قاسىم-جومارت توقايەۆ New Silk Way VII حالىقارالىق كولىك-لوگيستيكا بيزنەس-فورۋمىنىڭ اشىلۋىمەن قۇتتىقتاپ، بۇگىنگى ءىس-شارانىڭ ءمان-ماڭىزى ەرەكشە ەكەنىنە توقتالدى، - دەپ حابارلايدى Aqshamnews.kz.
– ءبارىمىز «دوستىق – مويىنتى» تەمىرجولىنىڭ ەكىنشى جەلىسىنىڭ رەسمي اشىلۋىنا كۋا بولىپ وتىرمىز. «دوستىق – مويىنتى» جولى – شىن مانىندە اسا ماڭىزدى ينفراقۇرىلىم جوباسى. بۇل جوبا قازاقستاننىڭ كولىك-لوگيستيكا جۇيەسىنىڭ دامۋىنا، ونىڭ تيىمدىلىگىن نىعايتۋعا ايرىقشا سەرپىن بەرەتىنى ءسوزسىز. ال تاريحىمىزعا ۇڭىلسەك، وسىدان وتىز بەس جىل بۇرىن «دوستىق – الاشاڭقاي» جوباسى ىسكە قوسىلدى. قازاقستان مەن قىتايدىڭ تەمىرجولى توعىستى. بۇل ەلىمىز ءۇشىن تاريحي وقيعا بولدى. سول جولدى سالعان ارداگەرلەرىمىز ءقازىر وسى جيىنعا قاتىسىپ وتىر. بارشاڭىزعا زور العىسىمدى ايتامىن. مەن حالىققا جولداۋىمدا، كولىك-لوگيستيكا سالاسى – ەكونوميكانىڭ قوزعاۋشى كۇشى، حالىقارالىق بايلانىستى نىعايتاتىن نەگىزگى فاكتوردىڭ ءبىرى دەپ اتاپ ءوتتىم. قازاقستاننىڭ بۇل سالاداعى الەۋەتى زور. ۇلى جىبەك جولى قازاقستان مەن ورتالىق ازيا ارقىلى وتكەن. قازاق جەرى ەجەلدەن جۇڭگو مەن ەۋروپا اراسىنداعى التىن كوپىر سانالادى. جۇڭگو – ءبىزدىڭ ماڭگى، تاتۋ كورشىمىز ءارى سەنىمدى وداقتاسىمىز. ءبىز بىر-بىرىمىزگە ءاردايىم قولداۋ كورسەتەمىز. قوس حالىقتىڭ قارىم-قاتىناسى مىزعىماس دوستىققا، ءوزارا سەنىمگە نەگىزدەلگەن. ەلدەرىمىزدىڭ بولاشاققا دەگەن كوزقاراسى – ورتاق. كوپ سالاداعى ىنتىماقتاستىعىمىز نىعايۋدا. اسىرەسە، «ءبىر بەلدەۋ، ءبىر جول» جاھاندىق جوباسىنىڭ ءمان-ماعىناسى ايرىقشا. بارشاڭىزعا ءمالىم، 2013 جىلى ءتوراعا سي سزينپين بۇل باستامانى قازاقستاندا جاريالادى. ءبىز وسى جوبانى بارىنشا قولدايمىز، ونى جۇزەگە اسىرۋعا بەلسەنە اتسالىسىپ جاتىرمىز. سەبەبى بۇل باستاما ەلىمىزدىڭ مۇددەسىنە تولىق ساي كەلەدى. «دوستىق – مويىنتى» تەمىرجولىنىڭ ەكىنشى جەلىسى – سونىڭ ايقىن دالەلى، – دەدى پرەزيدەنت.