سوڭعى ەكى جىلدا بۇل باسپادان 54 ەڭبەك جارىق كورگەن.
قازاقستان مۇسىلماندارى ءدىني باسقارماسىنىڭ «MUFTIYAT» باسپاسىنان جارىق كورگەن ءتورت كىتاپ جۇرتشىلىققا تانىستىرىلدى، دەپ حابارلايدى Almaty-akshamy.kz قمدب باسپا ءسوز قىزمەتىنە سىلتەمە جاساپ.
سالتاناتتى راسىمگە باس ءمۇفتي ناۋرىزباي قاجى تاعان ۇلى باستاعان ءمۇفتيات ۇجىمى قاتىسىپ، وقىرمانعا جول تارتقان «جانناتپەن سۇيىنشىلەنگەن 10 ساحابا»، «تابىس تەورياسى (مۇسىلمان موتيۆاسياسى)»، «رامازان ورازاسىنا قاتىستى ءپاتۋالار» جانە «ورازا (ادەبى، مىندەتتەرى، پايداسى مەن ارتىقشىلىقتارى)» كىتاپتارىمەن تانىستى.
«ءدىني باسقارما ءارقاشان كىتاپ شىعارۋ مەن باسپا قىزمەتىنە ۇدايى كوڭىل ءبولىپ كەلەدى. سوڭعى ەكى جىل ىشىندە ءتول باسپامىزدان 54 ەڭبەك جارىق كوردى. اتاپ ايتساق، «MUFTIYAT» باسپاسىنان 11 قۇران جانە ءتاپسىر، 9 عىلىمي جانە تاريح كىتاپتارى، 3 پايعامبارىمىز (وعان اللانىڭ سالاۋاتى مەن سالەمى بولسىن) تۋرالى، 13 قوعامعا قاتىستى كىتاپتار، سونداي-اق وتباسىعا قاتىستى 4 جانە 14 شاريعات كىتاپتارى وقىرمانعا جول تارتتى. بۇگىن تانىتىمى ءوتىپ وتىرعان ءتورت كىتاپ تا وقىرماندار ءۇشىن پايدالى، رۋحاني ازىق بولادى دەگەن سەنىمدەمىن. وسى كىتاپتاردىڭ جارىق كورۋىنە اتسالىسقان ازاماتتارعا، باسپا ديرەكتورى مۇرات ماناپ ۇلى مەن ۇجىمىنا العىسىمدى بىلدىرەمىن» دەدى باس ءمۇفتي ناۋرىزباي قاجى تاعان ۇلى.
