الماتى اۋەجايىنداعى جەلىلىك پوليسيا ءبولىمىنىڭ ەسىرتكى قىلمىسىنا قارسى ءىس-قيمىل بولىمشەسى "زاڭ مەن ءتارتىپ" قاعيداتىن ىسكە اسىرۋ اياسىندا ءىرى كولەمدەگى ەسىرتكى جەتكىزۋدىڭ جولىن كەستى، - دەپ حابارلايدى Aqshamnews.kz.
پحۋكەت – الماتى اۋە رەيسى ۇشىپ كەلگەننەن كەيىن حالىقارالىق كەلۋ زالىندا جۇرگىزىلگەن جەدەل-ىزدەستىرۋ ءىس-شارالارى بارىسىندا 42 جاستاعى ءۇندىستان ازاماتى انىقتالىپ، ۇستالدى. بۇل تۋرالى كولىكتەگى پوليسيا دەپارتامەنتى باستىعىنىڭ ءبىرىنشى ورىنباسارى ماديار ايتۋعانوۆ ايتتى. ونىڭ ايتۋىنشا، قۇقىق بۇزۋشىنىڭ باگاجىن تەكسەرۋ كەزىندە پوليسيا قىزمەتكەرلەرى جالپى سالماعى 2 كگ 995 گرامم بولاتىن ماريحۋانا ەسىرتكى زاتىن تاۋىپ، تاركىلەدى. اتالعان دەرەك بويىنشا كولىك پوليسەيلەرى سوتقا دەيىنگى تەرگەپ-تەكسەرۋ امالدارىن جۇرگىزدى.
– الماتى قالاسىنىڭ مامانداندىرىلعان اۋدانارالىق قىلمىستىق ىستەر جونىندەگى سوتى شەتەل ازاماتىن كىنالى دەپ تانىپ، ونى 15 جىل 2 اي مەرزىمگە باس بوستاندىعىنان ايىرۋ جازاسىنا كەستى، – دەدى م.ايتۋعانوۆ.
ايتا كەتەيىك، 2025 جىلدىڭ 11 ايىندا كولىكتەگى پد 347 ەسىرتكى قۇقىق بۇزۋشىلىعىن انىقتادى. ونىڭ ىشىندە 52 ساتۋ فاكتىسى، 19 اسا ءىرى كولەمدە ساقتاۋ، 2 قىلمىستىق توپ قۇرۋ، سونداي-اق 12 كونتراباندا فاكتىسى. زاڭسىز اينالىمنان جالپى 781 كەلىدەن استام ەسىرتكى زاتتارى تاركىلەندى.