بۇل جايت تۇرعىنداردى الاڭداتىپ وتىر.
اقتاۋ قالاسىندا كاسپيي تەڭىزىنە بەلگىسىز سۇيىقتىقتىڭ قۇيىلىپ جاتقان بەينەجازبا تۇرعىنداردى شوشىتتى، دەپ حابارلايدى Almaty-akshamy.kz.
بەينەجازبا كەشە تۇسىرىلگەن. سۋدىڭ ءتۇسى وزگەرىپ، كاسپيي تەڭىزىنە قاتتى اعىسپەن قۇيىلىپ جاتقانىن كورۋگە بولادى. لاستانعان سۋدى كورگەن تۇرعىندار كاسپييدىڭ ۋلانعانىن ايتىپ، دابىل قاعۋدا.
«ارينە، ۋ عوي! بالشىق ارالاسقان نەمەسە لاي سۋ وسىنشاما قوڭىر تۇسكە بويالمايدى. بۇل جاقىن جەردەگى كاسىپورىننىڭ سۋى سياقتى. تەكسەرىپ، بۇنى توقتاتۋ كەرەك»، – دەيدى اقتاۋ قالاسىنىڭ تۇرعىنى ايدانا ءابىل.
ماڭعىستاۋ وبلىستىق ەكولوگيا دەپارتامەنتىنىڭ ماماندارىنىڭ ايتۋىنشا، سۋدان سىناما الىنىپ، تەكسەرۋ جۇرگىزدى.
«11 قازان كۇنى كەشكى ۋاقىتتا الەۋمەتتىك جەلىدە پريمورسكيي ەلدى مەكەنىندە ورنالاسقان "ماەك-قازاتومونەركاسىپ" جشس-نە قاراستى №1 تەس اعىندى كانالىنداعى سۋدىڭ لاستانۋى تۋرالى بەينەجازبا تارالدى. سونىمەن قاتار، اتالعان كانالعا "كاسپيي سۋ تۇششىتۋ زاۋىتى" ج ش س جانە "وربيتا" سپورت كەشەنى توگىندى جۇمىستارىن جۇرگىزەدى. ماڭعىستاۋ وبلىسى بويىنشا ەكولوگيا دەپارتامەنتىنىڭ ماماندارى جەدەل تۇردە وقيعا ورىن العان جەرگە بارىپ، ارنا بويىنداعى لاستانۋ ايماعىنا، شولۋ جۇمىستارىن جۇرگىزدى»، - دەپ حابارلادى ەكولوگتار.
الىنعان سىنامالاردىڭ ناتيجەلەرى بويىنشا، «وپرەسنيتەلنىي زاۆود كاسپيي» ءجشس-نىڭ اعىزۋ قۇبىرىنىڭ كوزىنەن جانە № 1 تەس كاسپيي تەڭىزىنە شىعاراتىن قۇبىرىنىڭ كوزىنەن الىنعان سىناما قۇرامىندا تەمىردىڭ جانە فوسفاتتىڭ، مىستىڭ ارتىق مولشەرى انىقتالدى.
ەندى كۇدىكتى كومپانياعا قاتىستى ءىس-قۇجاتتار جيناقتالىپ، سوتقا جىبەرىلەدى.