«تازا قازاقستان» اكسياسى اياسىندا ىلە الاتاۋى مەملەكەتتىك ۇلتتىق تابيعي پاركىنىڭ كوكجايلاۋ شاتقالىندا «Halyk ورمانى» جوباسى باستالدى. جوبانى «Halyk» قورى ەكولوگيا جانە تابيعي رەسۋرستار مينيسترلىگىمەن بىرلەسىپ ىسكە قوستى. بۇل باستاما ەكولوگيالىق جاعدايدى جاقسارتۋعا، قوعامنىڭ ەكولوگيالىق مادەنيەتىن ارتتىرۋعا، تابيعاتتى قورعاۋعا جانە جاسىل جەلەكتەر سانىن ارتتىرۋعا باعىتتالعان. 5 جىلعا ەسەپتەلگەن جوباعا 1 ميلليارد تەڭگە بولىنگەن. وسى ۋاقىت ىشىندە ەلدىڭ ءۇش وڭىرىندە 4 ميلليوننان اسا اعاش وتىرعىزۋ جوسپارلانىپ وتىر.
يدەيا كوكتەمدە وتكەن GreenAct ەكوچەللەندجىنەن باستاۋ العان. سول كەزدە ەلدىڭ تۇكپىر-تۇكپىرىندە مىڭداعان ادام – وقۋشىلار، كومپانيا قىزمەتكەرلەرى، جاي عانا بەلسەندى ازاماتتار ساياباقتاردى تازالاپ، قوقىستى سۇرىپتاپ، كوشەت وتىرعىزدى. ەندى باستاما ۇزاق مەرزىمدى ەكوباعدارلاماعا اينالدى.
ەكواكسياعا ەكولوگيا جانە تابيعي رەسۋرستار ۆيسە-مينيسترى نۇركەن شاربييەۆ، بەلگىلى ەكولوگ مەلس ەلەۋسىزوۆ، ق.ساتبايەۆ اتىنداعى قازاق ۇلتتىق تەحنيكالىق ۋنيۆەرسيتەتىنىڭ رەكتورى مەيرام بەگەنتايەۆ، ىلە الاتاۋى ۇلتتىق پاركىنىڭ قىزمەتكەرلەرى، ەرىكتىلەر، ەكولوگيا جاناشىرلارى، ب ا ق وكىلدەرى، الماتى قالاسى جوو ستۋدەنتتەرى مەن وقۋشىلارى، جالپى سانى 600-دەن استام ادام قاتىستى.
ىلە الاتاۋى مەملەكەتتىك ۇلتتىق تابيعي پاركىنىڭ ديرەكتورى ەلنۇر احمەتوۆتىڭ ايتۋىنشا، تاۋداعى ورمان قورىن كوبەيتۋ جۇمىستارى الداعى ۋاقىتتا دا جۇيەلى تۇردە جالعاسىن تابادى. 1 گەكتار جەرگە ەگىلگەن 625 شىرشا ۇلتتىق پارك قىزمەتكەرلەرىنىڭ ءجىتى قاداعالاۋىمەن وتىرعىزىلدى. ءار قىزمەتكەر اعاش ەگۋ ەرەجەسىن كورسەتىپ، ءتۇسىندىرىپ بەردى.
اكسياعا جاسى ۇلكەندەر دە اتسالىستى. الماتى تۇرعىنى، زەينەتكەر ايگۇل اپاي تابيعاتقا جاناشىرلىقتى ۇرپاق تاربيەسىنىڭ ءبىر بولىگى دەپ ەسەپتەيدى: «جاستارعا سوزبەن ەمەس، ىسپەن ۇلگى بولۋىمىز كەرەك. اعاش ەگۋ – بۇرىننان كەلە جاتقان جاقسى ءداستۇر. وسىنداي باستامالار ءجيى بولسا ەكەن. اكسيا تۋرالى الەۋمەتتىك جەلىدەن ءبىلىپ كەلدىك. ءوز قولىمىزبەن ەككەن اعاش ەرتەڭ جايقالىپ ءوسىپ كەتسىن دەپ تىلەيمىز! يگىلىكتى ىسكە ۇلەس قوسقانىمىزعا قۋانىشتىمىز!»، – دەدى ول.
شارا بارىسىندا ەرىكتىلەر مەن تابيعاتقا بەيجاي قارامايتىن بارلىق جاندار حالىقتى «Halyk ورمانى» جوباسىنا قوسىلۋعا شاقىردى. ءاربىر ادامنىڭ قولداۋى ەلدەگى جاسىل ايماقتاردىڭ ارتۋىنا جانە ەكولوگيانى ساقتاۋعا مۇمكىندىك بەرەرى ءسوزسىز. جاستار اراسىندا ەكولوگيالىق مادەنيەتتى دامىتۋعا، جاس ۇرپاقتى تابيعاتتى ايالاۋعا شاقىرعان ەكواكسيا جاي عانا اعاش وتىرعىزۋ ەمەس، الماتى قالاسىنىڭ ەكولوگيالىق جاعدايىن جاقسارتۋعا، قازاقستان تابيعاتىن ساقتاۋ مەن قورعاۋعا جاسالعان اۋقىمدى ماڭىزدى قادام بولدى.
تاقىرىپقا وراي:
نۇركەن شاربييەۆ،
ەكولوگيا جانە تابيعي رەسۋرستار ۆيسە-مينيسترى:
– جوبانىڭ العاشقى كەزەڭى شىعىس قازاقستانداعى «سەمەي ورمانى» اۋماعىندا باستالدى. جۇزدەگەن گەكتار ورتەنگەن ايماققا العاشقى 800 كوشەت ەگىلدى. ەندى مىنە – ىلە الاتاۋىندا جالعاسۋدا. مۇندا 5 گەكتار اۋماققا 14 مىڭ شرەنك شىرشاسى وتىرعىزىلادى. ال بۇگىن كوكجايلاۋ شاتقالىندا 625 ءتۇپ اعاش بوي تۇزەيتىن بولادى. قازىرگى تاڭدا ەلىمىزدە «تازا قازاقستان» اكسياسى ءوتىپ جاتىر. جالپى ءبىر جىلدا 996 ەكولوگيالىق شارالار ءوتتى. وعان 4 ملن 200 مىڭ ادام قاتىستى. اۋقىمدى شارالار اياسىندا رەسپۋبليكا اۋماعىندا 2،5 ميلليونعا جۋىق كوشەت وتىرعىزىلىپ، 600 توننا قوقىس تازالاندى. ەلىمىزدىڭ ءار وڭىرىندە وسى سىندى اكسيالار جالعاسىن تابۋدا. بۇگىن ىلە الاتاۋى ۇلتتىق پاركىنىڭ اۋماعىنىڭ ەڭ ادەمى، ەڭ كورىكتى كوكجايلاۋ شاتقالىندا ءوتىپ جاتقان شاراعا كۋا بولىپ وتىرمىز. تابيعاتتى قورعاۋ – ءبىر رەتتىك ءىس-شارا ەمەس، قورشاعان ورتانى قورعاۋ مادەنيەتىن قالىپتاستىرۋ. ءبىز تابيعاتقا جاناشىرلىق تانىتپايىنشا، ەكونوميكالىق ءوسىم دە ۇزاققا بارمايدى. «Halyk ورمانى» جانە وسىنداي جوبالار – ەكولوگيالىق مادەنيەتتى ءومىرىمىزدىڭ تابيعي بولىگىنە اينالدىرۋ جولىنداعى ماڭىزدى قادام.
داۋرەن سارتايەۆ،
Halyk باسقارما ءتوراعاسىنىڭ ورىنباسارى:
– «Halyk ورمانى» جوباسى سەمەيدە باستالىپ، ودان كەيىن استانادا، بۇگىن الماتىدا جالعاسىن تاپتى. بۇل اكسيا جاستار ءۇشىن، العاشقى قاتىسۋشىلار ءۇشىن تاجىريبە بولۋى مۇمكىن. اۋامىز تازا، تاۋىمىز جاسىل، اعاشتار كوپ بولسىن. وسى شاراعا قاتىسىپ، قولداعاندارىڭىز ءۇشىن العىس ايتامىن.
ەلنۇر احمەتوۆ،
ىلە-الاتاۋى مەملەكەتتىك ۇلتتىق تابيعي پاركىنىڭ باس ديرەكتورى:
– اعاش ەگۋ اكسياسى «Halyk» قورى، ەكولوگيا جانە تابيعي رەسۋرستار مينيسترلىگى جانە ىلە الاتاۋى ۇلتتىق تابيعي پاركىنىڭ ءوزارا كەلىسىمىنە بايلانىستى جۇزەگە استى. «Halyk ورمانى» جوباسى بارىسىندا 1 گەكتار جەرگە 625 شىرشا وتىرعىزىلدى. شرەنك شىرشاسى – الماتى قالاسى ىلە الاتاۋى بوكتەرىنە، تيان-شان تاۋ سىلەمدەرىنە بۇرىننان جەرسىنىپ كەلەدى. جالپى، ۇلتتىق پارك اۋماعىندا «تازا قازاقستان» جالپىۇلتتىق جوباسىن ىسكە اسىرۋ بويىنشا 97 600 ادامدى قامتىعان 249 ءىس-شارا وتكىزىلدى. ءىس-شارا ناتيجەسىندە 8 200 ءتۇپ اعاش وتىرعىزىلىپ، 11،5 توننا قوقىس جينالدى. سونداي-اق، قورشاعان ورتانى قورعاۋ جانە قالدىقتاردى باسقارۋ بويىنشا 2025 جىلدىڭ 9 ايىندا پارك اۋماعىنان 886 توننا قاتتى تۇرمىستىق قالدىقتار شىعارىلسا، قاتتى تۇرمىستىق قالدىقتاردى بولەك جيناۋ ءۇشىن 32 جابىق الاڭعا قوقىس جيناۋعا ارنالعان 365 كونتەينەر ورناتىلدى.