لۋدومانيا ويىنقۇمارلىق (گەمبلينگ، يگرومانيا) قۇمار ويىنعا تاۋەلدىلىك دەگەن ماعىنا بەرەدى.
شاريعاتتا كەز كەلگەن ويىنعا قۇمار ارالاسسا حارام، ۇلكەن كۇنا سانالادى («ءال-ماۋسۋاتۋ ءال-فيقھيا»: 39/407).
اللا تاعالا قۇراندا بىلاي دەيدى: «ۋا، يمان كەلتىرگەندەر! اقيقاتىندا اراق-شاراپ (سىندى ماس قىلىپ، اقىلىنان اداستىراتىن نارسەلەر)، قۇمار ءھام وزگە دە ۇتىس ويىندارى، تابىنۋ ءۇشىن ورناتىلعان پۇتتار جانە جەبەلەرمەن (قۇمالاق، كارتا سىندى باسقا دا نارسەلەرمەن) بال اشۋ – شايتاننىڭ لاس ىستەرىنەن. ەندەشە (ەكى دۇنيەدە دە) ماقسات-مۇراتتارىڭا جەتۋ ءۇشىن بۇلاردان اۋلاق بولىڭدار. شايتان سەندەردىڭ ارالارىڭا اراق، قۇمار ويىندارى ارقىلى دۇشپاندىق پەن جەككورۋشىلىك سالىپ جانە اللانى ەسكە الۋدان، نامازدان تىيۋدى كوكسەيدى. سەندەر سوندا دا دوعارمايسىڭدار ما؟» – دەگەن («ءمايدا» سۇرەسى، 90-91 اياتتار).
ساحابا ءابۋ ھۇرايرادان (اللا وعان رازى بولسىن) جەتكەن حاديستە پايعامبارىمىز (وعان اللانىڭ سالاۋاتى مەن سالەمى بولسىن): «بىرەۋ باۋىرىنا «كەل، قۇمار ويىن وينايىق» دەسە، ساداقا بەرسىن»، – دەگەن (بۇحاري). بۇل حاديس قۇمار ويناۋعا شاقىرۋدىڭ ءوزى كۇنا ەكەنىن مەڭزەيدى. ال ءجابير (اللا وعان رازى بولسىن) جەتكىزگەن كەلەسى حاديستە: «حارامنان وسكەن ەت (ياعني ادام) ءجانناتقا كىرمەيدى»، – دەگەن (يبن حيببان، №5567).
قۇمار ويىنعا تاۋەلدىلىك، ياعني لۋدومانيا، گەمبلينگ، يگرومانيانىڭ جەكە تۇلعاعا جانە قوعامعا تيگىزەر زاردابى اۋىر. ولار:
- قۇمار ويىنعا تاۋەلدىلىك وتباسىنىڭ شىرقىن بۇزىپ، ەلدىڭ بەرەكەتىن كەتىرەدى، قوعامدى قۇلدىراتادى؛
- ادامنىڭ ۋاقىتىن، مال-دۇنيەسىن زايا كەتىرىپ، قارىزعا باتىرادى؛
- ەكونوميكاعا كەرى اسەرىن بەرەدى، ادامنىڭ ءومىرىن تەك يلليۋزيامەن شەكتەيدى؛
- بويىن جالقاۋلىققا، ماسىلدىققا، جاۋاپسىزدىققا ۇيرەتىپ، اقشا ءۇشىن ارىن، نامىسىن ساتاتىن تومەن دارەجەگە تۇسىرەدى؛
- جەكە تۇلعانىڭ جۇيكەسىن توزدىرىپ، ءتىپتى وزىنە قول جۇمساۋعا (سۋيسيدكە) دەيىن الىپ بارادى؛
- قۇمار ويىننان ۇتىلعان ادامنىڭ ءوزىنىڭ سەرىكتەرىنە دەگەن كورەالماۋشىلىعى، كەكشىلدىگى ارتادى. وسىلايشا ارالارىندا دۇشپاندىق پايدا بولىپ، ءبىرىن-بىرى ولتىرۋگە دەيىن بارادى. قۇمار ويىنى ارقىلى تاپقان اقشا بىرەۋدىڭ اقىسىن جەۋ بولىپ سانالادى جانە ادال بولمايدى. يبن ابباستان جەتكەن ريۋاياتتا اللا ەلشىسى (وعان اللانىڭ سالاۋاتى مەن سالەمى بولسىن): «اللا تاعالا ءبىر قاۋىمعا ءبىر نارسەنى حارام ەتكەن بولسا، وندا ونىڭ اقشاسىن الۋدى دا حارام ەتتى»، – دەگەن (داراقۇتني،№318).
ءال-ازھاردىڭ بۇرىنعى شەيحى جاددۋ ءال-حاق قۇمار ويىندارعا قاتىستى: «قۇمار ويىننىڭ حارام بولۋ سەبەبىنىڭ ءبىرى – ادامنىڭ پسيحولوگياسىنا زيان كەلتىرۋى. قۇمار وينايتىن ادامنىڭ جەڭىل جولمەن اقشا تابامىن دەگەن قيالى ەڭبەك ەتۋدەن تىيىلۋعا، جالقاۋلىققا، اقىل-ويىنىڭ السىرەۋىنە الىپ بارادى. ەگىنشىلىككە، ونەركاسىپكە، ساۋدا-ساتتىققا ءمان بەرمەيدى. سالدارىنان ەكونوميكاعا كەرى اسەرى تيەدى. سونداي-اق شاڭىراقتىڭ شايقالۋىنا، بايدىڭ كەدەيگە اينالۋىنا سەبەپ بولادى. وعان قوعامدا ورىن الىپ جاتقان كوپتەگەن جاعداياتتار كۋا»، – دەپ ءپاتۋا بەرگەن.
ەگەر ويىنعا قۇمار ارالاسپاعاننىڭ وزىندە وعان اۋەستىگى قۇلشىلىعىنا كەدەرگى بولسا، ۋاقىتىن زايا كەتىرسە، پسيحيكاسى مەن بولمىسىنا زيان كەلتىرسە، ومىرلىك قاجەتتىلىكتەرىنە توسقاۋىل بولسا، سونداي-اق بالاعات سوزدەر ايتىپ، ۇرىس-توبەلەسكە الىپ بارسا، مۇنداي ويىنعا شاريعاتىمىزدا تىيىم سالىنادى.
ۇكىم:
- لۋدومانيا (گەمبلينگ، يگرومانيا) – حارام.
- قۇلشىلىققا، وتباسىلىق جانە باسقا دا قوعامدىق مىندەتتەرىنە كەدەرگى كەلتىرەتىن ويىن قۇمارلىققا تىيىم سالىنادى.