بۇگىن، 1 قىركۇيەكتە الماتى قالاسىنىڭ اكىمى دارحان ساتىبالدى وقۋشىلاردى «كەلەشەك مەكتەپتەرى» ۇلتتىق جوباسى اياسىندا سالىنعان جاڭا مەكتەپتەردىڭ بىرىندە ءبىلىم كۇنىمەن قۇتتىقتادى. وقۋ جىلىنىڭ باسىندا مەگاپوليستە 12 مىڭنان استام ورىندىق 7 زاماناۋي مەكتەپ اشىلدى.
الاتاۋ، المالى، بوستاندىق جانە ناۋرىزباي اۋداندارىنداعى جاڭا وقۋ ورىندارى كەڭ كابينەتتەرمەن، زاماناۋي زەرتحانالارمەن، سيفرلىق سىنىپتارمەن، سپورت كەشەندەرىمەن جانە اكت زالدارىمەن جابدىقتالعان.
«بۇگىن الماتىنىڭ 350 مىڭنان استام وقۋشىسى ءۇشىن العاشقى قوڭىراۋ سوعىلدى. 28 مىڭنان استام ءبىرىنشى سىنىپ وقۋشىلارى العاش رەت مەكتەپ تابالدىرىعىن اتتادى. بۇل اتا-انالار مەن تاربيەشىلەر ءۇشىن ەرەكشە ءارى قۋانىشتى ءسات. مەملەكەت باسشىسى قاسىم-جومارت توقايەۆ اتاپ وتكەندەي، ءار بالانىڭ ساپالى ءبىلىم الۋى ءۇشىن تەڭ جانە زاماناۋي جاعداي جاساۋ ماڭىزدى»، – دەپ اتاپ ءوتتى دارحان ساتىبالدى.
الماتى اكىمى قىركۇيەك ايىنىڭ سوڭىنا دەيىن الماتىدا 10،5 مىڭ ورىندىق تاعى 5 مەكتەپ اشۋ جوسپارلانىپ وتىرعانىن اتاپ ءوتتى. «كەلەشەك مەكتەپتەرى» ۇلتتىق جوباسى اياسىندا مەگاپوليستە بارلىعى 34،8 مىڭ ورىندىق 21 وقۋ ورنىنىڭ قۇرىلىسى جۇزەگە اسىرىلۋدا. سونداي-اق جەكە ينۆەستورلار ەسەبىنەن 8 مەكتەپ سالىنۋدا. بۇدان باسقا، «1300 مەكتەپتى جاڭعىرتۋ» ۇلتتىق جوباسى اياسىندا 2027 جىلعا دەيىن 31 مەكتەپكە كۇردەلى جوندەۋ جۇرگىزىلەتىن بولادى.
وتكەن وقۋ جىلىنداعى الماتى وقۋشىلارىنىڭ جەتىستىكتەرىن ەرەكشە ماقتانىشپەن اتاعان ءجون. قالانىڭ جاس تالانتتارى 21 حالىقارالىق جانە 33 رەسپۋبليكالىق وليمپيادالارعا قاتىسىپ، 1000-نان استام جۇلدەلى ورىنعا يە بولدى. الماتى قۇراماسى «ۇزدىك وليمپيادا كومانداسى – 2025» دەپ تانىلدى. وقۋشىلار نيدەرلاندى، يندونەزيا، ءۇندىستان جانە كيپردەگى روبوتوتەحنيكا چەمپيوناتتارىندا ەلىمىزدىڭ اتىن شىعاردى، عىلىم سالاسىندا ابىروي - بەدەلىن ارتتىردى.