ەنەرگەتيكا ءمينيسترى ەرلان اقكەنجەنوۆ حالىقارالىق ۆاليۋتا قورى (حۆق) ميسسياسىمەن جۇمىس كەزدەسۋىن وتكىزدى. ميسسيانى قازاقستان بويىنشا جاڭادان تاعايىندالعان جەتەكشى – الي ال-ەيد مىرزا باستاپ كەلدى.
كەزدەسۋ بارىسىندا ەلدىڭ ەنەرگەتيكا سالاسىنداعى ينۆەستيسيالىق كليماتتى نىعايتۋ جولدارى، جىلۋ ەلەكتر ورتالىقتارىن قوسا العاندا، ينفراقۇرىلىمدى اۋقىمدى جاڭعىرتۋ جوسپارلارى جانە مۇناي-گاز سالاسىنىڭ دامۋ پەرسپەكتيۆالارى تالقىلاندى.
ەرلان اقكەنجەنوۆ قازاقستان ەنەرگەتيكاسىنداعى باسىمدىقتاردى ايقىنداپ، ينۆەستورلار ءۇشىن اشىق ءارى قولايلى جاعدايلار جاساۋدىڭ ماڭىزدىلىعىن اتاپ ءوتتى.
"حالىقارالىق سەرىكتەستەرمەن، سونىڭ ىشىندە حۆق-مەن جۇرگىزىلەتىن كونسترۋكتيۆتى ديالوگ بىزگە ەنەرگەتيكا سالاسىن ورنىقتى دامىتۋ ستراتەگياسىن ءتيىمدى جۇزەگە اسىرۋعا جانە ۇزدىك الەمدىك تاجىريبەلەرمەن ۇندەستىرۋگە مۇمكىندىك بەرەدى"، – دەدى مينيستر.
كەزدەسۋدىڭ نەگىزگى تاقىرىپتارىنىڭ ءبىرى - جۇمىس ىستەپ تۇرعان ەنەرگەتيكالىق قۋاتتاردى جاڭعىرتۋ باعدارلامالارى بولدى. اسىرەسە، جىلۋ ەلەكتر ورتالىقتارىن جاڭارتۋ ماسەلەسىنە ەرەكشە نازار اۋدارىلدى. بۇل – سەنىمدى ەنەرگيامەن قامتۋدى قامتاماسىز ەتۋ جانە زاماناۋي، ەكولوگيالىق تازا تەحنولوگيالارعا ۇزاق مەرزىمدى ينۆەستيسيا تارتۋ ءۇشىن ماڭىزدى نەگىز بولىپ تابىلادى.
تاراپتار مۇناي-گاز سەكتورىنىڭ دامۋ كەلەشەگىن دە ەگجەي-تەگجەيلى قاراستىردى. مينيستر 2027 جىلعا قاراي مۇناي ءوندىرۋ كولەمى 104،5 ملن تونناعا جەتەدى دەگەن بولجامدى راستادى. بۇل كورسەتكىشكە تەڭىز كەن ورنىن كەڭەيتۋ سياقتى ءىرى جوبالاردى ىسكە اسىرۋ ارقىلى قول جەتكىزىلمەك.
كەزدەسۋ بارىسىندا جاڭارتىلاتىن ەنەرگيا كوزدەرى سەكتورىنا ينۆەستيسيا تارتۋ ماسەلەلەرى دە ءسوز بولدى. قازاقستان 2030 جىلعا قاراي جاڭارتىلاتىن ەنەرگيا كوزدەرىنىڭ ۇلەسىن ەلدىڭ ەنەرگەتيكالىق تەڭگەرىمىندە 15%-عا دەيىن جەتكىزۋدى ماقسات ەتىپ وتىر.
"باستى مىندەتىمىز - ەلدىڭ ەنەرگەتيكالىق قاۋىپسىزدىگىن قامتاماسىز ەتۋ جانە ينۆەستيسيالار تارتۋ مەن وزىق تەحنولوگيالاردى ەنگىزۋ ارقىلى سالانىڭ قارقىندى دامۋىنا جاعداي جاساۋ. قازاقستان ءوزارا ءتيىمدى ىنتىماقتاستىققا ءاردايىم اشىق"، – دەدى ەرلان اقكەنجەنوۆ كەزدەسۋ قورىتىندىسى بويىنشا.