قازاقستان شامامەن قۇنى 190 ميلليون دوللار بولاتىن 85 تاۋار بويىنشا ەكسپورتتى ارتتىرۋعا دايىندىق جۇرگىزىپ جاتىر.
پرەمەر-مينيستر ولجاس بەكتەنوۆتى تاجىكستانعا ساپارى اياسىندا سول ەلدىڭ پرەزيدەنتى ەمومالي راحمون قابىلدادى. كەزدەسۋدە ساۋدا جانە ينۆەستيسيالار، ونەركاسىپ، اۋىل شارۋاشىلىعى جانە كولىك بايلانىسى، سونداي-اق سۋ-ەنەرگەتيكالىق سالالارى بويىنشا ءسوز قوزعالدى، دەپ حابارلايدى Almaty-akshamy.kz 24.kz-كە سىلتەمە جاساپ.
دەلەگاسيالار ونەركاسىپ كووپەراسياسىن دامىتۋدىڭ ماڭىزدىلىعىنا توقتالىپ، ەكسپورتقا باعدارلانعان جاڭا بىرلەسكەن وندىرىستەر قۇرۋدىڭ وزەكتىلىگىن اتاپ ءوتتى. تاجىكستان اۋماعىندا كەن ورىندارىن بىرلەسىپ يگەرۋ جانە جوبالاردى جۇزەگە اسىرۋ مۇمكىندىگى قاراستىرىلدى. ىنتىماقتاستىقتىڭ جاڭا باعىتتارى قاتارىندا سيفرلاندىرۋ سالاسى بار. ۋاعدالاستىقتاردى جۇزەگە اسىرۋ شەڭبەرىندە قازاقستان تاجىكستانعا ەلەكتروندىق ۇكىمەتتىڭ مەنشىكتى ۇلتتىق جۇيەلەرىن ورىستەتۋگە كومەكتەسۋى بويىنشا جۇمىستار باستالدى. جالپى ءقازىر ەكى ەل ۇكىمەتتەرى الدىنا تاۋار اينالىمىن 2 ەسەگە، ياعني 2 ميلليارد دوللارعا دەيىن ارتتىرۋ مىندەتى قويىلدى.