قالا كۇنى اياسىندا شاھار باسشىسى ەربولات دوسايەۆ قالانى دامىتۋعا ەرەكشە ۇلەس قوسقان ون اداماعا «الماتى قالاسىنىڭ قۇرمەتتى ازاماتى» اتاعىن بەردى، دەپ حابارلايدى Almaty-akshamy.kz Inform.kz-كە سىلتەمە جاساپ.
بۇگىن الماتى تۇرعىندارى قالا كۇنىن تويلاپ جاتىر. قالانىڭ ءارتۇرلى بولىكتەرىندە مەرەكەلىك ءىس-شارالار وتۋدە. «سۇيەم سەنى، الماتى!» رەترو-فەستيۆالىنىڭ اشىلۋ سالتاناتىندا قالا اكىمى ەربولات دوسايەۆ الماتىلىقتاردى قۇتتىقتادى.
«سىزدەردى قالا كۇنىمەن شىن جۇرەكتەن قۇتتىقتايمىن! بۇل ءبارىمىز ءۇشىن، ءاربىر الماتىلىق ءۇشىن ەرەكشە مەرەكە! مەن وسىندا تۋىپ ءوستىم، مەنىڭ ەڭ جىلى ەستەلىكتەرىم الماتىمەن بايلانىستى. مۇندا مەن وتباسىن قۇردىم، بالالارىم ءوسىپ كەلەدى»،- دەدى ەربولات دوسايەۆ. سونىمەن قاتار، شاھار باسىشىسى الماتىنى دامىتۋ بويىنشا ۇلكەن ماقساتتار مەن مىندەتتەر بار ەكەنىن اتاپ ءوتتى.
«ءبارىمىز بىرگە قالامىزدى بۇدان دا جاقسىراق جانە ادەمى ەتۋىمىز كەرەك. ءبىزدىڭ نەگىزگى ماقساتىمىز – جايلى قالالىق ورتا قۇرۋ جانە مەگاپوليستىڭ بارلىق اۋداندارىندا تۇرعىنداردىڭ تابىسىن ارتتىرۋ. مەن الماتىنىڭ بارلىق تۇرعىندارىنا شىن جۇرەكتەن ماحاببات پەن زور دەنساۋلىق تىلەيمىن! ءبىزدىڭ الماتى ءوسىپ، گۇلدەنە بەرسىن»، – دەدى ول.
شارا بارىسىندا مەگاپوليس باسشىسى الماتىنىڭ دامۋى مەن گۇلدەنۋىنە ەلەۋلى ۇلەس قوسقان 10 تۇرعىندى «الماتى قالاسىنىڭ قۇرمەتتى ازاماتى» اتاعىمەن ماراپاتتادى.
قازاق كسر-نىڭ جوعارى كەڭەسىنىڭ دەپۋتاتى، ق ر بۇرىنعى دەنساۋلىق ساقتاۋ ءمينيسترى، مەملەكەت جانە قوعام قايراتكەرى، مەديسينا عىلىمدارىنىڭ كانديداتى تالاپقالي ءابىش ۇلى ىزمۇحامبەتوۆ، قازاق ءسسر-نىڭ ەڭبەك سىڭىرگەن ءارتىسى، كينو جانە تەاتر ءارتىسى مەرۋەرت قاراتاي قىزى وتەكەشوۆا، قازاقستاننىڭ حالىق ءارتىسى. التىنبەك قورازبايەۆ، بەلگىلى قوعام قايراتكەرى. اسىلى ءالي قىزى وسمان، اقىن، قازاقستان جازۋشىلار وداعىنىڭ مۇشەسى، جۋرناليست ءجۇرسىن مولداش ۇلى ەرمانوۆ، مەملەكەت جانە قوعام قايراتكەرى، قازاقستان رەسپۋبليكاسىنىڭ ەڭبەك سىڭىرگەن زاڭگەرى زينايدا لەونتيەۆنا فەدوتوۆا، سوعىس ارداگەرى قايىرلى ۋاتاي ۇلى جوڭقابايەۆ، ۇستاز، تاريحشى ورىنشا قارابالينا، مەملەكەت جانە قوعام قايراتكەرى، وتستاۆكاداعى 1ء-شى رانگىلى كاپيتان، اسكەري تەڭىزشى كۇپەسباي ورازباي ۇلى جامپەيسوۆ، قازاقستان رەسپۋبليكاسىنىڭ ەڭبەك سىڭىرگەن ارحيتەكتورى ليۋبوۆ ۆلاديميروۆنا نىسانبايەۆا يە بولدى. سونداي-اق قۇرمەتتى اتاقتان باسقا، ماراپاتتالعاندار 1 ملن تەڭگەگە اقشالاي سەرتيفيكاتتار الدى.
ءىس-شارانىڭ رەسمي بولىگى اياقتالعاننان كەيىن قالا اكىمى «سۇيەم سەن، الماتى!» اتتى قالانىڭ 1940 جىلدان كۇنى بۇگىنگە دەيىنگى الماتىنىڭ مادەني تاريحي دىستۇرلەرىنە اونالعان فەستيۆالدە بولدى. قالا تۇرعىندارى مەن قوناقتارى ءار ونجىلدىقتىڭ اتموسفەراسىنا مۋزىكا، پوەزيا جانە دەكوراسيا ارقىلى كىردى. ارتىستەر ءشامشى قالداياقوۆتىڭ كومپوزيسياسىن، دوس-مۇقاسان اندەرىن ورىنداپ، تەاترلىق قويىلىمدار قويدى.
قالا كۇنىنىڭ باستى وقيعاسى تۇڭعىش پرەزيدەنت ساياباعىندا وتكەن «الما Fest» ءداستۇرلى فەستيۆالى بولدى. ۇيىمداستىرۋشىلار الما جارمەڭكەسىن، ۇلكەن كونسەرت جانە ءتۇرلى بەلسەندىلىك كورسەتتى. فەستيۆالدىڭ باستى الاڭىندا 100 توننا جەرگىلىكتى الما ۇسىنىلدى.
قالا كۇنى Almaty Arena-دا تانىمال وتاندىق جۇلدىزدار مەن A'Studio توبىنىڭ قاتىسۋىمەن وتەتىن «سالەم، الماتى» اتتى ۇلكەن كونسەرتپەن اياقتالادى.
ەسكە سالساق، قالا كۇنىنە ورايلاستىرىلعان نەگىزگى مەرەكەلىك ءىس-شارالار 16 قىركۇيەكتە باستالدى. كونسەرتتىك باعدارلامالار الماتىنىڭ بارلىق اۋداندارىندا جانە مەگاپوليستىڭ باستى الاڭدارىندا ءوتتى.