23 ناۋرىزدا الماتىداعى پەرزەنتحانالاردىڭ بىرىندە 34 اپتادا سيرەك كەزدەسەتىن تۋا بىتكەن پاتولوگيامەن ۇل بالا دۇنيەگە كەلدى. ءسابيدىڭ موينىنىڭ وڭ جاق جارتىسىندا ۇلكەن كيستوزدى ليمفانگيوماسى بولعان. ونىمەن قوسا تىنىس الۋ جانە جۇرەك-قان تامىرلارى جەتكىلىكسىزدىگى دە ىسىكتىڭ اسقىنۋىنا سەبەپ بولعان.
نارەستەنىڭ سالماعى 3844 گ، بويى 46 سم بولىپ تۋىلدى. بالانى ەمحانانىڭ نەوناتولوگيالىق بريگاداسى كەسار تىلىگىنەن كەيىن بىردەن جاساندى تىنىس الۋ اپپاراتىنا قوسىپ، الماتى قالاسىنىڭ بالالارعا جەدەل مەديسينالىق كومەك كورسەتۋ ورتالىعىنا جەتكىزدى.
بالا وتە اۋىر جاعدايدا كەلىپ ءتۇستى. ءومىر ءسۇرۋ كورسەتكىشتەرى باقىلاۋعا الىنىپ، شۇعىل كومەكتى تالاپ ەتتى. ۋلترادىبىستىق زەرتتەۋ دەرەكتەرى بويىنشا، قۇرساقىشىلىك كەزەڭدە ولشەمى 12 سم-گە جۋىق ءتۇزىلىس بار دەگەن دياگنوز قويىلعان. ول دەگەنىمىز بوسانۋ كەزىندەگى ەرەكشە اكۋشەرلىك جانە حيرۋرگيالىق ءتاسىلدى قاجەت ەتەدى دەگەن ءسوز.
24 ناۋرىزدا بالالار جەدەل جاردەم ءبولىمىنىڭ دارىگەرلەرى ىسىك ءتارىزدى تۇزىلىسكە پۋنكسيا جاساپ، 500 مل-دەن استام سۇيىقتىقتى الىپ تاستادى. بۇل تۇنشىعۋ ءقاۋپىن ازايتۋعا كومەكتەستى. بالانىڭ جاعدايىن ءبولىم مەڭگەرۋشىسى ۇلىقپان بولاتبەك ۇلى السەيىتوۆ باقىلاۋعا الدى. ءسابيدى بالالارعا شۇعىل مەديسينالىق كومەك كورسەتۋ ورتالىعىنىڭ جاڭا تۋعان نارەستەلەر جانساقتاۋ بولىمىنە جاتقىزىپ، وتا جاساۋعا دايىندادى.
26 ناۋرىزدا ليمفانگيومانى تۇبەگەيلى الىپ تاستاۋ وپەراسياسى جاسالدى. وپەراسيانى بالالار حيرۋرگى مىرزاحمەت ساماتبەك ءابدىلماناپ ۇلى مەن اسسيستەنت كۇنيازوۆ جالعاس قايىربەك ۇلى ەندوتراحەالدى انەستەزيامەن جاسادى. نەوناتولوگ، حيرۋرگ جانە انەستەزيولوگتاردىڭ ۇيلەسىمدى جۇمىسىنىڭ ارقاسىندا وتا ءساتتى ءوتتى.
بالا تاعى ءۇش اپتا بويى جانساقتاۋ بولىمىندە دارىگەرلەردىڭ باقىلاۋىندا بولدى. كەيىن قاناعاتتانارلىق جاعدايدا ۇيگە شىعارىلدى.
الماتى قالاسىنىڭ بالالارعا جەدەل مەديسينالىق كومەك كورسەتۋ ورتالىعىنىڭ ۇجىمى ءۇشىن بۇل كۇردەلى تۋا بىتكەن پاتولوگياسى بار جاڭا تۋعان نارەستەنىڭ ءومىرى ءۇشىن كۇرەستەگى كەزەكتى جەڭىسى. وپەراسيادان كەيىن تىگىستەر جازىلىپ، ۋاقىت وتە كەلە مۇلدەم كورىنبەيتىن بولادى. ال بالا قۇرداستارىمەن بىردەي ءوسىپ، داميدى.