كۇندەلىكتى بەلسەندىلىكتى كوبەيتۋدىڭ ەڭ وڭاي جولى - كوبىرەك جاياۋ ءجۇرۋ. وليمپيادالىق چەمپيوننىڭ ويلاپ تاپقان ءادىسىنىڭ ناتيجەسى وڭ بولىپ شىقتى. دجەففينگ دەگەن نە؟ ونىڭ دەنساۋلىققا پايداسى قانداي؟ بۇل تۋرالى "دوكتور پيتەر" باسىلىمىندا ايتىلدى، - دەپ حابارلايدى اqshamnews.kz ءتىلشىسى.
دجەففينگ - جۇگىرۋ مەن ءجۇرۋدى الماستىرىپ وتىراتىن جاتتىعۋ ءتاسىلى. ونى وليمپياداعا قاتىسقان جەلاياق دجەفف گەللوۋەي ۇسىنعان. بۇل ەرەكشە ءتاسىل جۇگىرۋ قاشىقتىعىن بىرتىندەپ ارتتىرۋعا، جاراقاتتان ساقتانۋعا جانە جاتتىعۋدان ءلاززات الۋعا كومەكتەسەدى.
ءادىستىڭ ەرەكشەلىگى - جۇگىرۋ مەن ءجۇرۋدى كەزەكپەن ورىنداۋ. ەكى مينۋت جۇگىرىپ، ءۇش مينۋت جاياۋ ءجۇرۋ، وسىلاي بىرنەشە اينالىم جاساپ، تولىققاندى جاتتىعۋ قۇرالادى. بۇل ءتاسىل توزىمدىلىكتى اسىقپاي دامىتادى. جاڭادان باستاعاندار كوبىنە بىردەن قاتتى قارقىن الىپ، قاتتى شارشاپ، كەيىن مۇلدە جۇگىرگىسى كەلمەي قالادى. ال جۇگىرۋ مەن ءجۇرىستى ۇيلەستىرۋ اعزانى جۇكتەمەگە جۇمساق بەيىمدەيدى.
جاتتىقتىرۋشى رايلي بۋگحولستىڭ ايتۋىنشا، ادام جۇگىرگەن سايىن بۋىندارعا دەنە سالماعىنان ءۇش-تورت ەسە كوپ كۇش تۇسەدى. اسىرەسە جاڭا باستاعاندا اعزاعا مۇنداي اسەرگە بەيىمدەلۋگە ۋاقىت كەرەك. دجەففينگ جاراقات ءقاۋپىن ازايتىپ، وكپەنىڭ جۇمىسىن كۇشەيتۋگە، توزىمدىلىكتى ارتتىرۋعا جانە بۇلشىقەتتى نىعايتۋعا كومەكتەسەدى.
تاعى ءبىر پسيحولوگيالىق پايداسى بار: جۇگىرىپ جۇرگەندە قىسقا دەمالىس جاساعىڭ كەلەدى، ءبىراق "توقتاعان ۇيات" دەگەن وي مازالايدى. دجەففينگ مۇنى دا شەشەدى: ءسىز الدىن الا بەلگىلى ءبىر ۋاقىت جۇگىرىپ، سودان سوڭ جوسپارلى ءۇزىلىس جاسايتىنىڭىزدى بىلەسىز.