الماتى – قازاقستانداعى قولدانبالى ونەردىڭ مادەني برەندىنە اينالدى
الماتىلىق قولونەرشىلەر حالىقارالىق ارەناعا شىقتى. بىلتىر قالاعا «الەم قولونەرشىلەرىنىڭ قالاسى» دەگەن مارتەبە بەرىلگەننەن كەيىن، قازاقستاندىق شەبەرلەردى تمد ەلدەرىنەن بولەك، ەۋروپا مەن ازيا ەلدەرى دە مويىنداي باستادى. ولاردىڭ قولىنان شىققان بۇيىمدار بۇگىندە قازاق مادەنيەتىنىڭ كورىنىسى رەتىندە قابىلدانىپ، ولار وتكىزەتىن جارمەڭكەلەر – تۋريستەردى تارتاتىن، ەكونوميكانى العا سۇيرەيتىن كۇشكە اينالىپ بارادى. بۇل تۋرالى الماتىنىڭ وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا الماتى قولونەرشىلەر پالاتاسىنىڭ ۆيسە-پرەزيدەنتى دامەلى جاناشيەۆا مالىمدەدى.
2024 جىلدىڭ سوڭىنا تامان الماتى قولونەر جونىندەگى الەمدىك كەڭەستىڭ (WCC) شەشىمىمەن قولونەر مەن قازاقتىڭ ۇلتتىق مۋزىكالىق اسپاپتارى باعىتى بويىنشا دۇنيەجۇزىلىك قولونەرشىلەر قالالارىنىڭ تىزىمىنە ەندى. بۇل جاڭالىق قازاقستاندىق شەبەرلەردىڭ جۇمىسىنا جاڭا سەرپىن بەرىپ، الماتىلىق ونىمگە شەتەلدىك نارىقتا سۇرانىستى ارتتىردى.
الماتىلىق قولونەرشىلەر ءوز ونىمدەرىن الەمدىك جارمەڭكەلەردە ۇسىنۋعا مۇمكىندىك الدى. قولونەر شەبەرلەرىنىڭ جارمەڭكەلەر مەن فەستيۆالدەرگە تۇراقتى قاتىسىپ جۇرگەنى دە كوپشىلىكتىڭ نازارىن اۋدارۋدا. بىلتىر الماتىدا 1300-گە جۋىق قولونەر شەبەرى قاتىسقان 17 جارمەڭكە وتكىزىلگەن.
2014 جىلدان بەرى جۇمىس ىستەيتىن قولونەر جونىندەگى الەمدىك كەڭەسكە بۇگىندە دۇنيەجۇزىنىڭ 60 قالاسى كىرەدى. بۇل جۇيەگە قازاقستان العاش رەت تاراز قالاسىنىڭ كيىز وڭدەۋ سالاسىنداعى تاجىريبەسىنىڭ ارقاسىندا قوسىلعان بولاتىن.
الماتى بولسا حالقىمىزدىڭ ۇلتتىق جانە مادەني كودىن ۇلىقتايتىن – قولونەر مەن قازاقتىڭ ۇلتتىق اسپاپتارى باعىتىن تاڭدادى.
2024 جىلدىڭ تامىز ايىندا كۋۆەيت، جۇڭگو، وزبەكستان جانە قازاقستان وكىلدەرىنەن قۇرالعان WCC حالىقارالىق كوميسسياسى الماتىعا ارنايى ساپارمەن كەلدى. ءۇش كۇن بويى ولار زەرگەرلىك شەبەرحانالار مەن مۋزىكالىق اسپاپتار جاسايتىن ستۋديالاردىڭ جۇمىسىمەن تانىسىپ، بۇيىمداردىڭ ساپاسى مەن تابيعي شيكىزاتتى قولدانۋ تاسىلدەرىنە ەرەكشە نازار اۋدارعان. ساپاردىڭ قورىتىندىسى بويىنشا جەكە جانە جالپى ەسەپ دايىندالىپ، 2024 جىلدىڭ قاراشاسىندا الماتىعا رەسمي تۇردە World Craft City مارتەبەسى بەرىلدى. وسىلايشا، قالا الەمدىك قولونەر كارتاسىندا ءوز ورنىن الدى. بۇل مارتەبە الماتىنىڭ تۋريستىك جانە مادەني تارتىمدىلىعىن ارتتىرىپ، شەبەرلەردىڭ تۋىندىلارىنا دەگەن ىشكى جانە سىرتقى سۇرانىستى كۇشەيتتى.
«قازاقستاندىق قولونەردىڭ حالىقارالىق دەڭگەيدە مويىندالۋى – شەبەرلەرىمىزدىڭ بۇيىمدارىن ۇلتتىق برەندكە اينالدىرۋعا جول اشتى. باسقا ەلدەردە جارمەڭكەلەر كوبىنە كادەسىي ونىمدەرىن ساتۋ ءۇشىن ۇيىمداستىرىلسا، الماتىدا قولدان جاسالعان كيىم، اياق كيىم، باس كيىم، ىدىس-اياق، مۋزىكالىق اسپاپتار مەن ساندىك بۇيىمداردىڭ الۋان ءتۇرى بار»، – دەدى دامەلى جاناشيەۆا.
ءقازىر ايىنا ەكى رەت وتەتىن الماتى جارمەڭكەسىنە كەلۋشىلەر سانى ارتىپ كەلەدى. ءار جارمەڭكەگە ورتا ەسەپپەن 80–100 شەبەر قاتىسادى، ال ءبىر جىلدا بۇل كورسەتكىش 1300-دەن اسادى. الماتى قولونەرشىلەر پالاتاسى جاس شەبەرلەرگە قولداۋ كورسەتىپ، پروفيلدىك كوللەدجدەر مەن جوعارى وقۋ ورىندارىنىڭ ستۋدەنتتەرىنە جارمەڭكەگە قاتىسۋعا مۇمكىندىك بەرەدى. سونداي-اق ماركەتينگ، الەۋمەتتىك جەلىلەردە العا جىلجۋ جانە بيزنەستى جۇرگىزۋ بويىنشا كەڭەس بەرەدى. ءوز ءىسىن ەندى باستاعان ەرەكشە شەبەرلەرگە جارمەڭكەگە تەگىن ورىن ۇسىنۋ دا – وسى پالاتا جۇمىسىنىڭ ءبىر بولىگى.