مەديسينا قىزمەتكەرلەرىنە شابۋىل جاساۋ ماسەلەسىنە قاتىستى قىلمىستىق كودەكسكە جەكە باپ رەتىندە ەنگىزىلمەك، - دەپ حابارلايدى اqshamnews.kz ءتىلشىسى.
بۇل تۋرالى دەنساۋلىق ساقتاۋ ءمينيسترى اقمارال ءالنازاروۆا ايتتى.
ۇكىمەتتەگى باسپا ءسوز كونفەرەنسياسى بارىسىندا مينيستر بۇل تۇزەتۋلەر مەملەكەت باسشىسىنىڭ تاپسىرماسى بويىنشا ازىرلەنگەنىن ايتتى.
"شىنىمەن دە، بۇگىن وسى نورمالار جوباسىن ازىرلەدىك. قازىرگى ۋاقىتتا باس پروكۋراتۋرا، ىشكى ىستەر مينيسترلىگىمەن جۇمىس جۇرگىزىلىپ جاتىر، الدىن الا وڭ قورىتىندىلار الىندى"، – دەدى مينيستر.
"قىلمىستىق كودەكسكە جاڭا 158-1-بابىن ەنگىزۋ ۇسىنىلادى. ول مەديسينا قىزمەتكەرلەرىنە قاتىستى كۇش قولدانۋ نەمەسە كۇش قولدانۋ ءقاۋپى ءۇشىن جازانى كوزدەيدى".
اتاپ ايتقاندا:
- ءقاۋىپ راستالعان جاعدايدا - 2 جىلعا دەيىن بوستاندىقتى شەكتەۋ؛
- كۇش قولدانۋ - 2 جىلدان 7 جىلعا دەيىن باس بوستاندىعىنان ايىرۋ؛
- ەگەر قىلمىس توتەنشە جاعداي كەزىندە جاسالسا - 10 جىلعا دەيىن؛
- ەگەر شابۋىل مەديسينا قىزمەتكەرلەرى توبىنا باعىتتالعان جانە توپپەن جاسالسا - 15 جىلعا دەيىن باس بوستاندىعىنان ايىرۋ.
سونىمەن قاتار، جۋرناليستەر مينيستردەن ەڭبەك جولىنىڭ باسىندا ناۋقاستار تاراپىنان اگرەسسياعا تاپ بولعان-بولماعانىن سۇرادى.
"مەن مەدبيكە جانە قابىلداۋ ءبولىمىنىڭ دارىگەرى رەتىندە ەڭبەك جولىمدى باستادىم. سول كەزدە، 30 جىلدان استام ۋاقىت بۇرىن، ونداي جاعدايلار بولعان جوق. ال قازىرگى كەزدە مۇنداي جاعدايلار اي سايىن تىركەلىپ وتىر، بۇل احۋالدىڭ وتە كۇردەلى ەكەنىن كورسەتەدى"، - دەدى مينيستر.