"شانشار" ءازىل-ىسقاق تەاترىن بىلمەيتىن قازاق جوق شىعار؟! اسىرەسە ميللەنيال بۋىن ۋاليبەك ءابدىرايىموۆ جەتەكشىلىك ەتكەن تەاتردىڭ ءار قويىلىمىن جاتقا بىلەدى. ەل اراسىندا "شانشاردىڭ" شىندىققا اينالعان ازىلدەرى جەلدەي ەسىپ، جەلى قولدانۋشىلارى تاڭدانىستارىن جاسىرمادى. اqshamnews.kz ءتىلشىسى نوستالگيا جاساپ، جۇرت جادىندا جاتتالعان ازىلدەردى ەسكە ءتۇسىرىپ كوردى.
"قارنىڭ اشسا، بالىق اۋلاپ جە!"
بۇل "شانشار" تەاترىنىڭ سۋ تاسقىنى جايلى ءسوز ەتىلەتىن "جۇزبە-جۇز" اتتى قويىلىمىنداعى تانىمال تىركەس. شەنەۋنىكپەن سۇحبات رەتىندە كورسەتىلەتىن قويىلىم بيلىكتىڭ تاسقىن كەزىندەگى "شاراسىزدىعىن" استىرتىن سىنعا الادى. بۇل قويىلىم 2005 جىلى ساحنالاعان ەدى.
بۇل ءازىلدى كوپشىلىك 2024 جىلى بولعان ەلدەگى سۋ تاسقىنىمەن بايلانىستىرادى.
ەسكە سالايىق، 2024 جىلدىڭ كوكتەمىندە قازاقستاندا كەيىنگى ونداعان جىلداعى ەڭ اۋقىمدى سۋ تاسقىنى بولدى. پرەزيدەنت توقايەۆ بۇل اپاتتى ەلدەگى "سوڭعى 80 جىلداعى ەڭ ءىرى اپات بولۋى مۇمكىن" دەپ اتاعان ەدى. 10 وڭىردە توتەنشە جاعداي جاريالانىپ، 118 200 ادام ەۆاكۋاسيالاندى. ولاردىڭ 44 300ء-ى – بالالار. شامامەن 6 000 ءۇي سۋ استىندا قالدى، ال 18 ءساۋىر دەرەگى بويىنشا كەمىندە 7 ادام قازا تاپتى.
اكتەر نۇرجان تولەندييەۆ بۇل قويىلىم جايلى ءبىر پىكىرىندە:
"حابارلاسىپ وتىرعان ايەل "اشپىز" دەسە، "نانعا ماي جاعىپ جە" دەيدى. بىلاي ءقاراساڭى ءازىل بولعانىمەن، اشۋىڭا، شامىڭا تيەتىن اڭگىمە عوي. بۇل - ساتيرا"، - دەگەن ەدى وسى قويىلىمداعى اكتەر تولەندييەۆ.
سۋرەت: sarinform.ru
قايىرىمدىلىق قورلارى تۋرالى 15 جىل بۇرىنعى "شىندىق"
"شانشار" قايىرىمدىلىق قورلارى جايلى تاقىرىپتى دا وسىدان 15 جىل بۇرىن قاۋزاعان ەكەن. نۇرجان تولەندييەۆ پەن نۇرجان قۇلشىنبايەۆ باستى رولدە وينايتىن قويىلىمدا وتباسى جالعان جاعدايى جوق وتباسى كەيپىن تانىتىپ، قايىرىمدىلىق قورىنان اقشا ءوندىرۋدى كوزدەيدى.
بۇل قويىلىم جۇرتقا بىلتىرعى پەريزات قايراتتىڭ شۋلى وقيعاسىن ەسكە سالدى.
پەريزات قايرات 2021 جىلدان 2024 جىلعا دەيىن ءتۇرلى قايىرىمدىلىق اكسيالارى ارقىلى جالپى سوماسى 3،5 ميلليارد تەڭگە كولەمىندە قاراجات جيناپ، ونى ءوز پايداسىنا جاراتقانى ءۇشىن كىنالى دەپ تانىلدى. شىلدەدە وعان قاتىستى سوت ۇكىمى شىعىپ 10 جىلعا سوتتالعان ەدى. پەريزات قايرات جىمقىرعان قاراجاتتار نەگىزىنەن بالالارعا، سۋ تاسقىنىنان زارداپ شەككەندەرگە جانە پالەستينا حالقىنا كومەك كورسەتۋ ءۇشىن جينالعان دەپ كورسەتىلگەن.
سۋرەت: tengrinews.kz/سانجار مۋستافين
"اق تىرنا" "شالاباي اتالاعان" ءتاۋىپتى مەڭزەگەن بە؟
2009 جىلى ساحنالانعان "اق تىرنا" سكەچىنىڭ اۆتورى - نۇرجان تولەندييەۆ. اكتەر بۇل قويىلىمنىڭ قالاي جازىلعانى جايلى بىلايشا اڭگىمەلەيدى.
"سول جىلى تۇركىستاندا ياسساۋي بابامىزدىڭ كەسەنەسى ماڭىندا ءبىر توپ اق كيىمدى ادامداردى بايقادىم. 300-گە جۋىق ادام قولدارىنا اق تۋ ۇستاپ، كەسەنەگە قاراي بەت الىپ بارا جاتىر ەكەن. نە ىستەيتىندەرىن كورەيىنشى دەپ، بىرگە ىلەستىم. ءبىر كەزدە ىشىندەگى بىرەۋى توقتاماي تاقپاق وقىدى. سول ءساتتى جاتتاپ الىپ، تەاترعا كەلىپ، ساحنالاۋ كەرەك دەدىم. جۇلدىزايعا (جۇلدىزاي دۇيسەنبييەۆا - اكتريسا - ەسك.) ايتىپ ەدىم، ول اينىتپاي سالىپ بەردى"، - دەدى تولەندييەۆ بۇرىن بەرگەن سۇحباتتارىنىڭ بىرىندە.
ال قازاقستاندىقتار بۇل ءازىلدى ەمشى ۇلىقبەك سمانوۆتىڭ وقيعاسىمەن بايلانىستىردى. شىمكەنتتەن شىققان ەمشى بالالار ۇيىنەن اسىراپ العان بالالاردى ءۇش جىل بويى يت پەن مىسىقتىڭ ەتىمەن تاماقتاندىرىپ، ءتۇرلى قورلىق كورسەتكەنى ءسوز بولعان ەدى. بىلتىر سمانوۆتىڭ جەلىدە "شالاباي اتامنىڭ ءارۋاعى" دەپ ءان سالىپ، بىرنەشە ادامدى "ەمدەپ" جاتقان بەينەسى تاراپ، جۇرتتى شۋلاتقان بولاتىن.
"كينو تۇسىرەمىز": دجەكي چان شىنىمەن قازاقستاندىق فيلمدە ويناماق
تولەندييەۆ تاراتقان تاعى ءبىر تانىمال ءازىل - "رەجيسسەر" قويىلىمى. اكتريسا جۇلدىزاي دۇيسەنبييەۆامەن بىرگە وينايتىن قويىلىمدا دجەكي چان، توم كرۋز سىندى تانىمال اكتەرلەردى فيلمگە تۇسىرەتىنى جايلى ايتىلادى. بۇل كورىنىس تە 2009 جىلى قويىلعان ەدى.
"شانشار"-دىڭ بۇل ءازىلى دە شىندىققا اينالىپ بيىل ايگىلى اكتەر دجەكي چان قازاقستانعا كەلىپ، وتاندىق مەدياكومپانيانىڭ جوباسىندا بوي كورسەتپەك. مەدياكومپانيانىڭ مالىمەتىنشە، الەمدىك كينو اڭىزىنىڭ قاتىسۋىمەن قازاقستاندا ايگىلى “قۇدايدىڭ ساۋىتتارى” ءفيلمىنىڭ جاڭا ءبولىمى تۇسىرىلەدى.
"ءبىز دجەكي چاننىڭ الماتىعا كەلگەن رەزونانستى ساپارىنىڭ ءمان-جايىن رەسمي تۇردە اشامىز. بۇل كۋلتتىك فرانشيزانىڭ جاڭا ءفيلمى - “قۇدايدىڭ ساۋىتتارى: ۋلتيماتۋم” جوباسىنا بايلانىستى"، - دەلىنگەن كومپانيا حابارلاماسىندا.
