2025 جىلدىڭ 15 مامىرىندا قازاقستان رەسپۋبليكاسى قورعانىس مينيسترلىگىنىڭ «اسكەري-تەحنيكالىق مەكتەبى» رمقك الماتى فيليالى ءوزىنىڭ 25 جىلدىق مەرەيتويىن اتاپ ءوتتى. شارا بارىسىندا بۇل مەكەمەنىڭ ەلىمىزدىڭ قورعانىس قابىلەتىن ارتتىرۋداعى ەلەۋلى ءرولى مەن تاريحي جولى كەڭىنەن اتاپ ءوتىلدى، دەپ حابارلايدى aqshamnews.kz
الماتى فيليالىنىڭ نەگىزى 1938 جىلدىڭ 7 اقپانىندا قالانعان. سول كەزدە قۇرىلعان الماتى اۆتوموبيل-موتو كلۋبى بولاشاق اسكەري-تەحنيكالىق مەكتەپتىڭ العاشقى نۇسقاسى بولدى. وسى ونجىلدىقتار ىشىندە كلۋب 12 مىڭنان استام جۇرگىزۋشى، موتوشاباندوز جانە تانك مەحانيكتەرىن دايارلاپ شىعاردى. كەيىن بۇل بازا نەگىزىندە راديوكلۋب، تەڭىز كلۋبى سىندى باعىتتار قوسىلىپ، 1974 جىلى الماتى بىرىككەن تەحنيكالىق دوسااف مەكتەبى بولىپ قايتا قۇرىلدى. راديو كلۋب 7 000-نان استام راديوماماندى، تەڭىز كلۋبى 3 500 ەلەكتر مەحانيگى مەن 1 800 سۋاستى شەبەرىن وقىتىپ شىعاردى.
2000 جىلدىڭ 13 ماۋسىمىندا ق ر ۇكىمەتىنىڭ №718 قاۋلىسىنا سايكەس الماتىداعى اسكەري-تەحنيكالىق قۇرىلىم ق ر قك ءاتم الماتى فيليالى بولىپ قايتا ۇيىمداستىرىلدى.
1991 جىلدان بەرى بۇل فيليال 14 296 ۆس ساناتىنداعى جۇرگىزۋشىنى، 1 011 راديوتەلەگرافيستى جانە 1 166 راديولوكاسيالىق ستانسيا وپەراتورىن دايىندادى. 2013-2024 جىلدارى ارالىعىندا 8 000-نان استام ادام اسكەري وقىتىلعان رەزەرۆ باعدارلاماسى بويىنشا وقۋدان ءوتتى. بۇگىنگى تاڭدا فيليالدا اتقىش، مەرگەن، پۋلەمەتشى، گراناتومەتشى، بارلاۋشى، ۇۇا (ۇشقىشسىز ۇشۋ اپپاراتى) وپەراتورى جانە راديوتەلەگرافيست سەكىلدى ماماندىقتار بويىنشا اسكەري دايارلىق جۇرگىزىلەدى.
الماتى فيليالىنىڭ باستى ميسسياسى — جاستاردى اسكەري-پاتريوتتىق رۋحتا تاربيەلەۋ جانە «قازاقستان جولى — 2050» ستراتەگياسىن جۇزەگە اسىرۋعا ۇلەس قوسۋ. مەكتەپ جاس ۇرپاقتى وتانىن قورعاۋعا، ەلىن سۇيۋگە جانە ۇلتتىق قۇندىلىقتاردى قادىرلەۋگە باۋليدى.
مەرەيتويعا ارنالعان سالتاناتتى جيىندا زاپاستاعى پولكوۆنيك الىبەك دليموۆ ۇجىمدى قۇتتىقتاپ، اسكەري كادرلار دايارلاۋدا اتقارىلعان ەڭبەكتى جوعارى باعالادى.