پرەمەر-مينيستر ولجاس بەكتەنوۆ ەلەكتر موپەدتەرى مەن ساموكاتتاردى قولدانۋعا قاتىستى باقىلاۋدى كۇشەيتۋدىڭ ماڭىزدىلىعىنا توقتالدى.
ونىڭ ايتۋىنشا، بۇل كولىك تۇرلەرى قوعامدىق كولىكتەرگە تۇسەتىن جۇكتەمەنى بەلگىلى ءبىر دەڭگەيدە ازايتقانىمەن، جول ەرەجەلەرىن ساقتاماۋ سالدارىنان تۇرعىندارعا قولايسىزدىق تۋعىزىپ، قوزعالىس قاۋىپسىزدىگىنە قاتەر ءتوندىرىپ وتىر.
- جىل باسىنان بەرى ەلەكتروساموكاتتاردىڭ قاتىسۋىمەن 360-تان استام جول-كولىك وقيعاسى تىركەلگەن.
- مەملەكەت باسشىسى جولداۋىندا وسى وزەكتى ماسەلەگە ەرەكشە نازار اۋدارعان بولاتىن.
- الەمدىك تاجىريبە كورسەتكەندەي، ءبىرقاتار ەلدەردە مۇنداي كولىكتەرگە تولىق تىيىم سالۋ نەمەسە قاتاڭ شەكتەۋلەر ەنگىزۋ شارالارى قابىلدانعان.
ماسەلەن، پاريجدە 2023 جىلدىڭ قىركۇيەگىنەن باستاپ ساموكاتتاردى جالعا الۋ توقتاتىلىپ، تەك جەكە مەنشىك كولىكتى پايدالانۋعا رۇقسات ەتىلگەن. مادريدتە دە وتكەن جىلدىڭ قازانىنان وسىنداي شەشىم قابىلداندى. ال ۇلىبريتانيادا ءاربىر ەلەكتروساموكاتقا مەملەكەتتىك ءنومىر بەرىلىپ، ونى تەك جۇرگىزۋشى كۋالىگى بار ازاماتتار عانا باسقارا الادى.
«ىشكى ىستەر مينيسترلىگى زاڭناماعا ءتيىستى تۇزەتۋلەردى جەدەل ەنگىزۋى ءتيىس. بۇگىن ءبىز وسى ماسەلە بويىنشا ۇكىمەتتىڭ قورىتىندىسىن قابىلدايمىز»، — دەدى ولجاس بەكتەنوۆ.
سونىمەن بىرگە، ول ادام ءومىرى مەن دەنساۋلىعىن قورعاۋ كۇرە جولدارداعى قاۋىپسىزدىكتى قامتاماسىز ەتۋدىڭ باستى باعىتى بولىپ قالا بەرەتىنىن اتاپ ءوتتى.