اباي اتىنداعى قازاق ۇلتتىق وپەرا جانە بالەت تەاترىندا حاميت شانعالييەۆتىڭ «حان سۇلتان. التىن وردا» وپەراسىنىڭ پرەمەراسىنا ارنالعان باسپا ءسوز كونفەرەنسياسى ۇيىمداستىرىلدى.
اباي اتىنداعى قازاق ۇلتتىق وپەرا جانە بالەت تەاترى 29-30 قاراشا جانە 1 جەلتوقسان كۇنى ونەر سۇيەر قاۋىمعا التىن وردانىڭ نەگىزىن قالاعان جوشى حاننىڭ ەسىمىن ۇلىقتاۋ جانە جوشى ۇلىسىنىڭ ىرگەسى قالانعانىنا – 800 جىل تولۋىنا وراي «حان سۇلتان. التىن وردا» وپەرالىق سپەكتاكلىن ۇسىنادى.
ءىس-شاراعا جاڭا وپەرانىڭ قويىلۋىنا اتسالىسقان تۇلعالار – اباي اتىنداعى قازۇوبت ديرەكتورى اينۇر كوپباساروۆا، اباي اتىنداعى قازۇوبت باس ديريجەرى نۇرجان بايبوسىنوۆ، قويۋشى-رەجيسسەر داۆيدە ليۆەرمور، كومپوزيتور حاميت شانعالييەۆ، ليبرەتتو اۆتورى مارالتاي ىبىرايەۆ، كوستيۋم جونىندەگى باس سۋرەتشى اينۇر ەرىمبەتوۆا، اباي اتىنداعى قازۇوبت وپەرا ترۋپپاسىنىڭ كوركەمدىك جەتەكشىسى بولات بوكەنوۆ، بالەتمەيستەر اسەم ابديبەكوۆا جانە اباي اتىنداعى قازۇوبت باس حورمەيستەرi ءاليا تەمىربەكوۆا قاتىستى.
– وسى وپەرانى قويۋدى العاش رەجيسسەرعا ۇسىنعاندا تاريحىن تەرەڭنەن تارتقان جوشى ۇلىسىن، باي ءسالت-داستۇرىمىزدى، حالقىمىزعا ءتان قاسيەتتى، ادامي قۇندىلىقتى، وتباسى تاربيەسى مەن ايەلدىڭ قوعامداعى ءرولىن باسا كورسەتۋدى ۇسىندىم. مىسالى، حان سۇلتان سوناۋ شىڭعىس حان بيلەپ-توستەگەن زاماندا ۇلى دالا قىزىنا ءتان باتىلدىعىمەن، ەركىندىگىمەن، رەسەي كنيازدەرىمەن ديپلوماتيالىق قارىم-قاتىناس جۇرگىزگەن قابىلەتىمەن تاريحتا قالعان. وسىنداي تۇركى الەمىنىڭ انالارىن بۇگىنگى ۇرپاققا ناسيحاتتاۋ ءۇشىن، ءبىر جاعى ولارعا ءادىل باعا بەرۋ ءۇشىن ءبىز ۇلى دالانىڭ قايسار قىزدارىن ساحنالاۋدى جالعاستىرا بەرۋىمىز كەرەك دەپ ويلايمىن، – دەدى وسى قويىلىمنىڭ يدەيا اۆتورى، اباي اتىنداعى قازاق ۇلتتىق وپەرا جانە بالەت تەاترىنىڭ ديرەكتورى اينۇر كوپباساروۆا.
ال وپەرا كومپوزيتورى حاميت شانعالييەۆ دايىندىق جۇمىستارى كەزىندە كوپ ىزدەنگەنىن اتاپ ءوتتى.
– مەن وپەرانى جازۋ بارىسىندا كوپ وقىپ، كوپ ىزدەندىم. ءار جاڭا دەرەكپەن تانىسىپ، كوبىرەك وقىعان سايىن مەن ءۇشىن قويىلىمداعى كەيىپكەرلەردىڭ مىنەز- قۇلىقتارى مەن تۇلعالىق وبرازدارى پايدا بولا باستادى. ءسويتىپ، مۋزىكامىز جاقسارا بەردى، ءار كەيىپكەرگە سايكەس اۋەندى ءۇيلەستىردىك. قويىلىمنىڭ قانشالىقتى باعالى ەكەنى ۋاقىت وتكەن كەزدە تۇسىنىكتى بولادى دەپ ويلايمىن، – دەدى كومپوزيتور حاميت شانعالييەۆ.
ايتا كەتكەن ءجون، وپەرانىڭ باس كەيىپكەرى حان سۇلتان – ۇلىستىڭ نەگىزىن قالاۋشى جوشى حاننىڭ ءۇشىنشى ايەلى، التىن وردانىڭ ۇلى بيلەۋشىلەرىنىڭ ءبىرى – بەركە حاننىڭ اناسى. تاريحتا حان سۇلتان تۋرالى قالعان ازداعان دەرەكتىڭ ءوزى بۇگىنگى زەرتتەۋشىلەر مەن كوركەم شىعارماشىلىق وكىلدەرى ءۇشىن باعا جەتپەس قازىنا. حان سۇلتان بەينەسى – ءوزىنىڭ ەرەكشە تاعدىرىمەن دە قىمبات تۇلعا. وپەرا شىڭعىس حاننىڭ مۇسىلمان الەمىنىڭ ۇلكەن مادەنيەت وشاعى، تۇركىلەردىڭ قۇرعان ۇلكەن ساياسي بىرلەستىگى حورەزمشاح مەملەكەتىن جاۋلاۋ كەزەڭىنەن باستالىپ، التىن وردانىڭ العاش قالىپتاسا باستاعان كەزىمەن اياقتالادى.
