الماتىداعى كارديولوگيا جانە ىشكى اۋرۋلار عىلىمي-زەرتتەۋ ينستيتۋتىندا جۇرەك-قان تامىرلارى حيرۋرگياسى سالاسىنداعى جەتەكشى ساراپشى، كارولينسك ينستيتۋتىنىڭ (ستوكگولم، شۆەسيا) پروفەسسورى ناۋزاد سالەحتىڭ جەتەكشىلىگىمەن شەبەرلىك كلاسى ءوتىپ، 7 پاسيەنتكە قولقا قاقپاقشاسىن ەندوۆاسكۋليارلىق اۋىستىرۋ بويىنشا كۇردەلى وپەراسيالار جاسالدى.
مۇنداي از ءينۆازيۆتى حيرۋرگيالىق ارالاسۋلار اشىق وپەراسيالار جاساۋعا بولمايتىن اۋىر جۇرەك قان تامىرلارى اۋرۋلارى بار ناۋقاستارعا جاسالادى.
ناۋقاستاردىڭ ءبىرى – 87 جاستاعى ميحايل فەدوروۆيچ قولقا قاقپاقشاسىنىڭ اۋىر ستەنوزىنا شالدىققان. ونى جۇرەك تۇسىنداعى اۋىرسىنۋ، تىنىشتىقتا دا پايدا بولاتىن جۇرەك سوعىسى، ەنتىگۋ، باس اۋرۋى مازالاعان. ول دياگنوزىن ءبىر جىل بۇرىن ەنتىگۋ كۇشەيگەن كەزدە بىلگەن.
«كارديولوگيا جانە ىشكى اۋرۋلار عزي الماتىدا قولقا قاقپاقشاسىن ەندوۆاسكۋليارلىق يمپلانتاسيالاۋ بويىنشا جوعارى تەحنولوگيالى وپەراسيانى دامىتۋدىڭ باسىندا تۇر. TAVI - ەڭ قىمبات وپەراسيالاردىڭ ءبىرى، ءبىراق پاسيەنتتەر ءۇشىن تەگىن. ءبىز حالىققا جوعارى بىلىكتى كارديوحيرۋرگيالىق كومەك كورسەتۋدى جاقسارتۋ بويىنشا ۇزدىكسىز جۇمىس جۇرگىزۋدەمىز. كلينيكانىڭ ينتەرۆەنسيالىق كارديولوگتارىنىڭ جوعارى كاسىبي شەبەرلىگى ەڭ كۇردەلى وپەراسيالاردى جاساۋعا مۇمكىندىك بەرەدى»، – دەيدى باسقارما ءتوراعاسى مارات پاشيموۆ.
ينستيتۋتتىڭ رەنتگەنەندوۆاسكۋليارلىق بلوگ مەڭگەرۋشىسى الەكسەي كولەسنيكوۆتىڭ ايتۋىنشا، بارلىق مانيپۋلياسيالار قان تامىرىنا ەنگىزىلگەن كاتەتەر ارقىلى جۇزەگە اسىرىلادى. ميترالدى قاقپاقشاعا وپەراسيا جاساۋ جۇرەك قاقپاقشاسى مەن جۇرەكتىڭ جۇمىسىن قالپىنا كەلتىرۋگە، ەنتىگۋ، شارشاۋ، جۇرەك ىرعاعىنىڭ بۇزىلۋى، اياقتىڭ ءىسىنۋى سياقتى بەلگىلەردى ازايتۋعا جانە ناۋقاستاردىڭ ءومىرىن ۇزارتۋعا كومەكتەسەدى. مۇنداي وپەراسيالار كوپتەگەن ادام ءومىرىن ساقتاپ قالادى.
پروفەسسور سالەح كلينيكانىڭ ينتەرۆەنسيالىق كارديولوگتارىمەن ءوز ءبىلىمى مەن تاجىريبەسىمەن ءبولىستى، بۇل قولقا قاقپاقشاسىن اۋىستىرۋدى قاجەت ەتەتىن پاسيەنتتەرگە مەديسينالىق كومەك كورسەتۋ دەڭگەيىن ايتارلىقتاي ارتتىرۋعا مۇمكىندىك بەرەدى. ول ينستيتۋت ماماندارىنىڭ جوعارى بىلىكتىلىگىن، بارلىعى ءوز ءىسىن جاقسى بىلەدى دەپ اتاپ ءوتتى.