قاراساي اۋدانىندا جاقسىلىق ۇشكەمپىر ۇلى اتىنداعى جاڭا مەشىت اشىلاتىنىن بۇدان بۇرىن حابارلاعانبىز.
داڭقتى قازاق سپورتشىسى جاقسىلىق ۇشكەمپىر ۇلى ەسىمى بەرىلگەن مەشىتتىڭ اشىلۋ سالتاناتىنا قازاقستان مۇسىلماندارى ءدىني باسقارماسىنىڭ ءتوراعاسى ناۋرىزباي قاجى تاعان ۇلى ارنايى قاتىستى، دەپ حابارلايدى Almaty-akshamy.kz قمدب باسپا ءسوز قىزمەتىنە سىلتەمە جاساپ.
باس ءمۇفتي جىبەك جولى اۋىلى تۇرعىندارىن مەرەيلى ساتپەن قۇتتىقتاپ، مەشىت قۇرىلىسىنا دەمەۋشى بولعان ازاماتتارعا العىسىن ءبىلدىردى.
«مەيىرىمدىلىك مەكەنى، رۋحانيات ورداسى سانالاتىن مەشىتتى سالۋ ءۇشىن قاراجاتتان بۇرىن جومارت جۇرەك قاجەت. اللا تاعالا قاسيەتتى قۇراننىڭ «تاۋبە» سۇرەسىندە: «اللانىڭ مەشىتتەرىن شىنايى تۇردە اللاعا جانە اقىرەت كۇنىنە سەنگەن، نامازدى تولىق ورىنداعان، زەكەت بەرگەن، اللادان عانا قورىققان كىسىلەر كوركەيتەدى. مىنە، سولاردىڭ تۋرا جول تابۋشىلاردان بولۋى ءۇمىت ەتىلەدى» - دەيدى. ال ماڭداي تەرىمەن تاپقان تابىسىن مەشىت سالۋعا جۇمساعان ازاماتتارعا العىستان باسقا ايتارىمىز جوق.
بۇگىن سالتاناتتى تۇردە اشىلعالى تۇرعان بۇل مەشىتكە قازاقتىڭ ءبىر قايسارى، ەلىن سۇيگەن جايساڭى – جاقسىلىق ۇشكەمپىر ۇلى ەسىمى بەرىلىپ وتىر. قازاقستان مۇسىلماندارى ءدىني باسقارماسى سوڭعى جىلدارى ەلىمىزدە سالىناتىن مەشىتتەر مەن بۇرىننان بار قۇلشىلىق ۇيلەرىنە ەل مەن جەرگە، دىنگە قىزمەت ەتكەن اسىل ازاماتتاردىڭ ەسىمىن بەرۋدى يگى ۇردىسكە اينالدىرىپ كەلەدى. اللا تاعالانىڭ قالاۋىمەن وسى مەشىتكە جاقسىلىق ۇشكەمپىر ۇلى ەسىمى بۇيىرعان ەكەن، بەرەكەلى بولسىن. كوپشىلىك جاقسىلىق اعامىزدى سپورت مايتالمانى، قازاقتان شىققان تۇڭعىش وليمپيادا چەمپيونى رەتىندە تانيتىنى راس. ايتسە دە، اعامىز ءومىرىن تەك سپورتقا عانا ارنامادى. ەلدىڭ قامىن جەپ، جۇرتىنىڭ جايىن ويلادى. «قازاقتىڭ تامىرى – اۋىلدا» دەگەندى جان-تانىمەن تۇسىنگەن يگى جاقسىمىز ەدى. اللا تاعالا مەيىرىمىنە بولەپ، رۋحى پەيىشتە شالقىسىن! سوڭىندا قالعان ۇرپاعىنا ونەگەلى ءومىر، بەرەكەلى عۇمىر تىلەيمىز. ەسىمى بەرىلگەن وسى مەشىتتىڭ بىرلىگى جاراسقان جاماعاتى كوپ بولعاي. جاقسىلىق اعامىزداي ەلىن سۇيگەن، ەلى سۇيگەن ەرەندەر وسى وڭىردەن شىعا بەرسىن. ءامين!» دەدى قمدب ءتوراعاسى.