كوپ ادام "كومەك سۇراۋ" السىزدىك پەن وسالدىقتىڭ بەلگىسى دەپ ويلايدى. پسيحولوگ ەكاتەرينا تۋر مۇنىڭ استارىندا نە جاتقانىن جانە ىشكى توسقاۋىلدى قالاي ەڭسەرۋگە بولاتىنىن ءتۇسىندىردى، - دەپ حابارلايدى اqshamnews.kz ءتىلشىسى.
بالا كەزدەن قالىپتاسقان ۇستانىم
كوپشىلىگىمىز "ءوزىڭ ىستە!"، "جىلاما!" دەگەن تاربيە كورىپ وستىك. ادەتتە نيەتى ءتۇزۋ اتا-انا بالاسىنىڭ ەموسياسىن (رەنىش، قورقىنىش، ابدىراۋ) اشىق بىلدىرۋىنە تىيىم سالادى. وسىدان "كومەك سۇراۋ - ۇيات" دەگەن سەنىم بەكىپ قالادى. ەسەيگەندە بۇل ادەتكە اينالىپ، مانساپتىڭ وسۋىنە دە، باقىتتى بولۋعا دا كەدەرگى جاسايدى:
- ادام جۇمىستا تاپسىرمالاردى بولۋگە قورقىپ، ارتىق جۇمىس ىستەيدى، ناتيجەسىندە كۇيىپ-جانادى؛
- قارىم-قاتىناستا ايتىلماعان ماسەلەنى ىشىنە جۇتىپ، "يدەال" بولىپ كورىنۋگە تىرىسادى، بۇل اقىرى تەرەڭ داعدارىسقا اكەلۋى مۇمكىن.
- شىنايى سەزىمىن ايتا الماي، قولداۋ سۇراي الماۋ - جالعىزدىقتى اسىرەلەيتىن فاكتور: وتباسىنىڭ ورتاسىندا ءجۇرىپ تە، ۇجىمدا ءجۇرىپ تە ادام ءوزىن جالعىز سەزىنگەندەي بولادى.
ۇزاققا سوزىلعان سالدار
بۇل ماسەلە دەنساۋلىققا زيان تيگىزەدى. ۇيقىسىزدىق، مازاسىزدىق، ۇرەي، قىسىمنىڭ اۋىتقۋى، يممۋنيتەتتىڭ تومەندەۋى - سونىڭ كورىنىسى. ەموسياعا ەرىك بەرىلمەسە، ادام الكوگولگە، كومپۋلسيۆ ادەتتەرگە بەيىمدەلۋى مۇمكىن. كوپ جىل "وزگەنىڭ تالابىمەن" ءومىر سۇرگەنىن تۇسىنگەن ءسات اۋىر كۇيزەلىس پەن موتيۆاسيانىڭ جوعالۋىنا الىپ كەلەدى. ءتىپتى ينفاركت/ينسۋلت سياقتى دەرتتەرگە دەيىن اپارادى.
قالاي ەڭسەرەمىز؟
- كومەككە مۇقتاجدىق - تابيعي پروسەسس. پسيحولوگقا بارۋ - جەڭىلۋ ەمەس، وزىڭە قامقور بولۋ. ماماندار بالا كەزدەگى اۋىر جاعدايلاردى ەڭسەرۋگە، ەموسيانى رەتتەۋ داعدىلارىن ۇيرەتۋگە، شەكارا مەن كوممۋنيكاسيا قۇرۋعا كومەكتەسەدى.
- از-ازدان باستاڭىز: سەنىمدى ادامعا ىشىڭىزدەگىنى ءبولىسىڭىز. جۇمىستا ءوتىنىشتى "شاعىم" ەمەس، تاپسىرما فورماسىندا ايتىڭىز: "سەنىڭ ەكسپەرتيزاڭ قاجەت"، "مىنانى تيىمدىرەك قالاي ىستەيمىز؟".
- ەموسياڭىزدى تانۋدى جانە اتاۋدى، سەزىنۋدى ۇيرەنىڭىز.
- قولدايتىن ورتامەن كوبىرەك ارالاسىڭىز.