ق ر پرەزيدەنتتىگىنە كانديدات سالتانات تۇرسىنبەكوۆا پەتروپاۆلدا ءسابيت مۇقانوۆ اتىنداعى وبلىستىق امبەباپ عىلىمي كىتاپحاناسىندا جەرگىلىكتى حالىقپەن كەزدەسۋ وتكىزدى. وندا ول قازاقستانداعى ايەلدەر كاسىپكەرلىگىن دامىتۋ تۋرالى ايتتى.
ۇمىتكەر مەملەكەتتىك ورگانداردىڭ دەرەكتەرى مەن زەرتتەۋلەرىنە سىلتەمە جاساي وتىرىپ، ستاتيستيكانى جاريالادى.
ايەلدەر كاسىپكەرلىگى شوب سەكتورىنداعى جۇمىس ورىندارىنىڭ 31،4%-ىن قامتاماسىز ەتەدى. 2020 جىلعى مالىمەتتەرگە سايكەس، قازاقستاندا ايەلدەر باسقاراتىن كاسىپورىنداردىڭ ۇلەسى 28،3 پايىزدى قۇرادى. ولاردىڭ كوپشىلىگى شاعىن جانە ورتا بيزنەس وكىلدەرى، ولار وسى سەكتورداعى جۇمىس ورىندارىنىڭ 31،4%-ىن جانە ەلدىڭ جالپى ىشكى ءونىمىنىڭ شامامەن 14،6%-ىن قامتاماسىز ەتەدى.
قۇقىق قورعاۋشى شاعىن بيزنەس پەن جەكە كاسىپكەرلەردى سالىقتان تولىعىمەن بوساتۋدى ۇسىناتىنىن ايتتى.
«كاسىپكەرلەردىڭ اياققا تۇرۋىنا مۇمكىندىك بەرۋىمىز كەرەك. ولار ورتا دەڭگەيگە وتكەندە، جەڭىلدەتىلگەن سالىق سالۋ ءقازىردىڭ وزىندە بار. قىزمەت سالاسىنا بايلانىستى جەڭىلدىكتى رەجيم. ال ءىرى بيزنەسكە، اسىرەسە ويىن بيزنەسىنە، كەرىسىنشە، سالىقتى ارتتىرۋى كەرەك»، - دەپ اتاپ ءوتتى ول.
سونداي-اق، جينالعاندار كانديداتتان سايلاۋالدى باعدارلاماسى تۋرالى سۇرادى. اتاپ ايتقاندا، ايەلدەردىڭ زەينەت جاسىن تومەندەتۋ، سوت رەفورماسى جانە ەكونوميكاداعى وزگەرىستەر تۋرالى ءسوز بولدى.