جانات ايتىلەۋ، قالا قۇرىلىسى كەڭەسىنىڭ مۇشەسى:
ساراپتامالىق قاۋىمداستىقپەن بىرلەسە كەلە، قالا قۇرىلىسى رەگلامەنتىنىڭ جوباسى قوعامدىق تالقىلاۋعا ءتۇستى.
الماتىنىڭ 2040 جىلعا دەيىنگى باس جوسپارىن ىسكە اسىرۋ اياسىندا قالا اكىمدىگى جاڭا قالا قۇرىلىسى رەگلامەنتىن ازىرلەدى. قۇجات جوباسى «اشىق نقا» سايتىندا ورنالاستىرىلعان، جاريا تالقىلاۋعا اركەز اشىق. البەتتە، قالا قۇرىلىسى رەگلامەنتىنىڭ بازالىق نورماسى جەلدى اۋماقتىڭ جاڭارتىلعان كارتاسىن، تۇرعىن ءۇي عيماراتىنىڭ بيىكتىگىنىڭ ناقتى پارامەترىن بەكىتۋدى، بيزنەستى دامىتۋعا قاجەت تۇرعىلىقتى اۋدانداعى ءبىرىنشى قاباتتى پايدالانۋ مىندەتتىلىگى مەن باسقا دا ماسەلەلەردى كوزدەيدى.
ساپالى قالا قۇرىلىسى رەگلامەنتىن ازىرلەۋ مەن قابىلداۋ – ماڭىزدى الەۋمەتتىك ءارى اكىمشىلىك مىندەتتىڭ ءبىرى. ولاي بولسا، مۇنىڭ ناقتى شەشىمى قىسقا مەرزىمدە الماتى قالاسىنىڭ تۇرعىندارىنا الەۋمەتتىك، ەكونوميكالىق، ساياسي جانە قوعامدىق پايدا اكەلمەك. دەمەك، بۇل جاعداي قالامىزعا جاقىن بارلىق وڭىردە ەكسپونەنسيالدى ەكونوميكالىق ءوسۋدىڭ مۋلتيپليكاتيۆتىك اسەرىمەن تۇراقتى ۇزاق مەرزىمدى دامۋدىڭ نەگىزىن قالاۋعا قابىلەتتى.
«دوڭگەلەك ۇستەل» ۇردىسىندەگى بۇل باسقوسۋدا ساراپشىلار جاڭا قالا قۇرىلىسى رەگلامەنتىنە بايلانىستى وزەكتى ماسەلەلەردى تالقىلادى. ولاردىڭ پىكىرى مەن ۇسىنىسى قالالىق ينفراقۇرىلىم مەن حالىقتىڭ قاجەتتىلىگىندەگى قارقىندى وزگەرىس جاعدايىندا ەرەكشە مانگە يە. اتاپ ايتقاندا، تالقىلاۋدىڭ ماڭىزدى اسپەكتىسى – ەكولوگيالىق نورمانى، سەيسميكالىق قاۋىپسىزدىكتى ساقتاۋ مەن جايلى قالالىق ورتانى قۇرۋ قاجەتتىلىگى.
«قالا قۇرىلىسى رەگلامەنتىنىڭ جوباسىنا قاتىستى قوعامدىق تالقىلاۋدا تۇيتكىلدى ءبىراز ماسەلە قامتىلدى. كوزدەگەن ماقسات – قالا قۇرىلىسى رەگلامەنتىنىڭ بازالىق نورمالارىنىڭ قاتاڭ ساقتالۋى. وسىعان دەيىن دە ايتقانىمىزداي، قالامىزدىڭ ءال فارابي داڭعىلىنىڭ بويىنا 18-20 قاباتتى ۇيلەر بوي كوتەرگەن. ەندىگى ماقسات – اتالعان داڭعىل بويىنا بيىكتىگى 12 مەتردەن (3 قابات) اسپايتىن ۇيلەر عانا سالۋ. ءال فارابي مەن اباي داڭعىلدارى ارالىعىندا سالىناتىن عيماراتتاردىڭ بيىكتىگى 25 مەتردەن (9 قابات) اسپاۋى ءتيىس. وسىنداي قاعيدات قاتاڭ ساقتالۋى قاجەت. قالامىزدىڭ بولاشاعى، تۇرعىنداردىڭ قاۋىپسىزدىگى بىزگە ينۆەستورلاردىڭ تالابىنان ماڭىزدى، – دەيدى قالا قۇرىلىسى كەڭەسىنىڭ مۇشەسى جانات ايتىلەۋ.