5 ماۋسىمنان 6 ماۋسىمعا قاراعان ءتۇنى ورتالىق جانە سولتۇستىك قازاقستان تۇرعىندارى، ونىڭ ىشىندە استانا، قاراعاندى، پاۆلودار جانە قوستاناي قالالارىنىڭ حالقى اسپاندا جارقىراعان قۇبىلىسقا كۋا بولدى.
"بۇل بۇرىن وربيتادا بولعان عارىش نىساندارىنىڭ ءبىرىنىڭ اتموسفەراعا ەنۋىنە قاتىستى بولۋى مۇمكىن"، – دەدى مينيسترلىك.
عارىشتىق قالدىقتاردىڭ قوزعالىسىن باقىلايتىن حالىقارالىق ۇيىمداردىڭ دەرەكتەرىنە سايكەس، ءدال وسى ۋاقىت ارالىعىندا ءۇش جاعداي تىركەلگەن، ولاردىڭ ءارقايسىسى بايقالعان قۇبىلىستى تۋدىرۋى مۇمكىن. اتاپ ايتقاندا، قىتايدىڭ ZQ-2E زىمىرانىنىڭ ۇدەتكىش بلوگى.
- اتموسفەراعا ەنۋ ۋاقىتى: 5 ماۋسىم، استانا ۋاقىتىمەن شامامەن 22:40.
- نىسان: LandSpace كومپانياسى 17 مامىردا ۇشىرعان Zhuque-2 Enhanced زىمىرانىنىڭ ساتىسى.
- ەرەكشەلىگى: ەكولوگيالىق تازا وتىن (سۇيىق مەتان مەن وتتەگى) پايدالانىلادى، جانۋ كەزىندە ايقىن جارىق شىعارادى.
بۇل نىسان ۋاقىت جاعىنان جانە كورىنىس سيپاتتاماسى بويىنشا قازاقستان تۇرعىندارىنىڭ بايقاعان قۇبىلىسىنا دالمە-دال سايكەس كەلەدى.
مينيسترلىك مالىمەتىنشە، ەكىنشى نىسان – STARLINK-1631 (SpaceX) سپۋتنيگى. اتموسفەراعا ەنۋ ۋاقىتى: 6 ماۋسىم، الماتى ۋاقىتىمەن 03:41. ەسكى سپۋتنيكتەردىڭ ءبىرىنىڭ جوسپارلى وربيتادان شىعۋى.
ال ءۇشىنشىسى – جاپونيالىق H-2A R/B زىمىرانىنىڭ ۇدەتكىش بلوگى. ونىڭ اتموسفەراعا ەنۋ ۋاقىتى: 6 ماۋسىم، الماتى ۋاقىتىمەن 00:36. نىسان ءپاسسيۆتى وربيتادان شىعۋ رەجيمىندە بولعان.
"ءقازىر قازاقستان رەسپۋبليكاسى اۋماعىنا قانداي دا ءبىر فراگمەنتتەردىڭ قۇلاعانى نەمەسە زالال كەلتىرگەنى تۋرالى راستالعان اقپارات جوق. مۇنداي نىساندار، ادەتتە، اتموسفەرادا تولىق جانىپ كەتەدى (ءىرى بولىكتەردىڭ قازاقستان اۋماعىنا قۇلاۋى ەكىتالاي)، ال قۇبىلىستىڭ ءوزى كورنەكى بولعانىمەن، ءقاۋىپسىز ۇدەرىس بولىپ سانالادى"، - دەلىنگەن حابارلامادا.
مينيسترلىك ازاماتتاردان سابىر ساقتاپ، تەك رەسمي اقپارات كوزدەرىنە سەنۋگە شاقىردى.