الماتىدا ناتاليا ساس اتىنداعى مەملەكەتتىك اكادەميالىق ورىس بالالار مەن جاسوسپىرىمدەر تەاترىنىڭ اۋقىمدى جاڭعىرتۋ جۇمىستارى جالعاسۋدا، دەپ حابارلايدى aqshamnews.kz
كۇردەلى جوندەۋ كەزىندە تەاتردىڭ اتاقتى ۇجىمى قويىلىمدارىن قالالىق وقۋشىلار سارايىنىڭ جاڭارتىلعان ۇلكەن كونسەرت زالىندا قويادى. بۇل كەڭىستىك تولىقتاي جاڭارتىلىپ، ەرەكشە اكۋستيكا ساقتالىپ قالدى: دىبىس شاعىلىستىرۋشى توبە جۇيەسى قايتا ورناتىلىپ، زاماناۋي اينالمالى ساحنا مەحانيزمدەرى، جاڭا كۋليسالار، شىمىلدىق، جارىق جانە دىبىس قۇرىلعىلارى، سونداي-اق، ەلەكترمەن قامتۋ جۇيەسى جاڭارتىلدى.
جاڭا ساحنادا العاش قويىلعان سپەكتاكل – «كۇلشەقىز» ەرتەگىسى بولدى. قويىلىم كورەرمەندەردىڭ ىستىق ىقىلاسىنا يە بولدى.
«تەاتر ۇجىمى، ءبىزدىڭ ترۋپپا جانە كورەرمەندەرىمىز الماتى قالاسىنىڭ اكىمى ەربولات دوسايەۆقا تەاتر ونەرىنە دەگەن قۇرمەتى مەن ەلدەگى باستى بالالار تەاترىنا كورسەتكەن قامقورلىعى ءۇشىن العىس بىلدىرەدى. اكىمدىكتىڭ قولداۋى ارقاسىندا تەاترعا 44 جىلدان كەيىن العاش رەت كۇردەلى جوندەۋ جۇرگىزۋ تۋرالى شەشىم قابىلداندى»، – دەدى قازاقستاننىڭ حالىق ءارتيسى، تەاتر اكتريساسى ولگا كورجيەۆا.
وقۋشىلار سارايىنداعى قويىلىمدارمەن قاتار تەاتردىڭ تاريحي ساحناسىندا جوندەۋ جۇمىستارى قارقىندى ءجۇرىپ جاتىر: تىرەك قۇرىلىمدار كۇشەيتىلىپ، شاتىر مەن قاسبەتى جاڭارتىلۋدا، ساحنا، جارىق جانە دىبىس جۇيەلەرى تولىقتاي جاڭعىرتىلۋدا. عيماراتتىڭ تاريحي كەلبەتىن ساقتاۋ ەرەكشە نازاردا: ءمارمار ەدەندەر، ۆيتراجدار، موزايكالار مەن باسقا دا ساۋلەتتىك ەلەمەنتتەر قالپىنا كەلتىرىلۋدە. سونداي-اق، عيمارات مۇمكىندىگى شەكتەۋلى كورەرمەندەر ءۇشىن بەيىمدەلىپ جاتىر.
تەاتردىڭ نەگىزگى عيماراتىنىڭ جانىنان كامەرالىق ساحنا ورنالاساتىن بولەك عيمارات سالىنىپ جاتىر. وندا SATS COMMUNITY تەاتر ستۋدياسىنىڭ سىنىپتارى، شەبەرحانالار جانە گريم بولمەلەرى بولادى. ەكى كورپۋستى بىرىكتىرەتىن گالەرەيا سالىنادى.
جوندەۋ جۇمىستارى 2026 جىلدىڭ شىلدە ايىندا اياقتالادى دەپ جوسپارلانعان. سودان كەيىن تەاتر جاڭا بەينەسىندە — ساس — زاماناۋي ونەر ورتالىعى رەتىندە كورەرمەنگە جول تارتادى.
ال ازىرگە سۇيىكتى سپەكتاكلدەردى جاڭارتىلعان وقۋشىلار سارايىنان كورۋگە بولادى. كەلەسى قويىلىم — «برەمەن مۋزىكانتتارى» 22 مامىردا وتەدى. قويىلىم كەستەسىن تەاتردىڭ رەسمي رەسۋرستارىنان كورۋگە بولادى.
ن. ساس اتىنداعى تەاتر جاڭا جانە تۇراقتى كورەرمەندەرىن اسىعا كۇتەدى. كيەلى ساحنادا ونەر ماڭگى جاساي بەرمەك.