جاس كۇيشى تيمۋرلان ۆاسيليەۆ جۋىردا جاڭا بەلەستى باعىندىردى. 17 ماۋسىمدا تۇركيا ەلىنىڭ ستامبۋل قالاسىندا 7-10 جاس ارالىعىنداعى بالالار اراسىندا دومبىرادان وتكەن حالىقارالىق بايقاۋدان گران-پري يەلەنىپ قايتتى. ونىڭ كوپ بالانىڭ ىشىنەن جۇلدىزىن جاققان «سەكىرتپە» (اۆتورى ابدۋلحاميت رايىمبەرگەنوۆ) مەن «ەركە سىلقىم» (اۆتورى ءابدىمومىن جەلدىبايەۆ) كۇيلەرى بولدى.
قازاقشاسى سۋداي توعىز جاستاعى تيمۋرلان الماتىداي الىپ شاھاردا دۇنيەگە كەلگەن. دومبىرادا شەبەر وينايدى. اكە-شەشەسى دە ونەرلى جاندار. اناسى شوحنوزا قۇربانوۆا – حالىقارالىق دارەجەدەگى سپورت شەبەرى، الەم، ەۋروپا جانە باسقا دا حالىقارالىق جارىستاردىڭ بىرنەشە دۇركىن جەڭىمپازى جانە جۇلدەگەرى. بۇگىندە «سپورتتى دامىتۋ ديرەكسياسىندا» سپورتشى-نۇسقاۋشى بولىپ ەڭبەك ەتىپ ءجۇر. اكەسى ۆالەريي اناتوليەۆيچ تە سپورتشى. سۋ استى سپورتى جانە قازىرگى بەسسايىستان قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى. ول دا «سپورتتى دامىتۋ ديرەكسياسىندا» سۋ استى سپورتىنان اعا جاتتىقتىرۋشى بولىپ ەڭبەك ەتەدى.
وسىنداي جانداردان تۋعان كىشكەنتاي تيمۋرلان تۋرالى اڭگىمە ءتىپتى بولەك. ول جۋىردا مەگاپوليستەگى №183 جالپى ءبىلىم بەرەتىن مەكتەپتىڭ 2 ا سىنىبىن ۇزدىك ءبىتىردى. ورىس بالاسى قازاق سىنىبىندا وقيدى.
ءۇش جاسىنان بەرى اتا-اناسىنىڭ توبىندا جۇزۋمەن اينالىسىپ كەلەدى. وسىناۋ كىشكەنتاي بالدىرعان قازاقستاننىڭ ءانۇرانىن شەتەل تورىندە بىرنەشە مارتە جەلبىرەتتى. ماسەلەن، بىلتىر تايلاندتا وتكەن بالالار اراسىنداعى حالىقارالىق تۋرنيردە پحۋكەت وزەنىندە جۇزۋدەن 100 م قاشىقتىقتا جەڭىمپاز اتانىپ، جەڭىسىنە وراي قازاقستان رەسپۋبليكاسىنىڭ ءانۇرانى شىرقالدى. 4*50 م ەستافەتاسىندا دا تاعى دا جەڭىس ءۇشىن ەلىمىزدىڭ ءانۇرانى شارىقتادى.
تيمۋرلان جۇزۋمەن اينالىسقان ءتورت جىلى ىشىندە باس-اياعى 22 مەدال جەڭىپ العان.
كىشكەنتاي بولسا دا ۇلكەن دە اۋىر مەدالداردى كوتەرىپ جۇرگەن كەۋدەلى، جاقسىلىققا ۇمتىلىپ جۇرەتىن، جاڭاشىلدىققا قۇمار تيمۋرلان بيىل ەكىنشى جىل «روبوتوتەحنيكا» ستۋدياسىندا وقىپ جاتىر. تىڭنان تۇرەن سالىپ، جاڭالىقتار اشقىسى كەلەدى. ول ءقازىردىڭ وزىندە «لەگودان» روبوتتار، ءتۇرلى كولىكتەر، قايىقتار، عيماراتتار جانە باسقا دا فانتاستيكالىق جوبالار قۇراستىرا بىلەدى.
جان-جاقتى بالا جانىنا قازاقتىڭ قوڭىر دومبىراسىن دا سەرىك ەتكەن. تورىندە اتا-اناسى الىپ بەرگەن دومبىراسى تۇرادى. قۋانعاندا نەمەسە ءسال جابىرقاپ قالسا، دومبىراسىنىڭ قۇلاق كۇيىن كەلتىرىپ، كۇي توگەتىنى بار. 2021-2023 جىلدار ارالىعىندا رەسپۋبليكالىق جانە قالالىق دومبىرا بايقاۋلارىنىڭ بىرنەشە دۇركىن جەڭىمپاز اتاندى.
بارەكەلدى! قازاق ەلىندە قازاقشا ءبىلىم الىپ، قازاقتىڭ قاسيەتتى دومبىراسىن سەرىك ەتكەن بالدىرعانعا ساتتىلىكتەر تىلەيمىز.