بيىل ۇلى دالا رۋحىنىڭ شامشىراعى، قازاق رۋحانياتىنىڭ تەمىرقازىعى، ۇلى اقىن، ويشىل-عۇلاما اباي قۇنانباي ۇلىنىڭ تۋعانىنا 180 جىل تولىپ وتىر. وسى مەرەيتوي اياسىندا ەلىمىزدىڭ ءار وڭىرىندە اباي مۇراسىن دارىپتەۋگە ارنالعان عىلىمي-تانىمدىق، رۋحاني-اعارتۋشىلىق ءىس-شارالار كەڭىنەن وتكىزىلىپ كەلەدى.
وسىنداي تاعىلىمى مول ءىس-شارالاردىڭ ءبىرى – №202 مەكتەپ-گيمنازياسىنىڭ ۇيىمداستىرۋىمەن وتكەن «ادامزاتتىڭ ابايى» اتتى اۋداندىق سەمينار. سەمينارعا اۋەزوۆ اۋدانىنىڭ كىتاپحانا باسشىلارى مەن اۋدانداعى 32 مەكتەپتىڭ كىتاپحانا قىزمەتكەرلەرى جانە ۇستازدار قاۋىمى قاتىستى.
جيىننىڭ ماقساتى – ويشىل، كەمەڭگەر تۇلعا ابايدى تەرەڭ تانۋ، ونىڭ مۇراسىن ناسيحاتتاۋ، جاستاردىڭ جۇرەگىنە ءسىڭىرۋ، وقىرمان ساناسىنا جەتكىزۋ جانە ادامدىقتىڭ بيىك ۇلگىسىنە ۇمتىلۋ بولدى.
ابايدىڭ ويلارى تەك قازاق قوعامىنا ەمەس، بۇكىل الەم جۇرتشىلىعىنا ورتاق. ول ادام بالاسىن ۇلتقا، دىنگە، ناسىلگە بولمەي، «ادامزاتتىڭ ءبارىن ءسۇي، باۋىرىم دەپ» دەگەن گۋمانيستىك يدەياسىن ۇسىندى. بۇل ۇستانىم بۇگىنگى جاھاندانۋ داۋىرىندە اسا وزەكتى. قازىرگى قازاق ەلىنىڭ رۋحاني دامۋى مەن ۇلتتىق جاڭعىرۋىنىڭ نەگىزىندە دە اباي مۇراسى جاتىر.
پرەزيدەنت قاسىم-جومارت توقايەۆتىڭ:
«ابايدىڭ وي-تۇجىرىمدارى جاڭا قازاقستان قوعامىنىڭ قاعيداتتارىمەن ۇندەس»، –
دەگەن ءسوزى سونىڭ دالەلى.
ۇلى ابايدىڭ يدەيالارىن ۇجىمدىق رۋح پەن تاربيەنىڭ تىرەگىنە اينالدىرۋ جولىندا ەڭبەك ەتىپ جۇرگەن مەكتەپ ديرەكتورى بولات جانايحان ۇلى «كىتاپحانا – ءبىلىم مەن مادەنيەتتىڭ قاينار كوزى» دەگەن ۇستانىمدى باسشىلىققا الا وتىرىپ، بيىلعى وقۋ جىلىن جاڭا جەتىستىكپەن قارسى الدى. ول مەكتەپ كىتاپحاناسىن زاماناۋي ۇلگىدە جابدىقتاۋعا قول جەتكىزدى.
بۇگىنگىدەي اقپارات تاسقىنى زامانىندا «كىتاپ – ادامنىڭ اقىل-ويىن دامىتاتىن ەڭ جاقسى دوس» ەكەنىن جاس جەتكىنشەكتەردىڭ ساناسىنا ءسىڭىرۋ ماقساتىندا جۇيەلى جۇمىستار جۇرگىزىلىپ كەلەدى. سونىڭ ءبىرى – اۋداندىق سەميناردى مەكتەپ ديرەكتورى بولات جانايحان اشتى.
ابايدىڭ ءاربىر تۋىندىسى – تەرەڭ ويدىڭ، شەكسىز ءبىلىمنىڭ جانە ۇلت رۋحىنىڭ كورىنىسى. سەمينار بارىسىندا قاتىسۋشىلارعا ابايدىڭ ءومىرى مەن شىعارماشىلىعىنا ارنالعان بەينەروليك ۇسىنىلدى.
اباي – تەك اقىن عانا ەمەس، ول – سازگەر. ونىڭ مۇڭلى دا سىرلى اۋەندەرى جۇرەككە جول تاۋىپ، حالىق جادىندا ساقتالىپ كەلەدى. وقۋشىلار ورىنداعان اباي اندەرىنەن قۇرالعان پوپۋرري مەن «مەن جازبايمىن ولەڭدى ەرمەك ءۇشىن» اتتى پوەزيا مينۋتىنداعى اباي ولەڭدەرى قاتىسۋشىلاردىڭ زور ىقىلاسىنا بولەندى.
ۇلى اقىنعا دەگەن حالىقتىڭ قۇرمەتى مەن سۇيىسپەنشىلىگى ەشقاشان سونگەن ەمەس. ابايدىڭ دانا سوزدەرى – ءار قازاقتىڭ جۇرەگىندە.
ۇلى ويشىلعا دەگەن ىقىلاس پەن قۇرمەتتىڭ بەلگىسى رەتىندە مەكتەپ ماقتانىشى، ەكى دۇركىن رەسپۋبليكالىق عىلىمي جوبا بايقاۋىنىڭ جەڭىمپازى، «الماتى دارىنى» ورتالىعىنىڭ امباسسادورى تەمىرحان ايبار وقىعان ابايعا ارنالعان ارناۋ ولەڭ ەرەكشە اسەر قالدىردى. سونداي-اق 7-سىنىپ وقۋشىسى زەينولدا ارۋجاننىڭ جەتىگەن اسپابىنىڭ سۇيەمەلدەۋىمەن ورىنداعان «جەلسىز تۇندە جارىق اي» ءانى مەن «سەرپەر» دومبىراشىلار ءانسامبلىنىڭ ورىنداۋىنداعى «ەركە سىلقىم» كۇيى قوناقتارعا ەرەكشە اسەر سىيلادى.
ءىس-شارادا كىتاپحانا مەڭگەرۋشىسى جانبولاتوۆا ساۋلەش «ادامزاتتىڭ ابايى»، ال قازاق ءتىلى مەن ادەبيەتى ءپانىنىڭ ءمۇعالىمى ەلشىبايەۆا عاليا «اباي ءىلىمى جاساندى ينتەللەكت الەمىندە» تاقىرىپتارىندا باياندامالار جاسادى. ولار اباي دانالىعىنىڭ قازىرگى قوعام دامۋىنداعى ماڭىزىن ايشىقتادى. اسىرەسە، جاساندى ينتەللەكت ۇسىنعان «ۇلى ابايدىڭ كىتاپحاناشىعا اماناتى» اتتى كىتاپشا سەمينار قاتىسۋشىلارىنىڭ ەرەكشە قىزىعۋشىلىعىن تۋدىردى — ءار كىتاپحاناشى اباي رۋحىمەن تىلدەسكەندەي اسەر الدى.
حاكىم ابايدىڭ 180 جىلدىعىنا ارنالعان بۇل شارا – كەزەكتى جيىن ەمەس، ءار قاتىسۋشى ءۇشىن رۋحاني ءوسۋ مەن بيىكتەۋگە جول اشقان تاعىلىمدى باسقوسۋ بولدى.
ءبىز ۇلى تۇلعانىڭ مۇراسىن جاس ۇرپاققا ناسيحاتتاي وتىرىپ، ءوزىمىزدى دە، قوعامدى دا تاربيەلەيمىز. ابايدىڭ ءار ءسوزى، ءار ولەڭى – ادامدىقتىڭ ايناسى.
سوندىقتان ءاربىر ۇستاز بەن كىتاپحاناشى – ابايدى تانىتۋشى، ابايدى ءتىرىلتۋشى بولۋى ءتيىس.
بۇگىنگى ۇرپاق ابايدى تانۋ ارقىلى ءوز بولمىسىن، ءوز ۇلتىنىڭ اسىل قازىناسىن تانيدى.
ەلشىبايەۆا عاليا، الماتى قالاسى،اۋەزوۆ اۋدانى، №202 مەكتەپ-گيمنازياسىنىڭ قازاق ءتىلى مەن ادەبيەتى ءپانىنىڭ ءمۇعالىمى