ۇكىمەتتىڭ 2025 جىلعى جۇمىسىنىڭ قورىتىندىسىن شىعارۋ بويىنشا Astana Hub-تا وتكەن باسپا ءسوز كونفەرەنسياسىندا ەنەرگەتيكا ءمينيسترى ەرلان اقكەنجەنوۆ جىلىتۋ ماۋسىمىن وتكىزۋ بويىنشا جۇرگىزىلىپ جاتقان جۇمىستار تۋرالى ايتتى، دەپ حابارلايدى aqshamnews.kz ۇكىمەت باسپاسوزىنە سىلتەمە جاساپ.
ەسەپتى كەزەڭدە ەنەرگەتيكا سالاسىندا ەڭ ماڭىزدى ناتيجەلەرگە قول جەتكىزىلدى – ينفراقۇرىلىمنىڭ ۇزاق جىلدار بويى سوزىلعان توزۋى توقتاتىلىپ، اكتيۆتەردى اۋقىمدى جاڭارتۋ سيكلى ىسكە قوسىلدى. «ءتاريفتى ينۆەستيسياعا ايىرباستاۋ» قاعيداتى ەنگىزىلگەننەن كەيىن ەلەكتر ستانسالارىن جوندەۋ جۇمىستارىنا سالىنعان كاپيتالدىق ينۆەستيسيالار 20%-عا ارتتى، بۇل ەنگىزىلگەن ءپرينسيپتىڭ تيىمدىلىگىن كورسەتەدى.
اتقارىلعان جۇمىستاردىڭ ناتيجەسى سەنىمدىلىكتىڭ ناقتى كورسەتكىشتەرىمەن باعالانادى. ۇزاق جىلدان بەرى العاش رەت ەل بويىنشا جەو (جىلۋ ەلەكتر ورتالىقتارى) جابدىقتارىنىڭ جالپى توزۋى ازايىپ، كورسەتكىش 61%-عا جەتتى. جوسپارلانعان بارلىق جوندەۋ جۇمىسىن ورىنداۋ كەنتاۋ، ريددەر جانە ەكىباستۇز ستانسالارى سەكىلدى بارلىعى 9 ەنەرگەتيكالىق نىساندى تاۋەكەل ايماعىنان شىعارۋعا مۇمكىندىك بەردى.
323 شاقىرىمدىق جىلۋ جەلىلەرىن قايتا جاڭعىرتۋ ناتيجەسىندە تۇتىنۋشىلارعا تۇراقتى جىلۋ جەتكىزۋ قامتاماسىز ەتىلىپ، ينفراقۇرىلىمنىڭ توزۋى 52%-عا تومەندەدى. جىلۋ جەلىلەرىندەگى اپاتتىق جاعدايلار سانى 25%-عا كەمىدى.
«ينفراقۇرىلىمدى قالپىنا كەلتىرۋمەن قاتار جاڭا قۋات كوزدەرىن ىسكە قوسۋ جۇمىستارى قارقىندى تۇردە جۇرگىزىلۋدە. 2025 جىلى تەكەلى ەنەرگەتيكالىق كەشەنىندە گازوتۋربينالىق قوندىرعىلار پايدالانۋعا بەرىلدى، ال توپار ماەس-ىندە (مەملەكەتتىك ايماقتىق ەلەكتروستانسا) 130 مەگاۆاتت قۋاتتىلىعى بار جاڭا تۋربواگرەگات ءساتتى ىسكە قوسىلدى. ەنەرگەتيكالىق جۇيە سۇرانىستىڭ الدىن وراپ، رەكوردتىق كورسەتكىش ساعاتىنا 118 ملرد كيلوۆاتت ەلەكتر ەنەرگياسىن ءوندىردى»، — دەدى ەرلان اقكەنجەنوۆ.
كەلەسى جىلدان باستاپ ۇكىمەت وڭىرلىك دەڭگەيدە جىلۋمەن جابدىقتاۋ سحەمالارىن قايتا قاراۋ بويىنشا جۇيەلى جۇمىسقا كىرىسەدى. پيلوتتىق جوبالار جامبىل وبلىسى مەن شىمكەنت قالاسىندا جۇزەگە اسپاق.