-مونتاج جۇمىستارى جۇرگىزىلۋدە.
بۇگىنگى تاڭدا «تالدىقورعان – وسكەمەن» اۆتوجولىندا 768 كم-دىڭ 748 شاقىرىمىندا تومەنگى جابىن قاباتى بويىنشا قوزعالىس اشىلدى، جول جابىنىنىڭ جوعارعى قاباتى بويىنشا قالعان جۇمىس 48%-دى قۇرايدى؛ «قاراعاندى – بالقاش» تراسساسى بويىنشا بارلىق 363 كم بويى جابىننىڭ تومەنگى قاباتى بويىنشا قوزعالىس اشىق، جول جابىنىنىڭ جوعارعى قاباتى بويىنشا قالعان جۇمىس 49%-دى قۇرايدى.
سونىمەن قاتار جول ينفراقۇرىلىمىن ودان ءارى جاڭعىرتۋ جونىندەگى امبيسيالىق ماقساتتاردى ەسكەرە وتىرىپ، تاراپتار «CASPI BITUM» بك» ج ش س زاۋىتىنىڭ قۋاتىن جىلىنا 750 مىڭ تونناعا دەيىن ۇلعايتۋ جوباسىن ىسكە اسىرۋ بارىسىن قارادى. اتالعان جوبانى ىسكە اسىرۋ قۇرىلىس ماۋسىمى قىزاتىن كەزەڭدە بيتۋمعا دەگەن قاجەتتىلىكتى جابادى.
ماسەلەنى تالقىلاۋ بارىسىندا كەزدەسۋگە قاتىسۋشىلار اۋىل شارۋاشىلىعى، تازا ەنەرگەتيكا، قورشاعان ورتانى قورعاۋ جانە سيفرلىق تەحنولوگيالار سالاسىنداعى ىنتىماقتاستىقتى دامىتۋعا دايىن ەكەندىكتەرىن اتاپ ءوتتى.
ايتا كەتۋ كەرەك، «CITIC Group» كورپوراسياسى 1979 جىلى قۇرىلعان. CITIC Group قازاقستاندا ەنەرگەتيكا، حيميا ونەركاسىبى، قارجى، ينفراقۇرىلىم جانە باسقا دا سالالارداعى جوبالاردى ىسكە اسىرادى.