كارديولوگيا جانە ىشكى اۋرۋلار ۇلتتىق عىلىمي-زەرتتەۋ ينستيتۋتىندا كارولينسك ينستيتۋتىنىڭ (شۆەسيا، ستوكگولم) جۇرەك-قان تامىرلارى حيرۋرگياسى سالاسىنداعى جەتەكشى ساراپشىسى، پروفەسسور ناۋزاد سالەحتىڭ جەتەكشىلىگىمەن ماستەر-كلاسس ءوتتى.
شۆەدتىك پروفەسسوردىڭ قاتىسۋىمەن 7 پاسيەنتكە اورتالىق قاقپاقشانى ەندوۆاسكۋليارلى جولمەن كۇردەلى الماستىرۋ وپەراسيالارى ءساتتى جۇرگىزىلدى، دەپ حابارلايدى aqshamnews.kz.
مۇنداي از ءينۆازيۆتى وپەراسيالار جۇرەك-قان تامىرلارى اۋرۋلارى اۋىر فورمادا وتەتىن، اشىق جۇرەك وپەراسياسىنا قارسى كورسەتىلىمى بار پاسيەنتتەرگە جاسالادى.
پاسيەنتتەردىڭ ءبىرى – 87 جاستاعى ميحايل ءفودوروۆيچ اورتالىق قاقپاقشانىڭ كريتيكالىق ستەنوزىمەن اۋرۋحاناعا ءتۇستى. ونى جۇرەك تۇسىنداعى قىساتىن اۋىرسىنۋ، ءتىپتى تىنىش كۇيدە پايدا بولاتىن جۇرەك سوعىسىنىڭ جيىلەۋى، ەنتىگۋ مەن باس اۋرۋى مازالاعان.
جوعارى تەحنولوگيالى مەديسينانىڭ ارقاسىندا ميحايل ءفودوروۆيچ سياقتى ەگدە جاستاعى پاسيەنتتەر كۇردەلى جۇرەك پاتولوگياسىمەن ءومىر سۇرۋگە جاڭا مۇمكىندىك الىپ، وپەراسيادان كەيىنگى قالپىنا كەلۋ كەزەڭى دە جىلدام وتۋدە.
پروفەسسور سالەح كلينيكانىڭ ينتەرۆەنسيالىق كارديولوگتارىمەن ءوز بىلىمىمەن جانە تاجىريبەسىمەن ءبولىسىپ، اورتالىق قاقپاقشانى الماستىرۋدى قاجەت ەتەتىن پاسيەنتتەرگە كورسەتىلەتىن مەديسينالىق كومەكتىڭ ساپاسىن ارتتىرۋعا ىقپال ەتتى.