تەكسەرۋ بارىسىندا ءجاسوسپىرىم ويىنشىق قارۋ ۇستاپ جۇرگەنى بەلگىلى بولدى
سەمەي قالاسىنداعى زاتون پوليسيا ءبولىمىنىڭ كەزەكشى بولىمىنە 342 كۆارتالداعى «رادۋگا» ساۋدا ءۇيى اۋدانىندا جاس جىگىتتىڭ مىلتىقپەن جۇرگەنى تۋرالى حابارلاما تۇسكەن، دەپ حابارلايدى Almaty-akshamy.kz التاينيۋسكە سىلتەمە جاساپ.
پاترۋلدىك پوليسيا باتالونىنىڭ قىزمەتكەرلەرى قولىندا تەلەسكوپيالىق كوزدەۋىش بار مىلتىق الىپ جۇرگەن 17 جاستاعى جىگىتتى ۇستادى.
تەكسەرۋ بارىسىندا ءجاسوسپىرىمنىڭ ەكى كۇن بۇرىن تۋعان كۇنىندە اتا-اناسى بەرگەن اقشاعا ويىنشىق قارۋ ساتىپ العانى بەلگىلى بولدى.
«زاتون پوليسيا ءبولىمى يۋۆەنالدىق پوليسيا توبىنىڭ قىزمەتكەرلەرى زاڭدى وكىلدەرىنىڭ قاتىسۋىمەن كامەلەتكە تولماعان بالاعا قاتىستى پروفيلاكتيكالىق اڭگىمە جۇرگىزدى. ويىنشىق مىلتىق تۋعان كۇن يەسىنە قايتارىلدى»، - دەپ حابارلايدى شقو پد باسپا ءسوز قىزمەتى.