قاسىم-جومارت توقايەۆ شاۆكات ميرزيويەۆ پەن باۋىرلاس حالىقتى وزبەكستان رەسپۋبليكاسىنىڭ تاۋەلسىزدىك كۇنىمەن قۇتتىقتادى، دەپ حابارلايدى aqshamnews.kz اقورداعا سىلتەمە جاساپ.
مەملەكەت باسشىسى قاسىم-جومارت توقايەۆ پرەزيدەنت شاۆكات ميرزيويەۆتىڭ قۋاتتى ءارى بەدەلدى باسشىلىعىمەن وزبەكستان الەۋمەتتىك-ەكونوميكالىق دامۋدا، ازاماتتاردىڭ ءال-اۋقاتىن ارتتىرۋدا جانە حالىقارالىق ارەنادا ۇلتتىق مۇددەسىن ىلگەرىلەتۋدە تاڭعالارلىق تابىسقا جەتكەنىن اتاپ ءوتتى.
– قازاقستان وزبەكستاننىڭ ستراتەگيالىق سەرىكتەسى جانە سەنىمدى وداقتاسى رەتىندە ءسىزدىڭ ەلىڭىزبەن سان قىرلى مەملەكەتارالىق بايلانىستى ودان ءارى تەرەڭدەتۋگە باسا ءمان بەرەدى. قازاق-وزبەك قارىم-قاتىناسى عاسىرلار بويى جالعاسقان دوستىق، تاتۋ كورشىلىك جانە ءوزارا قولداۋ رۋحىندا دامي بەرەتىنىنە سەنىمدىمىن. بۇل باۋىرلاس حالىقتارىمىزدىڭ يگىلىگىنە قىزمەت ەتىپ، سونداي-اق ورتالىق ازياداعى تۇراقتىلىق پەن قاۋىپسىزدىكتى قامتاماسىز ەتۋگە سەپتىگىن تيگىزەدى، – دەپ جازىلعان جەدەلحاتتا.