ناۋرىزباي اۋدانىنداعى وقۋشىلاردىڭ شىعارماشىلىق ورتالىعىندا ارداگەرلەر اراسىندا ەكىنشى دۇنيەجۇزىلىك سوعىستاعى جەڭىستىڭ 80 جىلدىعىنا ارنالعان تەاترلانعان ادەبي-مۋزىكالىق كەش ۇيىمداستىرىلدى.
اۋداندىق ارداگەرلەر كەڭەسى وسى ماڭىزدى وقيعاعا وراي، اۋماق (وكرۋگ ىقشاماۋداندارى) ارداگەرلەر اراسىندا كوركەمونەرپازدار بايقاۋىن ۇيىمداستىردى. اتالعان شارانىڭ ماقساتى – جاس ۇرپاقتى وتانشىلىققا رۋحتا تاربيەلەپ، ەل ءۇشىن ەرلىككە جەتەلەۋ. ەل باسىنا كۇن تۋعان، ات اۋىزدىعىمەن سۋ ىشكەن سول ءبىر سۇراپىل شاقتا مايدانداعى كەڭەس ساربازدارىنىڭ باتىرلىعىن دارىپتەپ، ەرلىگىن ەسكە الۋعا ارنالعان، ءتۇرلى قاۋىمداستىق اراسىنداعى ءوزارا تۇسىنىستىكتى نىعايتۋعا باعىتتالعان بۇل سايىستىڭ ءمانى باسقا سايىستان وزگەرەك.
باعدارلامادا ەكىنشى دۇنيەجۇزىلىك سوعىستاعى كەڭەس ساربازدارىنىڭ داڭقىنا ارنالعان، مايدانگەرلەردىڭ جانكەشتىلىگى مەن تاباندىلىعىن بەينەلەگەن، مۋزىكالىق جانە كوركەمدىك نومىرلەردى بەينەلەيتىن سكەچتەر قويىلدى. ونەر بايقاۋىنىڭ سوڭىندا ءادىلقازى القاسى ءبىرىنشى جۇلدەگە «قالقامان» ىقشاماۋدانى وكرۋگىنىڭ ارداگەرلەر توبى لايىقتى دەپ شەشىم قابىلدادى. «ب ا ق شابا ما، باپ شابا ما؟» دەگەن سول، تۇرعىنى تىعىز شوعىرلانعان اۋماق ونەرپازدارىنىڭ ونەرى ءادىل باعالاندى دەپ بىلەمىز.
«جەڭىستىڭ 80 جىلدىعى قارساڭىندا دايىنداعان مىنا شارامىز جاس جەتكىنشەكتەرگە وتانشىل رۋح، جالىن-جىگەر بەرەدى دەگەن ويدامىز. ەلباسىنا كۇن تۋعان سول سوعىس كەزىندەگى مايدان مەن ەل ءومىرىن بەينەلەيتىن سكەچ قويدىق. باس-اياعى ون بەس مينۋتقا سوزىلعان ۋاقىتتا كوركەمونەرىمىزدى كورسەتكەن اۋماعىمىزدىڭ ارداگەرلەرى مايدانداعى جانكەشتى جەڭىستى تىلداعى ەرەن ەڭبەكتىڭ جاقىنداتقانىن بەينەلەۋگە تىرىستى. سونىڭ ناتيجەسى بولار، ونەرىمىزدىڭ باعاسى اۋداننىڭ 8 وكرۋگى ىشىنەن ءتورتىنشى ساتىسىنان تابىلدى»، – دەيدى قاراعايلى وكرۋگى ارداگەرلەر كەڭەسىنىڭ ءتوراعاسى، جەلتوقسان قاھارمانى ءارىپ قابىلانوۆ.