مينيسترلىك ەلدەگى قۇرىلىس ماتەريالدارىنىڭ قىمباتتاۋىنا قاتىستى تۇسىنىكتەمە بەردى

قابىلدانىپ جاتقان شارالار ەلدەگى تۇرعىن ءۇي جانە ونەركاسىپ قۇرىلىسىنىڭ قارقىنىن تومەندەتپەۋگە مۇمكىندىك بەرەدى

قالىپتاسقان گەوساياسي جاعدايعا بايلانىستى تۋىنداعان كولىك-لوگيستيكالىق داعدارىس اياسىندا بيىل باسقا ەلدەردەگىدەي قازاقستاندا دا وبەكتىلەر قۇرىلىسىنىڭ قىمباتتاۋى جانە قۇرىلىس ماتەريالدارىن جەتكىزۋشىلەردىڭ الىپساتارلىق ارەكەتتەرىنىڭ ءوسۋى وزەكتى ماسەلە بولىپ وتىر. بۇل تۋرالى ييدم باسپا ءسوز قىزمەتى مالىمدەدى، دەپ حابارلايدى Almaty-akshamy.kz.

«وسىعان بايلانىستى ىشكى نارىقتىڭ قۇرىلىس ماتەريالدارىنا دەگەن قاجەتتىلىگىن قاناعاتتاندىرۋ، سونداي-اق يمپورتقا تاۋەلدىلىكتى تومەندەتۋ جانە باعانىڭ اۋىتقۋىن بولدىرماۋ ءۇشىن 2025 جىلعا دەيىن 15،7 مىڭنان استام جاڭا جۇمىس ورىندارىن اشىپ، 157 ينۆەستيسيالىق جوبانى ىسكە اسىرۋ ۇسىنىلدى. قازىرگى ۋاقىتتا وڭىرلەردەگى اكىمدىكتەرىمەن، دامۋ ينستيتۋتتارىمەن جانە «اتامەكەن» ۇكپ-مەن كەلىسە وتىرىپ قۇرىلىس يندۋسترياسى جوبالارىن 2025 جىلعا دەيىن ەگجەي-تەگجەيلى ىسكە اسىرۋ جونىندەگى جول كارتاسى ازىرلەنىپ، بەكىتىلدى»، - دەلىنگەن حابارلامادا.

سونىمەن قاتار يندۋستريا جانە ينفراقۇرىلىمدىق دامۋ مينيسترلىگى «Samruk-Kazyna Construction» اق-مەن بىرلەسىپ، يمپورتتى الماستىراتىن 35 جوبا ىرىكتەپ الدى. 

اتالعان جوبالاردى ىسكە اسىرۋ سانتەحكەراميكا، جىلۋ وقشاۋلاعىش ماتەريالدار، بولمەلەر اراسىنداعى ەسىكتەر، دسپ، شىنى، كەراميكالىق پليتكالار، ەدەن جابىندارى جانە باسقا دا سۇرانىسقا يە قۇرىلىس ماتەريالدارى ساناتىنداعى يمپورت ۇلەسىن تومەندەتۋگە مۇمكىندىك بەرەدى.

سونداي-اق مينيسترلىك بيۋدجەت قاراجاتى ەسەبىنەن سالىنىپ جاتقان وبەكتىلەر قۇرىلىسىنىڭ قىمباتتاۋىنىڭ الدىن الۋ ءۇشىن قادامدار جاسادى. ماسەلەن، قۇرىلىس رەسۋرستارى قۇنىنىڭ ەلەۋلى اۋىتقۋىنا جەدەل دەن قويۋ ماقساتىندا ۆەدومستۆو قۇرىلىس ماتەريالدارىنىڭ وزەكتى سمەتالىق باعالارىنىڭ جيناقتارى شىعارىلۋدا. بۇل بيۋدجەتتىك وبەكتىلەردىڭ اياقتالماعان قۇرىلىس كولەمىنىڭ ۇلعايىپ كەتۋ تاۋەكەلىن تومەندەتۋگە مۇمكىندىك بەرەدى.

ورىن الىپ جاتقان پروسەستەرگە بايلانىستى قازاقستاندا مەملەكەتتىك ينۆەستيسيالار ەسەبىنەن سالىنىپ جاتقان 286 نىساننىڭ قۇرىلىسى توقتاتىلعانىن اتاپ وتكەن ءجون. 84 جاعداي بويىنشا قۇرىلىس جۇمىستارى جوبالاردىڭ قىمباتتاۋىنا بايلانىستى توقتاپ قالعانى انىقتالدى.
قۇرىلىس سالاسىن تۇراقتى مونيتورينگىلەۋ نىسانداردى قارجىلاندىرۋ كەزىندە جەرگىلىكتى اتقارۋشى ورگانداردىڭ جۇيەسىز ءىس-قيمىلى وسىنداي قىمباتتاۋدىڭ بىردەن ءبىر سەبەبى بولىپ تابىلاتىنىن كورسەتەدى. ءبىر نىساندى اياقتاماي، ولار تاعى بىرنەشە جوبانى جۇزەگە اسىرۋعا كىرىسەدى جانە وسى قاراجات شەگىندە قۇرىلىستىڭ اياقتالۋ مەرزىمىن ۇزارتادى. بۇل مەردىگەرلەردىڭ ءوز مىندەتتەمەلەرىن تولىقتاي ورىنداماي، قۇرىلىس جۇمىستارىنىڭ توقتاۋىنا اكەپ سوعادى. وتكەن جىلى قۇرىلىس رەسۋرستارى قۇنىنىڭ وسۋىنە بايلانىستى وڭىرلەردىڭ اكىمدىكتەرى 641 جوبا بويىنشا قۇرىلىس قۇنىن تۇزەتۋ بويىنشا ءوتىنىش بىلدىرگەن.

وسىعان بايلانىستى ييدم قارجى مينيسترلىگىنە قارجىلاندىرۋ مەرزىمدەرىن ورىنداۋ بولىگىندە جاۋاپكەرشىلىك شارالارىن قاتاڭداتۋدى، سونداي-اق جوبالاردى تۇزەتۋدى جەڭىلدەتۋ بولىگىندە مەملەكەتتىك اۋديت جۇرگىزۋ مەرزىمدەرىن ناقتىلاۋدى ۇسىندى.

قابىلدانىپ جاتقان شارالار ەلدەگى تۇرعىن ءۇي جانە ونەركاسىپ قۇرىلىسىنىڭ قارقىنىن تومەندەتپەۋگە مۇمكىندىك بەرەدى.

انىقتاما: 2022 جىلى 15،1 ملن شارشى مەتر جاڭا تۇرعىن ءۇي سالۋ جوسپارلانعان. 2022 جىلدىڭ 2 ايىندا 1،8 ملن شارشى مەتر تۇرعىن ءۇي پايدالانۋعا بەرىلدى. 2021 جىلدىڭ ۇقساس كەزەڭىمەن سالىستىرعاندا 13 وڭىردە تۇرعىن ءۇيدى پايدالانۋعا بەرۋ كولەمىنىڭ ۇلعايۋى بايقالادى. ەڭ جوعارى ءوسىم بايقالاتىن وڭىرلەر: پاۆلودار (191،1%)، سولتۇستىك قازاقستان (146،3%)، تۇركىستان (139،5%)، الماتى (125،2%) جانە اقمولا (113،8%) وبلىستارىندا، سونداي-اق الماتى قالاسى (110،5%). 2022 جىلى تۇرعىن ءۇي قۇرىلىسى سالاسىنا 2،4 ترلن تەڭگە ينۆەستيسيالار تارتۋ جوسپارلانىپ وتىر.