ع. داۋكەيەۆ اتىنداعى الماتى ەنەرگەتيكا جانە بايلانىس ۋنيۆەرسيتەتىندە ۋنيۆەرسيتەت ۇجىمى مەن ستۋدەنتتەر اراسىندا ساراپتامالىق تالقىلاۋ ءوتتى. ءىس-شارانىڭ ماقساتى – اتوم ەلەكتر ستانسياسىنىڭ (اەس) قاجەتتىگى، ونىڭ حالىققا تيىمدىلىگى، ەكولوگيالىق قاۋىپسىزدىگى، مامانداردى دايىنداۋ ءىسى، ەنەرگيا قۇرىلىسىنا قاجەتتى جابدىقتار، ۋران قورى جانە باسقا دا ءتيىمدى جاقتارى تۋرالى پىكىر الماسۋ بولدى. بۇل تۋرالى سالا ماماندارى ءوز ويلارىن ورتاعا سالدى.
كەزدەسۋ بارىسىندا قاتىسۋشىلار قازاقستاندا اەس سالۋ تۋرالى وتكەن رەفەرەندۋمنىڭ الدىن الا قورىتىندىلارىن تالقىلادى. جينالعانداردىڭ پىكىرىنشە، اەس سالۋ – قازاقستاننىڭ ەنەرگەتيكالىق قاۋىپسىزدىگىن ارتتىرۋداعى ماڭىزدى قادام جانە ەلدىڭ ەكونوميكالىق دامۋىنا سەرپىن بەرەدى. سالا ماماندارىنىڭ ايتۋىنشا، قازاقستان ۋران قورى بويىنشا الەمدە الدىڭعى ورىنداردا تۇر جانە بۇل ەلىمىزگە اتوم ەنەرگەتيكاسىن دامىتۋ ءۇشىن ۇلكەن ارتىقشىلىق بەرەدى.
اتوم سالاسىنىڭ ساراپشىسى باۋىرجان يبرايەۆ اەس قۇرىلىسىنىڭ ەلگە تيگىزەتىن ەكونوميكالىق جانە الەۋمەتتىك تيىمدىلىكتەرىن اتاپ ءوتتى:
«اتوم ەلەكتر ستانسياسىن سالۋدان قورىقپاۋىمىز كەرەك. الەمدە بار تاجىريبەنى ەلىمىز دە قولدانباق. اەس-نىڭ ارقاسىندا ەلدىمەكەندەر داميدى، جاڭا جۇمىس ورىندارى اشىلادى. ەگەر اەس قۇرىلىسىندا 1 ينجەنەر جۇمىس ىستەسە، ونىڭ جانىندا 10 كومەكشى قاجەت بولادى. دەمەك، كادر تاپشىلىعى بولمايدى دەپ ويلايمىن. ەنەرگەتيكا سالاسىندا ماماندار جەتكىلىكتى. بۇل – ءقاۋىپسىز جوبا، ەكولوگيالىق تۇرعىدان دا ءقاۋىپسىز. ەشقانداي وزەن-كولدەر قۇرعاتىلمايدى، سوندىقتان الاڭداۋعا نەگىز جوق. اتوم ەنەرگەتيكاسى – كومىر مەن مۇنايعا قاراعاندا ەكولوگيالىق تازا ەنەرگيا كوزى، بۇل قازاقستاننىڭ جاسىل ەكونوميكاعا كوشۋ ستراتەگياسىنا ساي كەلەدى»، – دەدى ول.
يبرايەۆ اەس سالۋ كەزىندە تەحنولوگيالىق قاۋىپسىزدىك شارالارىنىڭ قاتاڭ ساقتالاتىنىن، جوباداعى قاۋىپسىزدىك دەڭگەيىنىڭ جوعارى ەكەنىن دە اتاپ ءوتتى.
«ءبىز الەمدەگى ەڭ وزىق تەحنولوگيالاردى قولدانۋ ارقىلى قاۋىپسىزدىكتى قامتاماسىز ەتەمىز. بۇل جوبا ارقىلى ەلىمىزدەگى ەنەرگەتيكالىق تاپشىلىقتى شەشىپ قانا قويماي، كورشى ەلدەرگە دە ەلەكتر ەنەرگياسىن ەكسپورتتاۋ مۇمكىندىگى تۋادى. بولاشاقتا بىرنەشە ەلەكتر وندىرەتىن ورتالىقتار سالۋ قاجەتتىگى دە بايقالىپ وتىر، ويتكەنى ەلىمىزدىڭ ەكونوميكاسى مەن حالقىنىڭ سۇرانىسى ارتىپ كەلەدى»، – دەدى ول.
كەزدەسۋ بارىسىندا ستۋدەنتتەر مەن ۋنيۆەرسيتەت ۇجىمى اەس قۇرىلىسى جونىندەگى ءوز سۇراقتارىن قويىپ، سالانىڭ جەتەكشى ماماندارى جاۋاپ بەردى. سالا ماماندارى قازاقستاندا قاۋىپسىزدىكتىڭ ەڭ جوعارى ستاندارتتارى قامتاماسىز ەتىلەتىنىن جانە قۇرىلىس بارىسىندا حالىقارالىق تاجىريبە مەن قاتاڭ نورمالارعا سۇيەنەتىنىن ءتۇسىندىردى.