استانا قالاسى اكىمدىگىنە قاراستى «استانا تازالىق» ج ش س جالعان كولىك جوندەۋ جۇمىستارى ءۇشىن دەپ ميلليونداپ اقشا اۋدارعان. ال شىن مانىندە ول جۇمىستار ورىندالماعان، ءتىپتى كەي جۇمىستى كومپانيا ءوز قىزمەتكەرلەرىنىڭ موينىنا ارتىپ قويعان، دەپ حابارلايدى اlmaty-akshamy.kz.
بۇل تۋرالى «ادىلدىك جولى» رقب استانا قالاسى فيليالىنىڭ باسشىسى دارحان قۇلجامبەكوۆ الەۋمەتتىك جەلىدەگى پاراقشاسىندا جازدى.
قوعامدىق ۇيىمعا بيىل اقپاندا ورىندالماعان قىزمەت ءۇشىن «استانا تازالىق» ج ش س قاراجات اۋدارعانى جونىندە دەرەك جەتكەن. نەگىزى قاراجاتتى كولىكتى جوندەۋ قىزمەتى ءۇشىن تولەۋ كەرەك بولعان.
سودان كەيىن دارحان قۇلجامبەكوۆ ەلوردانىڭ ىشكى مەملەكەتتىك اۋديت دەپارتامەنتىنە حابارلاسقان. سول حابارلاماعا ساي دەپارتامەنت كومپانيانىڭ 2020 جىلدىڭ باسىنان 2023 جىلدىڭ سوڭىنا دەيىنگى ارالىقتاعى قىزمەتىنە اۋديت جۇرگىزەدى.
تەكسەرۋ بارىسىندا 2022 جانە 2023 جىلدارى كولىكتەردى جوندەۋگە جالعان قاراجات اۋدارىلعانى انىقتالدى. بۇل ج ش س سول ارالىقتا كاماز ماركالى اۆتوكولىكتەردى جوندەۋگە 468 559 مىڭ تەڭگەگە مەملەكەتتىك ساتىپ الۋ شارتتارىن جاساسقان.
تەكسەرۋ بارىسىندا 2022 جىلى ءىس جۇزىندە 234 958 مىڭ تەڭگە يگەرىلگەنى انىقتالعان. الايدا قوسالقى بولشەكتەردى اۋىستىرۋ بويىنشا جۇمىستار ءىس جۇزىندە ورىندالماعان. مۇنى جۇرگىزۋشىلەردىڭ تۇسىندىرمەلەرى مەن قۇجاتتارى راستايدى، - دەيدى دارحان قۇلجامبەكوۆ.
سونىمەن قاتار 2022 جىلى جۇمىستار ناقتى ورىندالماستان 2،8 ملن تەڭگە تاعى تولەنگەن.
ال 2023 جىلى كەيبىر كولىك «اقمولا كاماز اۆتوورتالىعى» جشس-دا جوندەۋدەن وتپەگەن، ول جۇمىستاردى سەرىكتەستىك ءوز كۇشىمەن ىستەگەن. سول جىلى جوندەۋ جۇمىستارى ناقتى ورىندالماستان، 7،6 ملن تەڭگە كولەمىندە قاراجات اۋدارىلعان.
قوعامدىق ۇيىم ەندى دەپارتامەنت نۇسقاماسىن جشس-نىڭ ورىنداۋىن قاداعالاۋعا العالى جاتىر. ال انىقتالعان قۇقىقبۇزۋشىلىقتار ءۇشىن ج ش س باس ينجەنەرى تارتىپتىك جاۋاپكەرشىلىككە تارتىلعان.
ايتا كەتەيىك، «استانا تازالىق» جشس-نىڭ جالعىز قۇرىلتايشىسى – استانا قالاسى وتىن-ەنەرگەتيكالىق كەشەنى جانە كوممۋنالدىق شارۋاشىلىق باسقارماسى. كومپانيانىڭ جارعىلىق كاپيتالىنداعى باسقارما ۇلەسى – 100%.