سۋ سالاسىنىڭ اشىق بولۋىن قامتاماسىز ەتۋ ءۇشىن سۋ رەسۋرستارى جانە يرريگاسيا مينيسترلىگى قازاقستانداعى سۋ رەسۋرستارىن پايدالانۋ تۋرالى ۇلتتىق اقپاراتتىق ەسەپتى جىل سايىن ءوزىنىڭ رەسمي سايتىندا جاريالاپ وتىرادى.
بۇل تالاپ بيىل ساۋىردە مەملەكەت باسشىسى قول قويعان جاڭا سۋ كودەكسىندە كوزدەلگەن.
ۇلتتىق ەسەپ – بۇل ەلدەگى سۋ قورىنىڭ جاي-كۇيى، ونى قورعاۋ جانە پايدالانۋ بويىنشا وتكەن كۇنتىزبەلىك جىلعا ارنالعان تالداۋ ەسەبى.
وندا نەگىزگى وزەندەردىڭ سۋ مولشەرى، سۋ رەسۋرستارىنىڭ سۋ شارۋاشىلىق باسسەيندەرى، وڭىرلەر جانە ەكونوميكا سالالارى بويىنشا پايدالانىلۋى جونىندە تالداۋ، سۋ شارۋاشىلىعى مەن گيدروتەحنيكالىق قۇرىلىستاردىڭ، ونىڭ ىشىندە مەملەكەتارالىق قۇرىلىستاردىڭ سانى مەن جاعدايى تۋرالى مالىمەتتەر كورسەتىلەدى. سونداي-اق قۇجاتتا سۋ قورىن قورعاۋ بويىنشا اتقارىلىپ جاتقان شارالار، ينۆەستيسيالىق جوبالاردى ىسكە اسىرۋ جانە زاماناۋي تەحنولوگيالاردى ەنگىزۋ تۋرالى اقپاراتتار باياندالعان.
«ورتالىق مەملەكەتتىك جانە جەرگىلىكتى اتقارۋشى ورگاندار ەسەپ بەرۋ ءۇشىن اقپاراتتى ەسەپتى جىلدان كەيىنگى جىلدىڭ 1 ناۋرىزىنان كەشىكتىرمەي ۇسىنۋعا مىندەتتى. ۇلتتىق ەسەپتىڭ ءوزى 1 مامىردان كەشىكتىرىلمەي جاريالانادى. بۇل قازاقستانداعى سۋ رەسۋرستارىن باسقارۋ مەن پايدالانۋدىڭ اشىقتىعىن قامتاماسىز ەتۋگە ءتيىس. سۋ كودەكسىنىڭ ءوزى بيىل 10 ماۋسىمدا كۇشىنە ەنەدى. سوندىقتان ءبىز بۇل ەسەپتى 2026 جىلدان باستاپ جاريالاي باستايمىز»، – دەدى سۋ ساياساتى دەپارتامەنتىنىڭ ديرەكتورى سەرىكجان بەكەتايەۆ.